EYurophu, lomunye make losakhulile ungena esontfweni aphetse buhlalu, bese aguca embikwesitfombe saMariya. E-Afrika, umndeni lotsite utsela tjwala eceleni kwelithuna lesihlobo sawo. EMelika, lelinye lijaha lizila kudla bese liyazindla, ngobe linelitsemba lekutsi litawukwati kukhuluma nengilosi lelikholelwa kutsi ingumcondzisi walo. E-Asia, umphristi ushisa tintfo letentiwe ngemaphepha lanemibala leyehlukehlukene kute entele imimoya yabokhokho bakhe umhlatjelo.

YINI labantfu labafanana ngayo? Bonkhe bakholelwa kutsi kunetidalwa letihlakaniphile letisendzaweni yemoya labangakhuluma nato futsi letinemandla ekusita bantfu. Ecinisweni, lenkholelo ayisiyinsha futsi ayimangalisi. Lokumangalisako kutsi kunekuphikisana lokunyenti mayelana nekutsi bobani labahlala endzaweni yemoya.

EmaMoslem akhonta Nkulunkulu munye—longu-Allah. a Bantfu labanyenti labaseTinkholweni Letitsi TebuKhristu batsi Nkulunkulu unguMtsatfu Amunye; unguBabe, iNdvodzana, aphindze abe nguMoya Longcwele. EmaHindu akholelwa kutsi kunabonkulunkulu kanye nabonkulunkulukati labanyenti. Labanye bakholelwa kutsi imimoya ihlala etilwaneni, etihlahleni, emadvwaleni, kanye nasemifudlaneni. Labanye bahungwa nguloko tincwadzi, emabhayisikobho, kanye netinhlelo te-TV letikushoko mayelana netingilosi, emadimoni, tipoko, botikoloshi, bonkulunkulu kanye nabonkulunkulukati.

Njengobe kunemibono leminyenti lephikisanako ngabonkulunkulu, kuphindze kube naleminye leminyenti lemayelana nendlela yekuchumana nabo. Kuyacaca kutsi akusito tonkhe tindlela tekuchumana nabo letilungile. Asewucabange nganaku: Ngembikwekutsi sishaye lucingo, kufanele sati kutsi sishayela bani futsi siciniseke kutsi loyo muntfu uyaphila nekutsi utawuluphendvula lolucingo. Kwetama kukhuluma nemuntfu longaphili angeke kusisite ngalutfo. Lokubi kakhulu kutsi kushayela umuntfu longumkhohlisi kungaba yingoti.

Ngako-ke, bobani vele labaphila endzaweni yemoya? LiBhayibheli aligcini nje ngekuphendvula lombuto, kodvwa liphindze lisitjele nekutsi ngubani lokufanele sikhulume naye, kanye naloko lokufanele sikulindzele kuye. Chubeka ufundza letihloko letilandzelako. Kutawukumangalisa kubona loko liBhayibheli lelikuvetako.

[Umbhalo longentansi]