“Kulunga uyakutsandza.”​—HLA. 45:7.

1. Yini lengasisita kutsi sihambe ‘emikhondvweni yekulunga’?

 ASEBENTISA liVi lakhe kanye nemoya wakhe longcwele, Jehova uholela bantfu bakhe ‘emikhondvweni yekulunga.’ (Hla. 23:3, NW.) Nanobe kunjalo, njengobe sinesono, sivame kuphambuka kulemikhondvo. Kute siphindze sibuyele ekwenteni lokulungile, kudzingeka imetamo yekutimisela. Yini lengasisita kutsi siphumelele? NjengaJesu, kufanele sikutsandze kwenta lokulungile.​—Fundza Tihlabelelo 45:7.

2. Iyini ‘imikhondvo yekulunga’?

² Iyini ‘imikhondvo yekulunga’? Umkhondvo uyindlela lencane nobe umhosha. ‘Lemikhondvo’ isekelwe etimisweni taJehova tekulunga. NgesiHebheru nangesiGriki, ‘kulunga’ kusho intfo ‘leyetsembekile,’ lokusho kunamatsela ngalokuphelele etimisweni tekutiphatsa. Njengobe Jehova ‘ayindzawo yekuhlala kulunga,’ tikhonti takhe tiyakujabulela kulindzela kutsi kube nguye lokhetsa indlela lelungile lokufanele tihambe ngayo.​—Jer. 50:7.

3. Singakufundza njani lokwengetiwe ngekulunga kwaNkulunkulu?

³ Kwetama ngayo yonkhe inhlitiyo yetfu kutsi sivumelane netimiso taNkulunkulu tekulunga ngiko kuphela lokungenta kutsi simjabulise ngalokugcwele. (Dut. 32:4) Loko singacala kukwenta ngekutsi sifundze lokunyenti ngaNkulunkulu Jehova eVini lakhe, liBhayibheli. Nasichubeka sifundza ngaye, futsi sisondzelana naye malanga onkhe, sitawukutsandza kakhulu kulunga kwakhe. (Jak. 4:8) Kufanele siphindze sisebentise sicondziso lesivela eVini laNkulunkulu leliphefumulelwe nakudzingeka sitsatse tincumo letibalulekile ekuphileni.

Funa Kulunga KwaNkulunkulu

4. Kuhlanganisani kufuna kulunga kwaNkulunkulu?

⁴ Fundza Matewu 6:33. Kufuna kulunga kwaNkulunkulu kusho lokungetulu kwekucitsa sikhatsi sishumayela tindzaba letinhle teMbuso. Kute imisebenti yetfu lengcwele yemukeleke kuJehova, kutiphatsa kwetfu kwamalanga onkhe kufanele kuvumelane netimiso takhe letiphakeme. Yini lokufanele yentiwe ngibo bonkhe labafuna kulunga kwaJehova? Kufanele ‘bembatse buntfu lobusha, lobadalwa bafuta Nkulunkulu ngekulunga nangebungcwele beliciniso.’​—Ef. 4:24.

5. Yini lengasisita kutsi sincobe kudvumateka?

⁵ Njengobe setama kuphila ngetimiso taNkulunkulu letilungile, ngaletinye tikhatsi singase sidvumale ngesizatfu semaphutsa etfu. Yini lengasisita kutsi sincobe kudvumateka lokusicedza emandla futsi sifundze kutsandza kanye nekwenta kulunga? (Taga 24:10) Kufanele sisondzele njalo kuJehova ngemthandazo “ngenhlitiyo lecinisile, nangekwetsemba lokuphelele kwekukholwa.” (Heb. 10:19-22) Ngisho nobe singemaKhristu lagcotjiwe nobe sinelitsemba lekuphila emhlabeni, sinekukholwa emhlatjelweni waJesu Khristu wesihlengo kanye nakuloko lakwentako njengemPhristi wetfu Lomkhulu kakhulu. (Rom. 5:8; Heb. 4:14-16) Kusebenta kwengati yaJesu leyacitseka kwavetwa esihlokweni se-Sicongosekulindza sekucala ngca. (1 Joh. 1:6, 7) Lesihloko satsi: “Kuyatiwa kutsi [lapho] intfo lebovu njengengati nobe lebovu tju ibukwa ekukhanyeni ngengilazi lebovu, ibonakala imhlophe; ngako-ke, ngisho nobe tono tetfu tibovu njengengati nobe tibovu tju, nasitibuka ngendlela  Nkulunkulu latibuka ngayo asebentisa ingati yaKhristu, tibonakala timhlophe.” (July 1879, likh. 6) Kuyamangalisa kakhulu kutsi Jehova usentele sihlengo ngemhlatjelo weNdvodzana yakhe letsandzekako!​—Isa. 1:18.

Hlola Tikhali Takho Takamoya

6. Kungani kubalulekile kutsi sihlole tikhali tetfu takamoya?

⁶ Ngaso sonkhe sikhatsi, kufanele sihlale sifake “sivikelo sesifuba lesikulunga,” ngobe siyincenye lebalulekile yetikhali takamoya letivela kuNkulunkulu. (Ef. 6:11, 14) Ngisho nobe sisandza kutinikela kuJehova nobe sesimkhonte emashumi eminyaka, kubalulekile kutsi sihlole tikhali tetfu takamoya malanga onkhe. Kungani? Kungobe Develi kanye nemadimoni akhe baye bajikijelwa lapha emhlabeni. (Semb. 12:7-12) Sathane utfukutsele, futsi uyati kutsi sikhatsi sakhe sifishane. Ngako-ke, sewubahlasela kakhulu bantfu baNkulunkulu. Siyakucaphela yini kubaluleka kwekufaka “sivikelo sesifuba lesikulunga”?

7. Sitawutiphatsa njani nangabe sisicaphela sidzingo sekuba ‘nesivikelo sesifuba lesikulunga’?

⁷ Sivikelo sesifuba sivikela inhlitiyo. Ngesizatfu sekutsi sinesono, inhlitiyo yetfu lengumfanekiso iyayengana futsi yonakele. (Jer. 17:9) Njengobe inhlitiyo yetfu inemkhuba wekwenta lokubi, kubalulekile kutsi iceceshwe futsi iyalwe. (Gen. 8:21) Nangabe sisicaphela sidzingo sekuba ‘nesivikelo sesifuba lesikulunga,’ angeke ngaletinye tikhatsi sisikhumule ngekutsi sikhetse kutijabulisa ngetintfo Nkulunkulu latitondzako, nobe kutsi sivume kuticabanga senta lokubi. Angeke sicitse sikhatsi lesibalulekile sibukela i-TV. Kunaloko, sitawuchubeka setama kwenta loko lokujabulisa Jehova. Ngisho nobe singawa ngekutsi sicale kucabanga ngetintfo tenyama letingakalungi kwesikhashana, ngelusito lwaJehova singaphindze sivuke.​—Fundza Taga 24:16.

8. Kungani sidzinga “lihawu lelikukholwa”?

⁸ Lenye incenye yetikhali tetfu takamoya “lihawu lelikukholwa.” Lisisita kutsi ‘sicime tonkhe tikhali letivutsako talomubi.’ (Ef. 6:16) Kukholwa kanye nelutsandvo lolusuka enhlitiyweni ngaJehova kusisita kutsi sente kulunga futsi sihlale sisendleleni leya ekuphileni lokuphakadze. Nasichubeka sifundza kutsandza Jehova, sitawuya sikutsandza kakhulu kulunga kwakhe. Kutsiwani-ke nganembeza wetfu? Usisita njani emetameni yetfu yekutsandza kulunga?

Londvolota Nembeza Lomsulwa

9. Sizuza njani ngekulondvolota nembeza lomsulwa?

⁹ Ngesikhatsi sibhajatiswa, sacela “nembeza lomsulwa” kuJehova. (1 Phet. 3:21) Ngesizatfu sekutsi sinekukholwa esihlengweni saJesu, ingati yakhe imbonya tono tetfu futsi ngaleyondlela sijabulela buhlobo lobuhle naNkulunkulu. Nanobe kunjalo, kute sihlale sinebuhlobo lobuhle naye, kufanele silondvolote nembeza lomsulwa. Nangabe ngaletinye tikhatsi nembeza wetfu usilahla nobe usecwayisa, kufanele sijabule ngekutsi usasebenta kahle. Tecwayiso letinjalo tiveta kutsi nembeza wetfu awukabi butfuntfu etindzabeni  letimayelana netindlela taJehova letilungile. (1 Thim. 4:2) Nanobe kunjalo, nembeza ungafeza lenye indzima kulabo labafuna kutsandza kulunga.

10, 11. (a) Landzisa lokuhlangenwe nako lokuveta kutsi kungani kufanele siwulalele nembeza wetfu loceceshwe liBhayibheli. (b) Kungani kutsandza kulunga kungasiletsela injabulo?

¹⁰ Nasenta lokubi, nembeza wetfu ungasisola nobe usihluphe. Lomunye losemusha wake waphambuka ‘emikhondvweni yekulunga.’ Abesanemkhuba wekubuka titfombe letingcolile futsi asacale nekubhema insangu. Abetiva anelicala nakaya emihlanganweni futsi eva shengatsi uyatentisa nakaya emsebenti wekushumayela, ngako wayekela kuhlanganyela kulemisebenti yebuKhristu. Watsi: “Nanobe kunjalo, bengingacapheli kutsi nembeza wami utawungisola ngetento tami.” Wachubeka watsi: “Ngaphila leyo mphilo iminyaka lecishe ibe mine.” Ngemuva kwaloko, wacala kucabanga ngekubuyela ecinisweni. Ngisho nobe abecabanga kutsi Jehova abengeke awulalele umthandazo wakhe, wathandaza acela intsetselelo. Ngemuva kwemizuzu lengephansi kwalelishumi, make wakhe wamvakashela futsi wamkhutsata kutsi aphindze aye emihlanganweni. Waya eHholweni leMbuso futsi wacela lomdzala welibandla kutsi amchubele sifundvo. Ngekuhamba kwesikhatsi wabhajatiswa, futsi ubonga Jehova ngekusindzisa kuphila kwakhe.

¹¹ Asewucabange ngendlela loye watfola ngayo injabulo lenkhulu ngekwenta lokulungile! Njengobe sifundza kutsandza kulunga futsi sikwenta ngalokugcwele, sitawutfola injabulo leyengetiwe ngekwenta loko lokujabulisa Babe wetfu wasezulwini. Cabanga nje, sikhatsi siyeta lapho bantfu batawujabulela kuphela imiva yenjabulo levela kubonembeza babo; batawulingisa buntfu baNkulunkulu ngalokuphelele. Ngako-ke, kufanele silujulise ekhatsi etinhlitiyweni tetfu lutsandvo lwekulunga, bese senta Jehova ajabule.​—Taga 23:15, 16.

12, 13. Singawucecesha njani nembeza wetfu?

¹² Yini lesingayenta kute siceceshe bonembeza betfu? Nasitadisha imiBhalo kanye netincwadzi letisekelwe eBhayibhelini, kubalulekile kukhumbula kutsi “umuntfu lolungile ucabanga kucala angakaphendvuli.” (Taga 15:28) Asewucabange ngendlela loko lokungasizuzisa ngayo nasihlangabetana nemibuto lemayelana nemsebenti. Nangabe umsebenti lotsite ushayisana ngalokucondzile netimiso temiBhalo, linyenti letfu lisheshe lisilalele sicondziso lesivela esisebentini lesetsembekile nalesihlakaniphile. Nanobe kunjalo, nangabe kungacaci kutsi luhlobo lolutsite lwemsebenti luyemukeleka yini, kufanele sifune timiso teliBhayibheli letisebenta kuleso simo, bese siyacabangisisa futsi sithandaze ngato. a Loku kufaka ekhatsi kulalela simiso sekubalekela kukhuba bonembeza balabanye. (1 Khor. 10:31-33) Kufanele sikhatsateke kakhulu ngetimiso letitsintsa buhlobo betfu naNkulunkulu. Nangabe Jehova angumuntfu mbamba kitsi, kufanele  sitibute: ‘Kwenta kwami lomsebenti angeke yini kumdzabukise Jehova, kumente eve buhlungu?’​—Hla. 78:40, 41.

¹³ Nasilungiselela Sifundvo se-Sicongosekulindza nobe Sifundvo SeliBhayibheli Selibandla, kufanele sikhumbule kuzindla ngaloko lesisuke sikufundza. Sivamile yini kumane sidvwebele timphendvulo temibuto lesencwadzini bese sendlulela esigabeni lesilandzelako? Kulungiselela ngalendlela angeke kusente sikhulise lutsandvo lwetfu ngekulunga nobe kusente sakhe nembeza lophilako. Nangabe sifuna kuba batsandzi bekulunga, kufanele sitadishe ngekutimisela futsi sizindle ngaloko lesikufundza eVini laNkulunkulu. Kufundza kutsandza kulunga ngayo yonkhe inhlitiyo yetfu kudzinga umetamo.

Lambela Futsi Womele Kulunga

14. Nkulunkulu Jehova kanye naJesu Khristu bafuna sitive njani ngemsebenti wetfu longcwele?

¹⁴ Nkulunkulu Jehova kanye naJesu Khristu bafuna sijabule nasenta umsebenti wetfu longcwele. Yini letawusisita kutsi sijabule? Kutsandza kulunga! Enshumayelweni yakhe yaseNtsabeni, Jesu watsi “Babusisiwe labalambele bomele kulunga, ngobe bayakwesutsiswa.” (Mat. 5:6) Lamavi abaluleke kangakanani kulabo labanesifiso sekutsandza kulunga?

15, 16. Kulamba kanye nekoma ngekwakamoya kutawukwenetiswa ngatiphi tindlela?

¹⁵ Lelive lesiphila kulo libuswa ngulomubi. (1 Joh. 5:19) Nasifundza liphephandzaba lakunobe nguliphi live, sitfola imibiko yenzondo kanye nebudlova lobandza ngelizinga lelikhulu. Inzondo lesemkhatsini webantfu yenta umuntfu lolungile akhatsateke nakacabanga ngayo. (Shu. 8:9) Njengobe simtsandza Jehova, siyati kutsi nguye kuphela longakhona kwenetisa indlala kanye nekoma kwakamoya kwalabo labanesifiso sekufundza kulunga. Bantfu labangamhloniphi Nkulunkulu batawususwa madvutane, futsi labo labatsandza kulunga angeke basahlangabetana nekucindzeteleka lokubangelwa bantfu labete umtsetfo kanye netento tabo letimbi. (2 Phet. 2:7, 8) Kutawusijabulisa kakhulu loko!

¹⁶ Njengetinceku taJehova kanye nebalandzeli baJesu Khristu, siyati kutsi labo labalambele futsi labomele kulunga “bayakwesutsiswa.” Batawenetiswa ngalokugcwele ngeluhlelo lwaNkulunkulu lwemazulu lamasha kanye nemhlaba lomusha lapho ‘kuyohlala khona kulunga.’ (2 Phet. 3:13) Ngako-ke, asingaphelelwa ngemandla nobe simangale ngekutsi kucindzeteleka kanye nebudlova buye bakucedza kulunga kulelive laSathane. (Shu. 5:8) Jehova, Losetikwako Konkhe, uyakwati lokwentekako futsi madvutane utawubakhulula bonkhe labatsandza kulunga.

Zuza Ngekutsandza Kulunga

17. Ngutiphi letinye tinzuzo letitfolakala ngekutsandza kulunga?

¹⁷ Incwadzi yeTihlabelelo 146:8 igcizelela inzuzo lenkhulu letfolakala ngekuhamba emkhondvweni wekulunga. Lomhlabeli watsi: ‘Jehova uyabatsandza labalungile.’ Asewucabange nje! Njengobe sitsandza kulunga, uMbusi wendzawo yonkhe naye uyasitsandza. Ngesizatfu sekutsi Jehova uyasitsandza, siyaciniseka ngekutsi utawusinakekela nasichubeka sibeka tintfo letimayelana neMbuso kucala ekuphileni kwetfu. (Fundza Tihlabelelo 37:25; Taga 10:3.) Ekugcineni, emhlabeni wonkhe kutawuhlala bantfu labatsandza kulunga. (Taga 13:22) Kubantfu baNkulunkulu labanyenti, umvuzo labatawutfola wekuphila  ngekulunga utawuba yinjabulo lenkhulu kanye nekuphila lokungapheli emhlabeni lomuhle lolipharadisi. Ngisho nanyalo, labo labatsandza kulunga kwaNkulunkulu babusiswa ngekuniketwa kuthula kwangekhatsi lokwenta kube nebunye emindenini kanye nasemabandleni abo.​—Fil. 4:6, 7.

18. Yini lokufanele sichubeke siyenta njengobe silindzele lilanga laJehova?

¹⁸ Njengobe silindzele kufika kwelilanga lelikhulu laJehova, kufanele sichubeke sifuna kulunga kwakhe. (Zef. 2:2, 3) Ngako-ke, asichubeke sititsandza tindlela taNkulunkulu Jehova letilungile. Loku kuhlanganisa nekugcina “sivikelo sesifuba lesikulunga” sicinile kute sivikele inhlitiyo yetfu. Kufanele siphindze silondvolote nembeza lomsulwa​—lotawusenta sijabule futsi wente nenhlitiyo yaNkulunkulu ijabule.​—Taga 27:11.

19. Yini lokufanele sitimisele kuyenta, futsi kutawucocwa ngani esihlokweni lesilandzelako?

¹⁹ “Emehlo aSimakadze abuka emhlabeni wonkhe kucinisa labo labatinhlitiyo tabo titinikele kuye ngalokuphelele.” (2 Khr. 16:9) Lamavi asidvudvuta kakhulu njengobe senta lokulungile kulelive lelinetinkinga, budlova, bubi, kanye nekungalondzeki lokwandzako. Kuliciniso kutsi tento tetfu tekulunga tingabamangalisa bantfu labanyenti labehlukaniswe naNkulunkulu. Nanobe kunjalo, sitizuzisa tsine nasenta ngekuvumelana nekulunga kwaJehova. (Isa. 48:17; 1 Phet. 4:4) Ngako-ke, asitimisele kuchubeka sitfola injabulo ekutsandzeni kanye nasekwenteni kulunga ngenhlitiyo yetfu yonkhe. Ngetulu kwaloko, kuba nenhlitiyo lephelele kuhlanganisa nekutondza lokubi. Sihloko lesilandzelako sitawuchaza kutsi loku kusho kutsini.

[Umbhalo longentansi]

Ungaphendvula Njani?

• Kungani kufanele sicaphele kubaluleka kwesihlengo kute sitsandze kulunga?

• Kungani kubalulekile kutsi sifake “sivikelo sesifuba lesikulunga”?

• Singawucecesha njani nembeza wetfu?

[Imibuto Yesihloko Lesifundvwako]

[Sitfombe ekhasini 26]

Nembeza loceceshwe kahle usisita kutsi sicatulule imibuto lemayelana nemsebenti