Hlala Uphapheme, NjengaJeremiya
Hlala Uphapheme, NjengaJeremiya
‘Mine [Jehova] ngihlala ngiphaphamele kona kutsi livi lami ligcwaliseke.’—JER. 1:12.
1, 2. Kungani kuhlala kwaJehova ‘aphapheme’ kuhlotjaniswa nesihlahla se-alimondi?
EMAGCUMENI aseLebanoni newaka-Israyeli, sihlahla se-alimondi singulesinye setihlahla letisheshe tichakate. Timbali taso letinhle letibovana nobe letimhlophe ticala kubonakala ngasekupheleni kwa-January nobe ekucaleni kwa-February. Nalihunyushwe njengobe linjalo, ligama lesiHebheru lalesihlahla lisho kutsi ‘lophaphamako.’
2 Ngesikhatsi Jehova abeka Jeremiya njengemphrofethi wakhe, lesici sesihlahla se-alimondi sasetjentiswa kute sifanekise liciniso lelitsite lelibalulekile. Ekucaleni kwemsebenti wakhe, lomphrofethi wabona ligala lalesihlahla embonweni. Belisho kutsini? Jehova wachaza: ‘Ngihlala ngiphaphamele kona kutsi livi lami ligcwaliseke.’ (Jer. 1:11, 12, NW.) Njengobe nesihlahla se-alimondi ‘siphaphama’ ngekushesha, naJehova uyashesha kutjela bantfu loko latawukwenta. Watfumela baphrofethi bakhe kutsi bayewucwayisa bantfu ngemiphumela yekungalaleli. (Jer. 7:25) Abengaphumuli, kunaloko ‘abehlala aphapheme,’ kute kube ngulapho livi lakhe lesiphrofetho ligcwaliseka. Nga-607 B.C.E., lobekusikhatsi lesifanele, sehlulelo saJehova sefikela sive sakaJuda lebesihlubukile.
3. Yini lesingaciniseka ngayo ngaJehova?
3 Ngendlela lefananako nalamuhla, Jehova uphapheme, futsi ucaphele kute afeze intsandvo yakhe. Angeke kwenteke kutsi angakunaki kugcwaliseka kwelivi lakhe. Kuhlala kwaJehova aphapheme kukutsintsa njani wena? Uyakholelwa yini kutsi nakulomnyaka wa-2011, Jehova ‘ukuphaphamele’ kugcwaliseka kwetetsembiso takhe? Nangabe sitingabata tetsembiso taJehova leticinisekile, lesi sikhatsi sekutsi siphaphame ebutfongweni bakamoya. (Rom. 13:11) Njengemphrofethi waJehova, Jeremiya wahlala aphapheme. Kuhlola indlela Jeremiya lahlala ngayo aphaphamele sabelo sakhe lebesivela kuNkulunkulu kanye nesizatfu lesamenta wenta njalo, kungasisita sibone indlela lesingabeketela ngayo emsebentini Jehova lasinikete wona.
Umlayeto Lophutfumako
4. Ngutiphi tinsayeya Jeremiya lahlangabetana nato nakamemetela umlayeto wakhe, futsi yini leyawenta waphutfuma?
4 Kungenteka kutsi Jeremiya abesasondzela eminyakeni lengu-25 budzala ngesikhatsi Jehova amniketa sabelo sekuba ngumlindzi. (Jer. 1:1, 2) Nanobe kunjalo, yena watibona angumfanyana nje, futsi angakufanelekeli kukhuluma embikwalabadzala besive, lobekubantfu labakhulile futsi labebasemagunyeni. (Jer. 1:6) Abenemilayeto lehlabako kanye netehlulelo letesabekako lobekufanele atimemetele, ikakhulukati kubaphristi, baphrofethi bemanga, babusi, kanye nakulabo ‘labebatihambela ngendlela yabo’ futsi ‘bahlubuka njalo.’ (Jer. 6:13; 8:5, 6) Lithempeli lelikhatimulako leNkhosi Solomoni, lebeliyindzawo yekukhonta kweliciniso sikhatsi lesingaba ngemakhulu lamane eminyaka, belitawubhujiswa. EJerusalema nakaJuda bekutawusala kute muntfu, futsi takhamuti takhona betitawutfunjwa. Kuyacaca-ke kutsi umlayeto lobekufanele Jeremiya awumemetele bewuphutfuma!
5, 6. (a) Jehova usisebentisa njani sigaba saJeremiya lamuhla? (b) Yini lesitawuyihlola kulesifundvo?
5 Etikhatsini talamuhla, ngelutsandvo Jehova uye wahlela kutsi kube nelicembu lemaKhristu lagcotjiwe lasebenta njengebalindzi labangekwemfanekiso labakhipha tecwayiso letimayelana nekwehlulelwa kwalelive. Sekungemashumi eminyaka lesigaba saJeremiya sikhutsata bantfu kutsi batinake letikhatsi lesiphila kuto. (Jer. 6:17) LiBhayibheli ligcizelela kutsi Jehova, uMgcini Wesikhatsi Lomkhulu, akephuti. Lilanga lakhe litawufika ngesikhatsi sakhe lesifanele, nangeli-awa bantfu labangakalilindzeli.—Zef. 3:8; Mak. 13:33; 2 Phet. 3:9, 10.
6 Khumbula kutsi Jehova uphapheme futsi utawuletsa umhlaba wakhe lomusha lonekulunga ngesikhatsi lasibekile. Kwati loku kufanele kuwakhutsate emalunga esigaba saJeremiya futsi kusite bangani bawo labatinikele kutsi bahlale bakuphaphamele kuphutfuma kwemlayeto wabo. Loko kukutsintsa njani wena? Jesu watsi sonkhe kufanele sikhetse kusekela uMbuso waNkulunkulu. Asesihlole timfanelo letintsatfu letasita Jeremiya kutsi ahlale awuphaphamele umsebenti wakhe, futsi letingasisita kutsi sente lokufananako.
Lutsandvo Ngebantfu
7. Chaza indlela lutsandvo lolwamkhutsata ngayo Jeremiya kutsi ashumayele nangetulu kwetimo letimatima.
7 Yini leyakhutsata Jeremiya kutsi ashumayele nangetulu kwetimo letimatima? Abenelutsandvo ngebantfu. Jeremiya bekati kutsi belusi bemanga ngibo labebabangela tinkinga letinyenti bantfu labebahlangabetana nato. (Jer. 23:1, 2) Kwati loko kwamsita kutsi ente umsebenti wakhe ngelutsandvo nangeluvelo. Abefuna kutsi bantfu bakubo beve emavi aNkulunkulu futsi baphile. Abekhatsateke kakhulu kangangekutsi wate walila ngesizatfu senhlekelele lebeyitawubehlela. (Fundza Jeremiya 8:21; 9:1.) Incwadzi yeSililo iluveta ngalokucacile lutsandvo kanye nekukhatsateka Jeremiya labenako ngelibito laJehova nangebantfu. (Sil. 4:6, 9) Lamuhla, nawubona bantfu ‘bakhatsatekile futsi bahlakatekile, banjengetimvu letite umelusi,’ awubi naso yini sifiso sekubatjela tindzaba letidvudvutako teMbuso waNkulunkulu?—Mat. 9:36.
8. Yini leveta kutsi kuhlupheka akuzange kumtfukutselise Jeremiya?
8 Jeremiya wahlushwa ngibo bona labantfu labefuna kubasita, kodvwa akazange atiphindziselele nobe atfukutsele. Abebeketela futsi anemusa, ngisho naseNkhosini lekhohlakele lengu-Sedekiya. Nangemuva kwekutsi Sedekiya ayale kutsi abulawe, Jeremiya wachubeka amncenga kutsi alalele livi laJehova. (Jer. 38:4, 5, 19, 20) Lutsandvo lwetfu ngebantfu lucine njengelwaJeremiya yini?
Sibindzi Lebesivela KuNkulunkulu
9. Sati ngani kutsi sibindzi saJeremiya besivela kuNkulunkulu?
9 Ngesikhatsi Jehova akhuluma naye kwekucala, Jeremiya wetama kubeka taba. Ngekwaloko lakusho, siyabona kutsi sibindzi kanye nekutimisela lachubeka akuveta akazange atalwe nako. Emandla langakavami Jeremiya lawaveta emsebentini wakhe njengemphrofethi wawatfola ngekwetsembela ngalokuphelele kuNkulunkulu. Jehova abesekela lomphrofethi “njengelichawe lemphi lelinemandla” ngobe abemsita futsi amniketa emandla kute akwati kufeza sabelo sakhe. (Jer. 20:11) Jeremiya bekatiwa kakhulu ngekuba nesibindzi kangangekutsi ngesikhatsi Jesu asemhlabeni, labanye bebacabanga kutsi unguJeremiya lovusiwe.—Mat. 16:13, 14.
10. Kungani kungase kutsiwe insali yalabagcotjiwe ‘ibekwe etikwetive nasetikwemibuso’?
10 Njengobe Jehova ‘ayiNkhosi yetive,’ watfuma Jeremiya kutsi amemetele sehlulelo sakhe etiveni nasemibusweni. (Jer. 10:6, 7) Nanobe kunjalo, insali yalabagcotjiwe yona ‘ibekwe etikwetive nasetikwemibuso’ ngamuphi umcondvo? (Jer. 1:10) Njengalomphrofethi wasendvulo, sigaba saJeremiya sitfole sabelo lesivela kuMbusi wendzawo yonkhe. Ngako-ke, tinceku taNkulunkulu letigcotjiwe tineligunya lelifanele lekuyimemetela emhlabeni wonkhe imilayeto lelahla tive kanye nemibuso. Njengobe sigaba saJeremiya sineligunya lelivela kuNkulunkulu Losetikwako Konkhe futsi sisebentisa lulwimi lolucacile lweliVi lakhe leliphefumulelwe, simemetela kutsi tive kanye nemibuso yalamuhla kutawususwa futsi kubhujiswe ngesikhatsi saNkulunkulu lesibekiwe nangendlela lekhetfwe nguye. (Jer. 18:7-10; Semb. 11:18) Sigaba saJeremiya sitimisele kuchubeka ngemandla emsebentini lesiwuniketwe nguNkulunkulu wekumemetela umlayeto wetehlulelo takhe emhlabeni wonkhe.
11. Yini letawusisita kutsi sichubeke sishumayela ngesibindzi nasihlangabetana netimo letimatima?
11 Kuvamile kutsi ngaletinye tikhatsi sitive sidvumatekile nasihlangabetana nekuphikiswa, kunganakwa, nobe timo letimatima. (2 Khor. 1:8) Nanobe kunjalo, njengaJeremiya, akukafaneli siphele emandla nobe sicindzeteleke kakhulu. Shengatsi sonkhe singachubeka sithandaza kuNkulunkulu, setsembele kuye, futsi ‘sibe nesibindzi’ njengobe silindzele kusitwa nguye. (1 Thes. 2:2) Njengobe sitikhonti teliciniso, kufanele sihlale siphapheme emisebentini lesiniketwe yona nguNkulunkulu. Kufanele sitimisele kuchubeka sishumayela ngesibindzi mayelana nekubhujiswa kweTinkholo Letitsi TebuKhristu, lokwafanekiswa kubhujiswa kweliJerusalema lelingaketsembeki. Sigaba saJeremiya angeke sigcine ngekumemetela “umnyaka wemusa waSimakadze,” kodvwa sitawuphindze simemetele “nelilanga lekuphindzisela kwaNkulunkulu wetfu.”—Isa. 61:1, 2; 2 Khor. 6:2.
Injabulo Lenkhulu
12. Kungani singaphetsa ngekutsi Jeremiya wayilondvolota injabulo yakhe, futsi yini leyamsita kutsi akwati kwenta njalo?
12 Jeremiya abetfola injabulo emsebentini wakhe. Watsi kuJehova: “Emavi akho atsi nakefika kimi, ngawadla, aba yinjabulo yami nentfokoto yenhlitiyo yami, ngobe ngibitwa ngeLibito lakho, awu, Simakadze.” (Jer. 15:16) Jeremiya abekutsatsa njengentfo lebalulekile kumelela Nkulunkulu weliciniso kanye nekumemetela livi lakhe. Caphela kutsi ngesikhatsi Jeremiya anaka kakhulu kwedzelelwa bantfu, abelahlekelwa yinjabulo yakhe. Lapho acala kunaka buhle kanye nekubaluleka kwemlayeto wakhe, abephindze ajabule.—Jer. 20:8, 9.
13. Kungani kutondla ngemaciniso lajulile akamoya kubalulekile kute silondvolote injabulo yetfu?
13 Lamuhla, kute natsi sikwati kulondvolota injabulo emsebentini wekushumayela kufanele sitondle ‘ngekudla lokucinile,’ lokungemaciniso lajulile eliVi laNkulunkulu. (Heb. 5:14) Sifundvo lesijulile sakha kukholwa. (Khol. 2:6, 7) Sisenta sati kutsi tento tetfu timtsintsa njani Jehova. Nangabe sikutfola kumatima kwakha sikhatsi sekufundza kanye nekutadisha liBhayibheli, kufanele siphindze sihlolisise luhlelo lwetfu. Ngisho nemizuzu lembalwa yekutadisha kanye nekuzindla malanga onkhe ingasenta sisondzelane naJehova, futsi itawusenta sibe ‘nenjabulo kanye nentfokoto yenhlitiyo,’ njengobe bekunjalo nangaJeremiya.
14, 15. (a) Ngutiphi titselo letatfolakala ngekutsi Jeremiya awente ngekwetsembeka umsebenti wakhe? (b) Yini bantfu baNkulunkulu labayatiko lamuhla ngemsebenti wekushumayela?
14 Jeremiya watimemetela ngesibindzi tecwayiso taJehova kanye nemlayeto wesehlulelo sakhe. Nanobe kunjalo, umsebenti labetimisele kakhulu kuwenta ‘bewuwekwakha kanye newekuhlanyela.’ (Jer. 1:10) Umsebenti wakhe wekwakha kanye nekuhlanyela waba netitselo. Lamanye emaJuda kanye nebantfu labangesiwo ema-Israyeli basindza nakubhujiswa liJerusalema nga-607 B.C.E. Sike seva ngemaRekhabi, nga-Ebedi Meleki kanye naBharuki. (Jer. 35:19; 39:15-18; 43:5-7) Labangani baJeremiya labebatsembekile futsi bamesaba Nkulunkulu babafanekisela kahle labo labanelitsemba lekuphila emhlabeni, lababangani besigaba saJeremiya. Sigaba saJeremiya sitfola injabulo lenkhulu ngekwakha kukholwa ‘kwalesicumbi lesikhulu.’ (Semb. 7:9) Ngendlela lefananako, labangani labatsembekile balabagcotjiwe batfola kwenetiseka lokukhulu ngekusita bantfu labanenshisekelo kutsi bati liciniso.
15 Bantfu baNkulunkulu bayati kutsi kushumayela tindzaba letinhle akusiyo nje kuphela indlela yekusita labalalelako, kodvwa kuphindze kube sento sekukhonta Nkulunkulu. Ngisho nobe bantfu basilalela nobe cha, kwentela Jehova umsebenti longcwele wekushumayela kusiletsela injabulo lenkhulu.—Hla. 71:23; fundza Roma 1:9.
‘Hlala Uphapheme’ Esabelweni Sakho!
16, 17. Umbhalo weSembulo 17:10 kanye newaHabakhuki 2:3 ukuveta njani kuphutfuma kwesikhatsi setfu?
16 Kuphutfuma kwaletikhatsi lesiphila kuto kucaca kakhulu nasibuka siphrofetho lesiphefumulelwe lesikuSembulo 17:10. Inkhosi yesikhombisa, lokunguMbuso Wemhlaba WemaNgisi nemaMelika, seyivele ikhona. Mayelana nalombuso siyafundza: ‘Nawufika [umbuso wemhlaba wesikhombisa], uyawubusa sikhashana.’ Njenganyalo, kufanele kutsi ‘lesikhashana’ sesisondzela ekupheleni kwaso. Umphrofethi Habakhuki usiniketa nasi sicinisekiso mayelana nekuphela kwalelive lelibi: “Lesembulo silindzele sikhatsi lesimisiwe . . . silindzele, sona sitawufika nome kanjani, futsi ngeke sephute.”—Hab. 2:3.
17 Tibute: ‘Kuphila kwami kukuveta kahle yini kuphutfuma kwetikhatsi lesiphila kuto? Indlela lengiphila ngayo iyaveta yini kutsi ngilindzele kutsi kuphela kufike madvutane? Tincumo tami kanye netintfo letita kucala kimi ativeti yini kutsi angikakulindzeli kuphela kutsi kufike madvutane, ngisho nekutsi angiciniseki kutsi kuyoke kufike?’
18, 19. Kungani lesi kungasiso sikhatsi sekwehlisa emandla?
18 Umsebenti wesigaba semlindzi awukapheli kwanyalo. (Fundza Jeremiya 1:17-19.) Kuyajabulisa kwati kutsi insali yemaKhristu lagcotjiwe angeke inyakatiswe, ngobe ifanana ‘nensika yensimbi’ kanye ‘nelidolobha lelingumbhoshongo.’ ‘Tinkhalo tayo tiboshwe ngeliciniso,’ ngobe ivumela liVi laNkulunkulu kutsi liyicinise kute kube ngulapho umsebenti wayo sewuphelile. (Ef. 6:14) Ngekutimisela lokufananako, sicumbi lesikhulu sibasekela ngenkhutsalo besigaba saJeremiya ekufezeni umsebenti labawunikwe nguNkulunkulu.
19 Lesi akusiso sikhatsi sekwehlisa emandla emsebentini weMbuso, kodvwa sikhatsi sekucabanga ngekubaluleka kwaJeremiya 12:5. (Fundza.) Sonkhe sihlangabetana nekulingwa lokufanele sikubeketelele. Lokuvivinywa kwekukholwa kwetfu singakufananisa nekugijima ‘nemadvodza lanematubane.’ Nanobe kunjalo, njengobe “kuhlupheka lokukhulu” kusondzela, singalindzela kutsi tinkinga tandze. (Mat. 24:21) Kwetama kulwisana nalobumatima lobutako kungafananiswa nekuncintisana “nemahhashi.” Kute umuntfu akwati kubamba litubane lelikhulu lemahhashi, kungase kudzingeke abe ngulobeketelako. Ngako-ke, kuyazuzisa kubeketelela kulingwa lesihlangabetana nako nyalo, ngobe kwenta njalo kutawusenta sikulungele kubeketelela loko lokuseta.
20. Yini lotimisele kuyenta?
20 Sonkhe singamlingisa Jeremiya futsi sisifeze ngemphumelelo sabelo setfu sekushumayela. Timfanelo letinjengelutsandvo, sibindzi, kanye nenjabulo tasita Jeremiya wawufeza ngekwetsembeka umsebenti lomkhulu labenawo, lowatsatsa iminyaka lengu-67 yekuphila kwakhe. Kuchakata kwesihlahla lesihle se-alimondi kusikhumbuta kutsi Jehova ‘utawuhlala aphapheme’ mayelana nelivi lakhe, kute atewukwati kuliphumelelisa. Ngako-ke, natsi sinesizatfu lesihle sekwenta kanjalo. Jeremiya ‘wahlala aphapheme,’ futsi natsi singenta lokufananako.
Usakhumbula?
• Lutsandvo lwamsita njani Jeremiya kutsi ‘ahlale aphaphamele’ sabelo sakhe?
• Kungani sidzinga sibindzi lesivela kuNkulunkulu?
• Yini leyasita Jeremiya walondvolota injabulo yakhe?
• Yini lekwenta ufune ‘kuhlala uphapheme’?
[Imibuto Yesihloko Lesifundvwako]
[Titfombe ekhasini 31]
Utawuchubeka yini ushumayela nangetulu kwekuphikiswa?
