Kungani Imishado Leminyenti Ingaphumeleli?

“BaFarisi beta [kuJesu] bamlinga batsi: ‘Kuvunyelwe yini kutsi indvodza idivose umkayo nome ngasiphi sizatfu?’”—Matewu 19:3.

LABANYE bantfu labebaphila emalangeni aJesu bebatibuta kutsi umshado ungakwati yini kuphumelela kanye nekutsi kufanele yini uhlale njalo. Jesu watsi kubo: “Anizange niwufundze yini lomBhalo lotsi: ‘Ekucaleni uMdali wenta umuntfu lomdvuna nalomsikati’? Watsi: ‘Ngenca yaloko-ke indvodza iyawushiya uyise nenina inamatsele kumkayo, labo-ke bobabili sebayawuba nyamanye.’ Ngako-ke abasebabili, kodvwa sebamunye. Ngako-ke loko lakuhlanganisile Nkulunkulu, akungabe kusehlukaniswa ngumuntfu.” a (Matewu 19:4-6) Kuyacaca-ke kutsi Nkulunkulu abefuna kutsi umshado uphumelele.

Emaveni lamanyenti lamuhla, imishado lengemaphesenti langu-40 nobe ngetulu ‘iyehlukaniswa,’ futsi iphetsa ngedivosi. Seluleko seliBhayibheli lesimayelana nemshado sesiphelelwe sikhatsi yini? Kungenteka yini kutsi umshado awuphumeleli ngesizatfu sekutsi kwawona uliphutsa?

Asewucabange nganangu umfanekiso: Imindeni lemibili itsenga timoto letifananako. Lona lomunye umndeni uyayinakekela futsi uyishayela kahle. Imoto yawo ayiphuki. Kantsi lona lomunye umndeni awusicitsi sikhatsi kanye nemandla kute unakekele imoto yawo, futsi uyishayela ngebudlabha. Lemoto yawo iyephuka futsi bagcine bangasayisebentisi. Libe kuphi liphutsa kulomndeni wesibili—libe semotweni yini nobe libe kubanikati bayo? Kuyacaca kutsi banikati ngibo lababe yimbangela yalomonakalo.

Ngendlela lefananako, liciniso lekutsi imishado leminyenti ayiphumeleli alisho kutsi luhlelo lwemshado ngilo lelineliphutsa. Tigidzi temishado lephumelelako tibufakazi baloku. Imishado lenjalo yenta kube nenjabulo kanye nekuhleleka kubantfu labashadile, emindenini, kanye nasemimangweni. Nanobe kunjalo, njengemoto, umshado udzinga kunakekelwa kahle kanye nekulungiswa kute uphumelele.

Ngisho nobe umshado wakho unemalanga lambalwa nobe unemashumi eminyaka ukhona, seluleko seliBhayibheli sendlela yekuwunakekela kanye nekuwucinisa siyasebenta. Naka tibonelo taloku emakhasini lalandzelako.

[Umbhalo longentansi]