Yemukela Umoya WaNkulunkulu, Hhayi Welive

‘Asikanikwa wona umoya welive; kepha sinikwe umoya lovela kuNkulunkulu, khona sitewukwati lesikuphiwe nguNkulunkulu ngemusa wakhe.’—1 KHOR. 2:12.

1, 2. (a) EmaKhristu eliciniso asemphini ngamuphi umcondvo? (b) Ngumiphi imibuto lesitawucoca ngayo?

 EMAKHRISTU eliciniso asemphini! Sitsa setfu sinemandla, sinebucili, futsi sinelikhono lekulwa. Sinesikhali lesisisebentisako lesibulale bantfu labanyenti ngaso. Nanobe kunjalo, akukafaneli sitive shengatsi site emandla nobe kutsi sitawehlulwa. (Isa. 41:10) Tsine sinesivikelo lesicinile futsi lesingeke sehlulwe.

² Imphi yetfu akusiyo lengekwenyama kodvwa yakamoya. Sitsa setfu nguSathane Develi, futsi sikhali sakhe lesiyinhloko lasisebentisako ‘ngumoya welive.’ (1 Khor. 2:12) Sivikelo setfu lesiyinhloko lesimelene nekuhlasela kwakhe, ngumoya waNkulunkulu. Kute sisindze kulemphi futsi sihlale sivutsa ngekwakamoya, kudzingeka sicele umoya waNkulunkulu bese siveta titselo tawo ekuphileni kwetfu. (Gal. 5:22, 23) Ngako-ke, uyini umoya welive, futsi kungani uyingoti kangaka? Singabona ngani kutsi umoya welive uyasilawula? Yini lesingayifundza kuJesu ngekwemukela umoya waNkulunkulu kanye nekumelana nemoya welive?

Kungani Umoya Welive Wandze Kangaka?

3. Uyini umoya welive?

³ Umoya welive uvela kuSathane, “umbusi walelive,” futsi umelene nemoya longcwele waNkulunkulu. (Joh. 12:31; 14:30; 1 Joh. 5:19) Usifiso salelive lesinemandla futsi ulawula bantfu. Lomoya lonemandla wenta bantfu baphikisane nentsandvo yaNkulunkulu kanye nenjongo yakhe.

4, 5. Kungani lomoya lokhutsatwa nguSathane wandze kangaka?

⁴ Kungani lomoya lokhutsatwa nguSathane wandze kangaka? Kwekucala, Sathane wakhohlisa Eva ensimini yase-Edeni. Wamcinisekisa ngekutsi kutehlukanisa naNkulunkulu bekutawutfutfukisa imphilo yakhe. (Gen. 3:13) Wativeta angumcambimanga lomkhulu! (Joh. 8:44) Ngemvakwaloko, wasebentisa umfati kute ente Adamu angamlaleli Jehova. Ngesizatfu saloko Adamu lakukhetsa, bantfu baba nesono, futsi umphumela waloko waba kutsi balandzele umoya waSathane wekungalaleli.—Fundza Efesu 2:1-3.

⁵ Sathane waphindze wayenga netingilosi letinyenti, letagcine tingemadimoni. (Semb. 12:3, 4) Lokungetsembeki kuNkulunkulu kwenteka ngembikwaZamcolo wangesikhatsi saNowa. Letingilosi betetsemba kutsi betitawuphila kahle natishiya tikhundla tato ezulwini bese tilandzela  tifiso letingasito temvelo emhlabeni ngekukhululeka. (Juda 6) Ngelusito lwalamadimoni, nyalo lasaphindze aba ngumoya, Sathane ‘ukhohlisa umhlaba wonkhe.’ (Semb. 12:9) Lokuvisa buhlungu kutsi linyenti lebantfu alikuboni kudukisa kwemadimoni.—2 Khor. 4:4.

Uyakulawula Yini Umoya Welive?

6. Kunini lapho umoya walelive ungasihunga khona?

⁶ Bantfu labanyenti abatiboni tindlela Sathane ladukisa ngato. Nanobe kunjalo, asikho sidzingo sekutsi emaKhristu eliciniso angawanaki emachinga akhe. (2 Khor. 2:11) Ecinisweni, umoya welive angeke usihunge nangabe singawuvumeli kutsi wente njalo. Asesihlole imibuto lemine letawusisita sibone kutsi silawulwa ngumoya waNkulunkulu yini nobe ngulowo walelive.

7. Nguyiphi lenye indlela Sathane letama kusehlukanisa ngayo naJehova?

⁷ Luhlobo lwekutijabulisa lengilukhetsako luvetani ngami? (Fundza Jakobe 3:14-18.) Sathane wetama kusehlukanisa naNkulunkulu ngekutsi asente sitsandze budlova. Develi uyati kutsi Jehova uyabatondza bantfu labatsandza budlova. (Hla. 11:5) Ngako-ke, wetama kusebentisa tincwadzi, emabhayisikobho, umculo kanye nemidlalo yema-video—leminye yayo leveta bantfu labalingisa kutiphatsa lokubi kanye nebudlova, kute ente letintfo titsandzeke etinkhanukweni tetfu tenyama. Sathane akanendzaba nangabe incenye yenhlitiyo yetfu itsandza lokulungile, kuphela nje nangabe lena lenye itsandza lokungakalungi, lokutintfo latigcugcutelako.—Hla. 97:10.

8, 9. Ngumiphi imibuto lemayelana nekutijabulisa lokufanele sitibute yona?

⁸ Ngakulokunye, umoya waNkulunkulu wenta labo labawemukele kutsi babe msulwa, babe nekuthula, futsi baphuphume umusa. Sitawube senta kahle ngekutibuta: ‘Luhlobo lwekutijabulisa lengilukhetsako lungenta ngibe netimfanelo letinhle yini?’ Kuhlakanipha lokuvela kuNkulunkulu ‘akutentisi.’ Labo labanemoya waNkulunkulu abashumayeli ngekutiphatsa kahle kanye nekuba nekuthula kubomakhelwane babo, babe bona bajatjuliswa kubukela budlova kanye nekutiphatsa lokubi ngansense emakhaya abo.

⁹ Jehova ulindzele kutsi sitinikele kuye kuphela. Nanobe kunjalo, Sathane ufuna kutsi sente sento lesisodvwa sekumkhonta, njengobe enta njalo nakuJesu. (Luk. 4:7, 8) Singase sitibute: ‘Luhlobo lwekutijabulisa lengilukhetsako luyangenta yini ngitinikele kuNkulunkulu kuphela? Kutijabulisa lengikukhetsako kwenta kube melula yini nobe kube matima ngami kutsi ngimelane nemoya walelive? Esikhatsini lesitako, kufanele ngiyishintje yini indlela lengikhetsa ngayo tekutijabulisa?’

10, 11. (a) Ngusiphi simo sengcondvo umoya walelive lositfutfukisako mayelana nemcebo? (b) LiVi laNkulunkulu leliphefumulelwe ngumoya likhutsata siphi simo sengcondvo?

¹⁰ Sinjani simo sami sengcondvo mayelana nemcebo? (Fundza Lukha 18:24-30.) Umoya walelive utfutfukisa ‘inkhanuko yemehlo,’ ngobe ukhutsata kuba bukhali kanye nekutsandza umcebo. (1 Joh. 2:16) Lomoya wenta bantfu labanyenti bafune kunjinga. (1 Thim. 6:9, 10) Ungasenta sicabange kutsi kuba nemcebo lomnyenti kutawusiniketa kulondzeka lokuhlala njalo. (Taga 18:11) Nanobe kunjalo, nangabe sesicale kutsandza imali kwendlula Nkulunkulu, kutawusho kutsi Sathane sewusincobile. Kufanele sitibute: ‘Ekuphileni kwami senginaka kakhulu umcebo kanye nekutijabulisa yini?’

¹¹ Ngalokwehlukile, liVi laNkulunkulu leliphefumulelwe ngumoya lisikhutsata kutsi sibe nembono lofanele ngemali, futsi sisebente kamatima kute sinakekele tidzingo tetfu tenyama kanye netemindeni yetfu. (1 Thim. 5:8) Umoya waNkulunkulu usita labo labawemukelako kutsi balingise buntfu bakhe bekuba ngulophanako. Ngesizatfu saloko, batiwa njengalabaphanako hhayi labemukelako. Batsandza bantfu kwendlula umcebo, futsi ngekujabula baphana ngetintfo labanato nangabe bakwati kwenta njalo. (Taga 3:27, 28) Abavumi kutsi kutsandza imali kube ngiko lokuta kucala kunekukhonta Nkulunkulu.

12, 13. Ngalokungafanani nemoya welive, umoya waNkulunkulu ungasisita njani kute sizuze?

 ¹² Buntfu bami buveta kutsi ngilawulwa ngumuphi umoya? (Fundza Kholose 3:8-10, 13.) Umoya welive ukhutsata imisebenti yenyama. (Gal. 5:19-21) Sikhatsi lapho sivivinyeka khona kutsi ngumuphi umoya losilawulako, kulapho tintfo tingahambi kahle khona, hhayi nangabe tihamba kahle, njengalapho umzalwane nobe dzadze angasinaki, asiphatsa kabi, nobe asona. Ngetulu kwaloko, nasisodvwa emakhaya etfu, kungase kubonakale kahle kutsi ngumuphi umoya losilawulako. Kubalulekile kutsi sitihlole. Tibute: ‘Kuletinyanga letisitfupha letengcile, buntfu bami sebufanana nebaKhristu yini, nobe sengibuyele emikhubeni yami lemibi yekukhuluma neyekutiphatsa?’

¹³ Umoya waNkulunkulu ungasisita ‘sikhumule buntfu lobudzala nesimilo sakucala,’ bese sembatsa ‘buntfu lobusha.’ Kwenta kanjalo kutawusisita sibe nelutsandvo kanye nemusa lomkhulu. Sitawutimisela kutsetselelana ngekukhululeka, ngisho nalapho sinesizatfu lesivakalako sekukhonona. Nangabe soniwe, angeke sisasabela ngelivi ‘lelibabako, lelulaka, lekutfukutsela, lemsindvo, nelekuhlambalata.’ Kunaloko, sitawutimisela kutsi sibe ‘ngulabahawukelanako.’—Ef. 4:31, 32.

14. Bantfu labanyenti balitsatsa njani liVi laNkulunkulu?

¹⁴ Ngiyatihlonipha futsi ngiyatitsandza yini timiso teliBhayibheli tekutiphatsa? (Fundza Taga 3:5, 6.) Umoya walelive wenta bantfu bavukele liVi laNkulunkulu. Labo labahungwe ngulomoya abatinaki tincenye teliBhayibheli labatsi kumatima kuticondza, banconota emasiko kanye nemafilosofi ebantfu. (2 Thim. 4:3, 4) Labanye abanendzaba nalo lonkhe liBhayibheli. Bangabata kusebenta kanye nekunemba kwalo, futsi kanjalo baba ngulabahlakaniphile emehlweni abo. Babukela phansi timiso talo letihlantekile letimayelana nekuphinga, bunkonkoni, kanye nedivosi. Bafundzisa kutsi ‘lokubi kuhle, nalokuhle kubi.’ (Isa. 5:20) Sewusihungile yini natsi lomoya? Nasihlangabetana netinkinga, setsembela ekuhlakanipheni kwebantfu yini, ngisho nasemibonweni yetfu? Siyetama yini kulalela seluleko seliBhayibheli?

15. Kunekutsi setsembele ekuhlakanipheni kwetfu, yini lokufanele siyente?

¹⁵ Umoya waNkulunkulu usenta silihloniphe liBhayibheli. Njengemhlabeli, sitsatsa livi laNkulunkulu njengalelisibane etinyaweni tetfu kanye nekukhanya endleleni yetfu. (Hla. 119:105) Kunekutsi setsembele ekuhlakanipheni kwetfu, ngesibindzi setsembela eVini laNkulunkulu kute lisisite sehlukanise lokuhle nalokubi. Asigcini ngekufundza kuhlonipha liBhayibheli, kodvwa sifundza nekutsandza umtsetfo waNkulunkulu.—Hla. 119:97.

Fundza Esibonelweni SaJesu

16. Kuhlanganisani kuba ‘nemcondvo waKhristu’?

¹⁶ Kute sitfole umoya waNkulunkulu, kufanele  sibe ‘nemcondvo waKhristu.’ (1 Khor. 2:16) Kute sibe ‘nesimo sengcondvo lesifanana naleso Khristu Jesu labenaso’ kufanele sati indlela labecabanga futsi enta ngayo, bese siyamlingisa. (Rom. 15:5, NW; 1 Phet. 2:21) Cabanga ngaletinye tindlela lesingakwenta ngato loku.

17, 18. (a) Yini lesiyifundza kuJesu mayelana nemthandazo? (b) Kungani kufanele sichubeke ‘sicela’?

¹⁷ Thandazela umoya waNkulunkulu. Ngembikwekutsi ahlangabetane neluvivinyo, Jesu wathandazela kutsi umoya waNkulunkulu umsite. (Luk. 22:40, 41) Natsi kufanele sicele kutsi Nkulunkulu asinike umoya wakhe longcwele. Jehova ubapha ngekukhululeka nangemusa bonkhe labawucela ngekukholwa. (Luk. 11:13) Jesu watsi: “Celani, nitawuphiwa; funani, nitakutfola; nconcotsani, nitakuvulelwa. Ngobe wonkhe locelako uyakuphiwa, nalofunako uyatfola, nalonconcotsako uyavulelwa.”—Mat. 7:7, 8.

¹⁸ Nawufuna umoya waJehova kanye nelusito lwakhe, ungayekeli kumcela. Kungase kudzingeke sithandaze tikhatsi letinyenti futsi sicinisele emthandazweni. Ngaletinye tikhatsi, Jehova uye avumele kutsi labo labamcelako bavete kutsi bakhatsateke kangakanani kanye nekutsi kukholwa kwabo kucotfo yini, ngembikwekutsi aphendvule imithandazo yabo. a

19. Yini Jesu labehlale ayenta, futsi kungani kufanele simlingise?

¹⁹ Lalela Jehova ngalokuphelele. Jesu abehlale enta tintfo letijabulisa Babe wakhe. Ngalesinye sikhatsi, sifiso saJesu mayelana nendlela yekuhlangabetana nesimo lesitsite sasehlukile kuloko lobekufunwa nguBabe wakhe. Nanobe kunjalo, ngekuciniseka watsi kuBabe wakhe: “Noko, kungabi ngentsandvo yami, kodvwa akwenteke intsandvo yakho.” (Luk. 22:42) Tibute: ‘Ngiyamlalela yini Nkulunkulu ngisho nalapho kwenta kanjalo kumatima?’ Kulalela Nkulunkulu kubalulekile kute siphile. Njengobe anguMenti wetfu, uMtfombo wekuphila kanye neMlondvoloti wako, simkweleta kumlalela ngalokuphelele. (Hla. 95:6, 7) Kute intfo lengatsatsa indzawo yekulalela. Nkulunkulu angeke asemukele nasingalaleli.

20. Yini Jesu labeyinake kakhulu ekuphileni kwakhe, futsi singamlingisa njani?

²⁰ Lati kahle liBhayibheli. Ngesikhatsi Jesu amelana nekuhlasela kwaSathane lokucondzile kwekukholwa kwakhe, wacaphuna imiBhalo. (Luk. 4:1-13) Ngesikhatsi akhuluma nebaphikisi benkholo, Jesu wasebentisa liVi laNkulunkulu njengaleliligunya lakhe. (Mat. 15:3-6) Ekuphileni kwakhe konkhe, Jesu abenake kakhulu kwati kanye nekugcwalisa umtsetfo waNkulunkulu. (Mat. 5:17) Natsi kufanele sichubeke sondla tingcondvo tetfu ngeliVi laNkulunkulu lelicinisa kukholwa. (Fil. 4:8, 9) Kutfola sikhatsi sekwenta sifundvo lesitichubela sona kanye nesemndeni kungaba yinsayeya kulabanye betfu. Ngako-ke, kunekutsi sitfole sikhatsi, kungase kudzingeke kutsi sisakhe leso sikhatsi.—Ef. 5:15-17.

21. Nguluphi luhlelo lesingalusebentisa kute sati liVi laNkulunkulu kancono futsi silisebentise?

²¹ ‘Sisebenti lesetsembekile nalesihlakaniphile’ siye sasisita kutsi sibe nesikhatsi sekwenta sifundvo lesitichubela sona kanye nesemndeni, ngekuhlela kutsi kube nebusuku bekuKhonta Kwemndeni maviki onkhe. (Mat. 24:45) Ulusebentisa ngekuhlakanipha yini loluhlelo? Kute ukwati kutfola umcondvo waKhristu, ungakuhlolisisa yini loko Jesu lakufundzisa ngetindzaba letehlukehlukene nawutichubela sifundvo sakho? Ungasebentisa i-“Watch Tower Publications Index” kute utfole kwatiswa lokumayelana nendzaba lofuna kufundza  ngayo. Nasi sibonelo: Kusukela nga-2008 kuya ku-2010, Sicongosekulindza lesihanjiswako siye saba netihloko letingu-12 letitsi “Lokho Esikufunda KuJesu,” ngesiZulu. Ungase utisebentise letihloko esifundvweni sakho. Kusukela nga-2006, i-“Phaphama!” beyiba nesihloko lesitsi “Ubungaphendula Kanjani?” ngesiZulu. Lemibuto lekulesihloko yentelwe kutsi ikusite wandzise futsi ujulise lwati lwakho ngeliVi laNkulunkulu. Kungaba njani kutsi ngaletinye tikhatsi nisebentise kwatiswa lokusetihlokweni letinjalo eluhlelweni lwenu lwekuKhonta Kwemndeni?

Singalincoba Lelive

22, 23. Yini lokufanele siyente kute sincobe lelive?

²² Kute sicondziswe ngumoya waNkulunkulu, kufanele simelane nemoya welive. Kumelana nawo akusimelula. Kungase kudzinge kutsi silwe kamatima. (Juda 3) Nanobe kunjalo, singaphumelela! Jesu watsi kubafundzi bakhe: “Eveni niyawuhlupheka nibe nelusizi. Kodvwa manini sibindzi, ngobe mine ngilincobile live.”—Johane 16:33.

²³ Natsi singalincoba lelive nangabe simelana nemoya walo futsi senta konkhe lokusemandleni etfu kute semukele umoya waNkulunkulu. Ecinisweni, “nangabe Nkulunkulu angakitsi ngubani longamelana natsi?” (Rom. 8:31) Ngekwemukela umoya waNkulunkulu nangekulandzela ticondziso tawo njengobe tivetwe eBhayibhelini, singatfola kwenetiseka, kuthula, injabulo, kanye nesicinisekiso sekuphila lokuphakadze emhlabeni lomusha losedvute.

[Umbhalo longentansi]

Usakhumbula?

• Kungani umoya welive ugcwele kangaka?

• Ngumiphi imibuto lemine lokufanele sitibute yona?

• Ngutiphi tintfo letintsatfu lesitifundza kuJesu mayelana nekwemukela umoya waNkulunkulu?

[Imibuto Yesihloko Lesifundvwako]

[Sitfombe ekhasini 10]

Kwenteka kanjani kutsi letinye tingilosi tibe ngemadimoni?

[Sitfombe ekhasini 12]

Sathane usebentisa umoya welive kute alawule bantfu, kodvwa singakwati kuwuncoba