Hlalani ‘Nilindzile’ Njengemindeni YemaKhristu

“Kufanele silindze sizitse.”—1 THES. 5:6.

1, 2. Yini ledzingekako emndenini kute uhlale ulindzile ngekwakamoya?

 AKHULUMA ‘ngelilanga laSimakadze lelikhulu nalelesabekako,’ umphostoli Pawula wabhalela emaKhristu aseThesalonika: “Kodvwa nine, bazalwane, anikho ebumnyameni, anikafaneli kutunywa ngulelo langa njengekutunywa lisela. Nine nonkhe ningemadvodzana ekukhanya nemadvodzana emini; asisibo bebusuku nebebumnyama.” Wachubeka watsi: “Ngako-ke, asingalali njengalabanye; kufanele silindze sizitse.”—Jow. 2:31; 1 Thes. 5:4-6.

² Seluleko Pawula lasibhalela baseThesalonika siyasebenta nakumaKhristu laphila ‘kulesikhatsi sekugcina.’ (Dan. 12:4) Njengobe kuphela kwalelive lelibi kusondzela, Sathane utimisele kwenta tikhonti teliciniso letinyenti kutsi tiyekele kukhonta Nkulunkulu. Ngako-ke, sitawube sihlakaniphile nasilalela leseluleko saPawula sekuhlala sicaphele ngekwakamoya. Kute umndeni wemaKhristu uhlale ulindzile, kubalulekile kutsi lilunga ngalinye lifeze umtfwalo walo lovetwe emiBhalweni. Nguyiphi-ke indzima lengadlalwa ngemadvodza, bafati, kanye nebantfwana kute imindeni yabo ihlale ‘ilindzile’?

Madvodza—Lingisani ‘UMelusi Lomuhle’

3. Ngekusho kwa-1 Thimothi 5:8, ihlanganisani indzima yendvodza njengenhloko yemndeni?

³ LiBhayibheli litsi ‘inhloko yemfati yindvodza.’ (1 Khor. 11:3) Ihlanganisani indzima yendvodza njengenhloko yemndeni? Nayichaza lesinye sici sebunhloko, imiBhalo itsi: “Kepha nangabe umuntfu anganakekeli tihlobo takhe, ikakhulu umndeni wakhe, sewukulahlile kukholwa; futsi loko kwenta kwakhe kubi kakhulu kunekwemuntfu longakholwa.” (1 Thim. 5:8) Indvodza kufanele yondle umndeni wayo. Kodvwa-ke, nangabe ifuna kusita umndeni wayo kutsi uhlale ulindzile ngekwakamoya, kufanele yente lokungetulu kwekutfola imali yekuwondla. Kufanele iwakhe ngekwakamoya, isite onkhe emalunga emndeni wayo kutsi acinise buhlobo bawo naNkulunkulu. (Taga 24:3, 4) Ingakwenta njani loku?

4. Yini lengasita indvodza kutsi iphumelele ekwakheni umndeni wayo ngekwakamoya?

⁴ Njengobe ‘indvodza iyinhloko yemfati futsi naKhristu ayinhloko yelibandla,’ indvodza leshadile kufanele ihlolisise futsi ilingise indlela Jesu lasebentisa ngayo bunhloko ebandleni. (Ef. 5:23) Cabanga ngendlela Jesu lachaza ngayo buhlobo labenabo nebalandzeli bakhe. (Fundza Johane 10:14, 15.) Yini lengasita indvodza kutsi iphumelele ekwakheni umndeni wayo ngekwakamoya? Kufundza ngaloko Jesu lakusho futsi wakwenta ‘njengemelusi lomuhle,’ bese ‘ilandzela etinyatselweni takhe.’—1 Phet. 2:21.

5. Nguluphi lwati uMelusi Lomuhle lanalo ngelibandla?

⁵ Buhlobo bemelusi kanye netimvu busekelwe elwatini nasekwetsembaneni. Umelusi uyatati timvu takhe, kantsi nato tiyamati futsi tiyametsemba. Tiyalati livi lakhe futsi tiyalilalela. Jesu watsi: “Ngiyatati timvu tami, nato futsi tiyangati.” Jesu ute lwati lolukha etulu ngelibandla. Ligama lesiGriki lelitsi ‘kwati’ lisho “kwati kahle, nobe ngalokusedvute.” UMelusi Lomuhle utati kahle timvu takhe. Wati tidzingo, butsakatsaka, kanye nemandla emvu ngayinye. Kute Jesu langakwati ngetimvu takhe.  Netimvu takhe timati kahle njengemelusi wato futsi tiyametsemba.

6. Emadvodza angamlingisa njani uMelusi Lomuhle?

⁶ Kute ilingise bunhloko baKhristu, indvodza kufanele iticabange njengemelusi bese kutsi emalunga emndeni wayo iwacabange njengetimvu. Kufanele ilwele kuwati kahle umndeni wayo. Indvodza ingakhona yini kuba nalolo lwati? Ingaba nalo, kuphela nangabe ikhulumisana kahle nawo onkhe emalunga emndeni wayo, ilalela tikhalo tawo, ihola emisebentini yasekhaya, futsi icikelela kutsi yenta tincumo letifanele letitsintsa kukhonta kwemndeni, kuya emihlanganweni, kushumayela, kanye nekutijabulisa. Nangabe indvodza lengumKhristu ihola ngelwati, hhayi lweliVi laNkulunkulu kuphela, kodvwa nangekwati emalunga emndeni wayo, lawo malunga atawuyetsemba. Itawuphindze ijabule ngekubona umndeni wayo ubumbene ekukhonteni Nkulunkulu.

7, 8. Indvodza ingamlingisa njani uMelusi Lomuhle ekutsandzeni umndeni wayo?

⁷ Umelusi lomuhle uyatitsandza timvu takhe. Nasifundza emaVangeli lakhuluma ngemphilo kanye nenkonzo yaJesu, tinhlitiyo tetfu tigcwala kubonga ngelutsandvo Jesu lalukhombisa bafundzi bakhe. Wate “wanikela ngekuphila kwakhe ngenca” yelibandla. Emadvodza kufanele alingise Jesu ngekutsandza imindeni yawo. Kunekutsi ikhahlamete umfati wayo, indvodza lefuna kwemukelwa nguNkulunkulu ngaso sonkhe sikhatsi iyamtsandza umfati wayo “njengobe naKhristu alitsandza libandla.” (Ef. 5:25) Emavi ayo kufanele abe nemusa futsi akhombise kucabangela, ngobe umfati ufanelwe yinhlonipho.—1 Phet. 3:7.

⁸ Nayicecesha bantfwana, inhloko yemndeni kufanele inamatselisise etimisweni taNkulunkulu. Nanobe kunjalo, kufanele ibakhombise lutsandvo. Nangabe kudzingeka ibayale, loko kufanele ikwente ngelutsandvo. Labanye bantfwana bangatsatsa sikhatsi kunalabanye kwati kutsi yini lelindzeleke kubo. Esimeni lesinjalo, babe kufanele ababeketelele kakhulu. Nangabe emadvodza alandzela sibonelo saJesu ngaso sonkhe sikhatsi, kuba nekuphepha kanye nekulondzeka ekhaya. Imindeni yawo ijabulela kulondzeka kwakamoya, loko umhlabeli lahlabela ngako.—Fundza Tihlabelelo 23:1-6.

9. NjengaNowa, emadvodza langemaKhristu anamuphi umtfwalo, futsi yini letawasita kutsi awufeze?

⁹ Nowa waphila ngesikhatsi sekuphela kwelive langesikhatsi sakhe. Nanobe kunjalo, Jehova “wamlondvolota  . . . kanye nalabanye lababesikhombisa, ngesikhatsi aletsa zamcolo emhlabeni walababengamesabi.” (2 Phet. 2:5) Nowa abenemtfwalo wekusita umndeni wakhe kutsi nawo usindze kuZamcolo. Tinhloko temindeni yemaKhristu nato tinemtfwalo lofananako kulamalanga ekugcina. (Mat. 24:37) Kubaluleke kakhulu kutsi tifundze esibonelweni ‘semelusi lomuhle’ futsi tilwele kusilingisa.

Bafati—‘Yakhani Imiti Yenu’

10. Kusho kutsini ngemfati kutfobela indvodza yakhe?

¹⁰ Umphostoli Pawula wabhala: “Bafati, tfobelani emadvodza enu kungatsi kuseNkhosini.” (Ef. 5:22) Lamavi awakhulumi ngesikhundla lesingakahlonipheki. Ngembikwekutsi adale Eva, umfati wekucala, Nkulunkulu weliciniso watsi: “Akukuhle kutsi umuntfu ahlale yedvwana. Ngitamentela umsiti lolungele yena,” abe ngumphelelisi wakhe. (Gen. 2:18) Kuba ‘ngumsiti’ kanye nemphelelisi—lokusho kusekela indvodza yakho njengobe inakekela tidzingo temndeni—kusikhundla lesihlonipheke mbamba.

11. Umfati losibonelo ‘uwakha ngayiphi indlela umuti wakhe’?

¹¹ Umfati losibonelo usebenta kamatima kute kuzuze umndeni wakhe. (Fundza Taga 14:1.) Ngekungafanani nemfati losilima, longabuhloniphi bunhloko, umfati lohlakaniphile uyaluhlonipha loluhlelo. Kunekutsi abe nesimo sengcondvo sekungalaleli kanye nesekutibusa lesigcwele kulelive, uyatitfoba endvodzeni yakhe. (Ef. 2:2) Umfati losilima  ukhuluma kabi ngendvodza yakhe, kantsi lohlakaniphile ulwela kwenta bantfwana kanye nalabanye bantfu kutsi bayihloniphe. Umfati lonjalo uyakubalekela kububukela phansi bunhloko bendvodza yakhe, ngekuhlala abelesela nobe acabana nayo. Lenye intfo lebaluleke kakhulu kuba ngulowongako. Umfati losilima uyayisaphata imali yemndeni lesetjentelwe kamatima. Kodvwa umfati losekela indvodza yakhe akenti kanjalo. Ubambisana nayo etindzabeni tetimali. Wenta tintfo ngekucabangisisa futsi uyonga. Akayicindzeteli indvodza yakhe kutsi isebente ema-awa lamanyenti.

12. Umfati angentani kute asite umndeni wakhe uhlale ‘ulindzile’?

¹² Umfati losibonelo usita umndeni wakhe kutsi uhlale ‘ulindzile,’ ngekusekela indvodza yakhe ekufundziseni bantfwana ngetintfo takamoya. (Taga 1:8) Ukusekela ngekutimisela Kukhonta Kwemndeni. Ngetulu kwaloko, uyayisekela indvodza yakhe nayeluleka nobe iyala bantfwana babo. Wehluke kakhulu emfatini longabambisani nendvodza yakhe, lonebantfwana labalambako ngekwenyama nangekwakamoya.

13. Kungani kubalulekile kutsi umfati ayisekele indvodza yakhe nayenta imisebenti yelibandla?

¹³ Umfati loyisekelako indvodza yakhe utiva njani nakayibona isebenta ngekutimisela ebandleni lebuKhristu? Uyajabula! Ngisho nobe indvodza yakhe iyinceku lesebentako, lomdzala, lilunga leKomidi Yekubonisana Netibhedlela nobe leKomidi Yekwakhiwa KwemaHholwa EMbuso, lomfati uyajabula ngesizatfu semisebenti leyentako. Kute ayisekele ngekutimisela indvodza yakhe, ngemavi kanye nangetento, kutawudzingeka kutsi atidzele. Nangetulu kwaloko, uyacaphela kutsi kuhlanganyela kwendvodza yakhe emisebentini yelibandla kusita wonkhe umndeni kutsi uhlale ulindzile ngekwakamoya.

14. (a) Yini lengase ibekele umfati loyisekelako indvodza yakhe insayeya, futsi angakuncoba njani loku? (b) Umfati uyitfutfukisa ngayiphi indlela inhlalakahle yawo wonkhe umndeni?

¹⁴ Kuba sibonelo endzabeni yekusekela kuba yinsayeya nangabe indvodza yenta tincumo umfati langavumelani nato. Ngisho nalapho, umfati uveta ‘umoya lomnene nalonekuthula’ futsi ubambisana nendvodza yakhe kute ente tincumo tayo tiphumelele. (1 Phet. 3:4) Umfati lomuhle wetama kulandzela sibonelo lesihle sebafati basendvulo labebesaba Nkulunkulu, njengaSara, Ruthe, Abigayili, kanye naMariya, make waJesu. (1 Phet. 3:5, 6) Ulingisa nesibonelo sebafati lasebakhulile basesikhatsini setfu ‘labanesimilo.’ (Thit. 2:3, 4) Ngekutsandza indvodza yakhe kanye nangekuyihlonipha, umfati losibonelo utfutfukisa kuthula emshadweni wakhe futsi wenta wonkhe umndeni ujabule. Likhaya lakhe liba yindzawo yentfokoto kanye nekulondzeka. Endvodzeni letsandza futsi lesebentela Jehova, umfati lonjalo uligugu lelikhulu!—Taga 18:22.

 Bantfu Labasha—‘Bhekani Tintfo Letingabonakali’

15. Labasha bangabambisana njani nebatali babo kute umndeni uhlale ‘ulindzile’?

¹⁵ Nine labasha, ningabambisana njani nebatali benu kute umndeni wenu uhlale ‘ulindzile’ ngekwakamoya? Cabangani ngemvuzo Jehova lanigcinele wona. Mhlawumbe kusukela nisebancane batali benu bebanikhombisa imifanekiso yeliPharadisi. Njengobe nikhula, kungenteka kutsi basebentisa liBhayibheli kanye netincwadzi tebuKhristu kute banisite nibone ngeliso lengcondvo kutsi kuphila lokuphakadze kutawube kunjani emhlabeni lomusha. Kugcina emehlo enu anake kakhulu umsebenti waJehova kanye nekuhlela kuphila kwenu ngendlela lefanele, kutawunisita nihlale ‘nilindzile.’

16, 17. Bantfu labasha bangentani kute bakwati kugijima umncintiswane wekuphila ngemphumelelo?

¹⁶ Naka emavi emphostoli Pawula latfolakala ku-1 Khorinte 9:24. (Fundza.) Gijima umncintiswane wekuphila unenjongo yekuncoba. Khetsa indlela letawukwenta utfole umklomelo wekuphila lokuphakadze. Bantfu labanyenti baye bavumela kutsandza umcebo kwabenta bangasawagcini emehlo abo emklomelweni. Kwenta kanjalo kubulima lobukhulu! Kuphishanekela umcebo akuyiletsi injabulo yeliciniso. Tintfo letitsengwa yimali tesikhashana. Ngako-ke, wena naka ‘tintfo letingabonakali.’ Kungani kufanele wente kanjalo? Ngobe “loko lokungabonakali kwaphakadze.”—2 Khor. 4:18.

¹⁷ ‘Tintfo letingabonakali’ tihlanganisa tibusiso letitawuletfwa nguMbuso. Phila ngendlela letawukwenta utitfole. Injabulo sibili itfolakala ngekwenta umsebenti waJehova. Kukhonta Nkulunkulu weliciniso kuvula ematfuba ekutsi ufinyelele imigomo yesikhashana kanye naleyo lechubekako. a Kutibekela imigomo longakwati kuyifinyelela kungakusita uhlale ucaphele kute ukhonte Nkulunkulu unembono wekutfola umklomelo wekuphila lokuphakadze.—1 Joh. 2:17.

18, 19. Umuntfu lomusha angabona njani kutsi sewulentile liciniso laba lakhe?

¹⁸ Nine labasha, sinyatselo sekucala sekuhamba endleleni leyisa ekuphileni kwenta liciniso libe lenu. Sewusitsatsile yini leso sinyatselo? Tibute: ‘Nginebuhlobo lobuhle yini naNkulunkulu, nobe ngetsembele kubatali bami kute ngihlanganyele emisebentini yakamoya? Ngiyativeta yini timfanelo letingenta ngijabulise Nkulunkulu? Ngiyatimisela yini kutsi nginamatsele eluhlelweni lwami lwekuhlanganyela emisebentini lehlobene nekukhonta kweliciniso, njengekuthandaza njalo, kutadisha, kuba khona emihlanganweni, kanye nekuya ensimini? Ngiyasondzelana yini naNkulunkulu ngekutsi ngikhulise buhlobo bami naye?’—Jak. 4:8.

¹⁹ Cabanga ngesibonelo saMosi. Nanobe abefundziswe emasiko alesinye sive, wakhetsa kwatiwa njengesikhonti saJehova kunekutsi atiwe njengendvodzana yendvodzakati yaFaro. (Fundza Hebheru 11:24-27.) Nine labasha labangemaKhristu, nani kufanele nitimisele kukhonta Jehova ngekwetsembeka. Ngekwenta kanjalo, nitawutfola injabulo yeliciniso, kuphila lokujabulisako, kanye nelitsemba  ‘lekunamatsela ekuphileni lokunguko sibili.’—1 Thim. 6:19.

20. Emncintiswaneni wekuphila, ngubani lotfola umklomelo?

²⁰ Emidlalweni yasendvulo, yingijimi leyodvwa kuphela lebeyincoba umncintiswane. Akusinjalo ngemncintiswane wekuphila. Kuyintsandvo yaNkulunkulu “kutsi bonkhe bantfu basindziswe bafinyelele ekulatini liciniso.” (1 Thim. 2:3, 4) Banyenti bantfu labangembikwakho lasebawugijime ngemphumelelo lomncintiswane, futsi banyenti nalabasawugijima kanye nawe. (Heb. 12:1, 2) Umklomelo utawutfolwa ngibo bonkhe labangapheli emandla. Ngako-ke, timisele kute uphumelele!

21. Yini lokutawucocwa ngayo esihlokweni lesilandzelako?

²¹ ‘Kufika kwelilanga lelikhulu nalelesabekako laJehova’ kutawukwenteka nakanjani. (Mal. 4:5) Lelolanga akukafaneli litfole imindeni yemaKhristu ingakagadzi. Kubalulekile kutsi bonkhe emndenini bayifeze imitfwalo yabo lesemiBhalweni. Yini lenye leningayenta kute nihlale nilindzile ngekwakamoya futsi nicinise nebuhlobo benu naNkulunkulu? Sihloko lesilandzelako sitawucoca ngetici letintsatfu letitsintsa inhlalakahle yakamoya yawo wonkhe umndeni.

[Umbhalo longentansi]

Ufundzeni?

• Kungani kubalulekile kutsi imindeni yemaKhristu ihlale ‘ilindzile’?

• Indvodza ingamlingisa njani uMelusi Lomuhle?

• Umfati losibonelo angentani kute asekele indvodza yakhe?

• Bantfu labasha bangentani kute bente imindeni yabo ihlale ilindzile ngekwakamoya?

[Imibuto Yesihloko Lesifundvwako]

[Emavi lahambisana nesitfombe ekhasini 12]

Umfati loyisekelako indvodza yakhe uligugu lelikhulu kuyo