“Hlalani Nilungele” Njengemindeni YemaKhristu

“Hlalani nilungele, ngobe iNdvodzana yemuntfu iyawufika ngeli-awa leningacabangi kutsi kungaba ngilo.”—LUK. 12:40, NW.

1, 2. Kungani kufanele silalele seluleko saJesu ‘sekuhlala silungele’?

 “INDVODZANA YEMUNTFU nayita ngenkhatimulo yayo” futsi yehlukanisa bantfu “labanye kulabanye,” kutawukwentekani kuwe kanye nangemndeni wakho? (Mat. 25:31, 32) Njengobe loku kutawukwenteka ngeli-awa sonkhe lesingakalilindzeli, kubalulekile kutsi sisinake lesikhutsato saJesu ‘sekuhlala silungele.’—Luk. 12:40.

² Sihloko lesendlulile sivete loko lilunga ngalinye lelingakwenta kute lisite umndeni walo kutsi uhlale ulindzile ngekwakamoya ngekutsatsa umtfwalo walo njengalobalulekile. Asesicoce ngaletinye tindlela lesingalondvolota ngato buhlobo bemndeni wetfu naJehova.

Gcina Liso Lakho ‘Lilula’

3, 4. (a) Yini imindeni yemaKhristu lokufanele iyicaphele? (b) Kusho kutsini kugcina liso letfu ‘lilula’?

³ Kute imindeni ikulungele kufika kwaKhristu, kufanele icaphele kutsi kungabi khona tintfo letiyiphatamisako ekukhonteni kwayo Jehova, futsi nangabe kuba khona tintfo letinjalo, kufanele itibalekele. Njengobe kutsandza umcebo kusilingo lesidukise imindeni leminyenti, cabanga ngaloko Jesu lakusho ngekugcina liso letfu ‘lilula.’ (Fundza Matewu 6:22, 23.) Njengobe nesibani singasikhanyisela  endleleni kute singawi, naloko lesikubukako ‘ngemehlo etfu enhlitiyo’ kungasisita kutsi sitiphatse ngendlela lengeke isibangele kutsi siwe.—Ef. 1:18.

⁴ Kute liso likwati kubona kahle, kufanele libe nguleliphilile futsi likwati kunakisisa intfo leliyibukile. Loku kuyafanana nangemehlo enhlitiyo. Kuba neliso lelilula kusho kunaka intfo leyodvwa kuphela. Kunekutsi siphile imphilo yekuphishanekela umcebo futsi sikhatsateke kakhulu ngekunakekela tidzingo tenyama temindeni yetfu, sigcina liso letfu linake tintfo takamoya. (Mat. 6:33) Loku kusho kutsi kufanele sihlale senetiseka ngaloko lesinako futsi sibeke umsebenti waNkulunkulu kucala ekuphileni kwetfu.—Heb. 13:5.

5. Lenye intfombatana yaveta njani kutsi “liso” layo belinake kakhulu kukhonta Nkulunkulu?

⁵ Imiphumela iba mihle nangabe bantfwana baceceshwa kutsi bagcine liso labo lilula. Asewucabange ngesibonelo salenye intfombatana yaseTopiya. Beyiphumelela kahle esikolweni, kangangekutsi yate yaniketwa nemfundzate wekutfutfukisa imfundvo yayo. Ngesizatfu sekutsi liso layo belinake kakhulu kukhonta Jehova, ayizange iwemukele lomfundzate. Ngekushesha ngemuva kwaloko, yetsenjiswa umsebenti, futsi beyitawuhola imali lengemadola aseMelika langu-4 200 ngenyanga—lokuyimali lenyenti nayicatsaniswa naleyo leholwa ngulabanye eveni lakubo. Nanobe kunjalo, lentfombatana beyifuna kuba lihlahlandlela. Akudzingekanga kutsi ibute batali bayo kutsi iwutsatse yini lomsebenti. Bativa njani batali bayo ngaloko leyakwenta? Bajabula kanye nayo futsi bayitjela kutsi bayatigcabha ngayo.

6, 7. Nguyiphi ingoti lokufanele ‘siyicaphele’?

⁶ Emavi aJesu lakuMatewu 6:22, 23, asecwayisa ngebugovu. Jesu akazange asho umehluko lokhona emkhatsini weligama lelitsi ‘lula’ kanye nalelo leliliphikisako lelitsi ‘lukhuni.’ Kunaloko, waveta umehluko emkhatsini waleligama lelitsi ‘lula’ kanye nalelitsi ‘lokubi.’ ‘Liso lelibi’ ‘linemona,’ lokusho kuba bukhali nobe kuba nebugovu. (Mat. 6:23, umbhalo longentansi we-NW.) Jehova utiva njani ngekuba bukhali kanye nangekuba nebugovu? LiBhayibheli litsi: “Bugwadla nebuphingi, nako konkhe kungcola, nobe kungeneliswa [nobe kuba ‘bukhali’] kungaphatfwa ngisho nangeligama emkhatsini wenu.”—Ef. 5:3; umbhalo longentansi we-NW.

⁷ Nanobe kumelula kubona kutsi labanye banebugovu, kodvwa akusimelula ngemuntfu kutibona kutsi yena unabo yini. Ngako-ke, sitawube senta kahle ngekulalela seluleko saJesu lesitsi: “Caphelani, nikubalekele konkhe kufisa lokubi.” (Luk. 12:15) Kute sente njalo kufanele sitihlole kute sibone loko lokusetinhlitiyweni tetfu. Imindeni yemaKhristu kufanele icabangisise ngesikhatsi kanye nangemali leyicitsa ekutijabuliseni, kanye nasetintfweni talelive.

8. Nasifuna kutsenga intfo letsite, singahlala njani ‘sicaphele’?

⁸ Kutsenga intfo kusho lokungetulu kwekumane nje uncume kutsi unayo yini imali leyenele yekuyitsenga. Kufanele ucabange ngetintfo letifanana naleti: ‘Ngitawuba naso yini sikhatsi sekuyisebentisa kanye nesekuyinakekela? Kutawungitsatsa sikhatsi lesingakanani kufundza kuyisebentisa kahle?’ Bantfu labasha, ningakwetsembi konkhe lokukhangiswa ngulelive ngobe loko kunganenta nifune kuba netintfo letidulako futsi leningatidzingi. Fundzani kutibamba. Phindze ucabange ngendlela kutsenga leto tintfo lokungawuphatamisa ngayo umndeni wakho, bese awusakulungeli kufika kweNdvodzana yemuntfu. Wetsembe emavi aJehova latsi: “Ngingeke ngikuyekele, ngingeke ngikushiye.”—Heb. 13:5.

Phishanekela Imigomo Yakamoya

9. Kuphishanekela imigomo yakamoya kungawusita njani umndeni?

⁹ Lenye yetintfo lengasita emalunga emndeni kutsi acinise kukholwa kwawo futsi atfutfukise buhlobo bawo naJehova, kutsi atibekele imigomo yakamoya futsi etame kuyifinyelela.  Kwenta kanjalo kutawasita abone lizinga latfutfuka ngalo emsebentini waJehova, futsi kutawenta ancume nekutsi ngumiphi imisebenti lokufanele ite kucala kuwo.—Fundza Filiphi 1:10.

10, 11. Ngumiphi imigomo yakamoya leninayo njengemndeni lenetama kuyifinyelela, futsi ngumiphi imigomo yesikhatsi lesitako leningatibekela yona?

¹⁰ Ngisho nekubeka imigomo lemincane lengafinyelelwa nguwo wonkhe umuntfu ekhaya, kungaletsa tinzuzo letinkhulu. Nasi sibonelo: Cabanga ngemgomo wekucoca ngembhalo welusuku malanga onkhe. Timphendvulo letiniketwa ngemalunga emndeni titawusita inhloko ibone kutsi umndeni wayo umtsandza kangakanani Jehova kanye neliciniso. Umgomo wekulifundza njalo liBhayibheli njengemndeni uvula litfuba lelihle lekutsi bantfwana batfutfukise likhono labo lekufundza kanye nelizinga labalicondza ngayo liBhayibheli. (Hla. 1:1, 2) Angeke kube kuhle yini kutsi sitibekele umgomo wekutfutfukisa imithandazo yetfu? Kutfutfukisa lizinga lesitiveta ngalo tici tetitselo temoya kungaba ngumgomo lomuhle lesingatibekela wona. (Gal. 5:22, 23) Ningakwati yini kufuna tindlela tekuveta sihawu kubantfu lenibatfola ensimini? Nanetama kwenta loku njengemndeni, nitawusita bantfwana benu bafundze kuba neluvelo, futsi loku kungabenta babe nesifiso sekukhonta njengemahlahlandlela lavamile nobe titfunywa telivangeli.

¹¹ Kungani ungacabangi ngemigomo leningayifinyelela njengemndeni? Ningatibekela yini umgomo wekucitsa sikhatsi lesengetiwe ensimini? Ningetama yini kuncoba kwesaba kushumayela ngelucingo, emgwacweni, nobe etindzaweni temabhizinisi? Ningakwati yini kushumayela endzaweni lenesidzingo lesikhulu sebamemeteli beMbuso? Lilunga lemndeni wenu lingalufundza yini lolunye lulwimi kute likwati kufakaza kubantfu baletinye tive?

12. Tinhloko temindeni kufanele tenteni kute tisite imindeni yato ikhule ngekwakamoya?

¹² Njengenhloko yemndeni, naka tici umndeni wakho longakhula kuto ngekwakamoya. Ngemuva kwaloko, bekani imigomo letawunenta nifinyelele leyo njongo. Njengemndeni, kufanele nitibekele imigomo lenitawukwati kuyifinyelela futsi levumelana netimo kanye nemakhono enu. (Taga 13:12) Kuliciniso kutsi kulwela kufinyelela imigomo lezuzisako kutsatsa sikhatsi. Ngako-ke, tsengisisani sikhatsi lenisicitsa nibukela i-TV, bese nisisebentisa etintfweni takamoya. (Ef. 5:15, 16) Sebentani kamatima kute nifinyelele imigomo lenitibekele yona njengemndeni. (Gal. 6:9) Umndeni lowetama kufinyelela imigomo yakamoya wenta intfutfuko yawo ‘ibonwe’ ngibo bonkhe bantfu.—1 Thim. 4:15.

Banini NeKukhonta Kwemndeni Kwakusihlwa Ngaso Sonkhe Sikhatsi

13. Nguluphi lushintjo lolwentiwa emihlanganweni yelibandla yamaviki onkhe, futsi ngumiphi imibuto lokufanele sitibute yona?

¹³ Intfo lengayisita kakhulu imindeni kutsi ‘ihlale ikulungele’ kufika kweNdvodzana yemuntfu, lushintjo lwemihlangano yetfu yamaviki onkhe lolwacala nga-January 1, 2009. Sekute sidzingo sekutsi sihlangane kanyenti evikini, ngobe umhlangano lobewubitwa ngekutsi Sifundvo Sencwadzi Selibandla wahlanganiswa neSikolwa Semsebenti WemaKhristu kanye neMhlangano Wemsebenti. Lolushintjo belwentelwe kuniketa imindeni yemaKhristu litfuba lekucinisa buhlobo bayo naJehova ngekutibekela busuku lobubodvwa liviki ngalinye kute ibe nekukhonta kwemndeni. Njengobe sekwendlule sikhatsi lwentiwa lolushintjo, kufanele sitibute: ‘Ngiyasisebentisa yini leso sikhatsi kute ngibe neKukhonta Kwemndeni kwakusihlwa nobe sifundvo lengitichubela sona? Ngikhonile yini kufeza injongo yaloluhlelo?’

14. (a) Nguyiphi injongo leyinhloko yekuba nebusuku beKukhonta Kwemndeni nobe besifundvo lesitichubela sona? (b) Kungani kubekela eceleni busuku bekutadisha kubalulekile?

¹⁴ Injongo leyinhloko yekuba neKukhonta  Kwemndeni kwakusihlwa nobe sifundvo lotichubela sona, kusisita kutsi sisondzele edvute kuNkulunkulu. (Jak. 4:8) Nasicitsa sikhatsi njalo sitadisha liBhayibheli futsi sikhula elwatini lwetfu ngeMdali, buhlobo betfu naye buyacina. Nasisondzelana naJehova, sitimisela kakhulu kutsi simtsandze ‘ngayo yonkhe inhlitiyo yetfu, nangawo wonkhe umphefumulo wetfu, nangayo yonkhe ingcondvo yetfu, nangawo onkhe emandla etfu.’ (Mak. 12:30) Sitimisele kutsi silalele Nkulunkulu futsi simlingise. (Ef. 5:1) Ngako-ke, kuba nako njalo Kukhonta Kwemndeni kwakusihlwa kubalulekile kute sisite emalunga emndeni wetfu kutsi ‘ahlale alungele’ ngekwakamoya, njengobe silindzele “kuhlupheka lokukhulu” lokwabiketelwa. (Mat. 24:21) Kwenta kanjalo kubalulekile kute sisindze.

15. Kukhonta Kwemndeni kwakusihlwa kuba namuphi umphumela endleleni emalunga emndeni lativa ngayo ngalomunye nalomunye?

¹⁵ Loluhlelo lweKukhonta Kwemndeni lunalenye futsi injongo—kusita emalunga emndeni kutsi asondzelane. Kuba nemphumela lomuhle endleleni emalunga emndeni lativa ngayo ngalomunye nalomunye lapho acitsa sikhatsi ndzawonye maviki onkhe acoca ngetintfo takamoya. Bantfu labashadile basondzelana kakhulu lapho batfola injabulo yekufundza liBhayibheli ndzawonye. (Fundza Umshumayeli 4:12.) Batali kanye nebantfwana labakhonta Jehova ndzawonye baba setfubeni lekuba munye elutsandvweni, “lolusibopho sekuphelela.”—Khol. 3:14.

16. Landzisa indlela labanye bodzadze labatsatfu labazuza ngayo kulobusuku lababubekele kutadisha liBhayibheli ndzawonye.

¹⁶ Cabanga ngendlela labanye bodzadze labatsatfu labaye bazuza ngayo ngekutibekela busuku bekutadisha liBhayibheli. Nanobe labodzadze lasebakhulile futsi lababafelokati bangasito tihlobo, bahlala edolobheni lelifananako futsi sekuminyaka leminyenti babangani. Njengobe bebanesifiso sekuvakashelana kakhudlwana futsi ngesikhatsi lesifananako bafuna kutsi leso sikhatsi singamane sibe sekuvakashelana nje kuphela kodvwa siphindze sakhe ngekwakamoya, babekela eceleni busuku lobubodvwa bekutsi batadishe liBhayibheli ndzawonye. Bacala lesifundvo sabo ngekusebentisa incwadzi letsi “‘Ukunikeza Ubufakazi Obuphelele’ NgoMbuso KaNkulunkulu.” Lomunye wabo utsi: “Sisijabulela kakhulu lesikhatsi, kangangekutsi sifundvo setfu sivame kuba ngetulu kweli-awa. Setama kutibona ngeliso lengcondvo timo bazalwane betfu bangelikhulu lekucala labebakuto, bese sicoca ngaloko tsine lebesingakwenta nasisetimeni letifananako. Ngemuva kwaloko, setama kuwasebentisa ensimini emaphuzu lesiwatfole nasifundza. Loku kuye kwenta umsebenti wetfu wekushumayela ngeMbuso kanye newekwenta bafundzi wajabulisa futsi watsela kakhulu kunasekucaleni.” Ngetulu kwekubazuzisa ngekwakamoya, loluhlelo luye lwenta labangani basondzelana kakhulu. Batsi: “Silujabulela kakhulu loluhlelo!”

17. Ngutiphi tintfo letingasita ekwenteni Kukhonta Kwemndeni kwakusihlwa kuphumelele?

¹⁷ Kutsiwani ngawe? Uyazuza yini kulobusuku lobubekelwe kukhonta kwemndeni nobe sifundvo lotichubela sona? Nangabe loluhlelo alulandzelwa njalo, angeke luyifeze injongo yalo. Onkhe emalunga emndeni kufanele kutsi nakushaya sikhatsi lenisibekele kufundza, abe sekakulungele. Akukafaneli nivumele tintfo letingasho lutfo tiphatamise lesikhatsi. Ngetulu kwaloko, kwatiswa lenikhetsa kukufundza kufanele kube ngulokutawuzuzisa umndeni wonkhe. Yini longayenta kute wente lesifundvo sijabulise? Fundzisa ngendlela lezuzisako, ugcine lesifundvo sihloniphekile futsi wonkhe umuntfu ative akhululekile.—Jak. 3:18. a

 Hlala ‘Ulindzile’ Futsi “Ulungele”

18, 19. Kwati kutsi kufika kweNdvodzana yemuntfu sekusedvute kufanele kukutsintse njani wena nemndeni wakho?

¹⁸ Timo talelive letihhohlokako tisenta siciniseke kutsi nga-1914 lelive lelibi laSathane langena etikhatsini talo tekugcina. I-Amagedoni leyesabekako seyisedvute. Ngekushesha, kutawuba sikhatsi sekutsi iNdvodzana yemuntfu ite kute ikhiphe sehlulelo saJehova kubantfu labangamhloniphi. (Hla. 37:10; Taga 2:21, 22) Akukafaneli yini kutsi loko kukutsintse wena nemndeni wakho?

¹⁹ Niyasilalela yini seluleko saJesu lesimayelana nekugcina liso ‘lilula’? Njengobe bantfu balelive baphishanekela umcebo, ludvumo, kanye nemandla, umndeni wakho uphishanekela imigomo yakamoya yini? Luyanisita yini loluhlelo lweKukhonta Kwemndeni kwakusihlwa nobe lwesifundvo lotichubela sona? Niyayifeza yini injongo yalo? Njengobe kuvetiwe esihlokweni lesengcile, wena njengendvodza, umfati, nobe umntfwana, uyayifeza yini indzima yakho levetwe emiBhalweni kute usite wonkhe umndeni uhlale ‘ulindzile’? (1 Thes. 5:6) Nawenta kanjalo, ‘utawukulungela’ kufika kweNdvodzana yemuntfu.

[Umbhalo longentansi]

Ufundzeni?

• Chaza indlela imindeni yemaKhristu lengahlala ngayo ‘ilungele’ ngekutsi . . . 

ibe neliso ‘lelilula.’

ibeke futsi iphishanekele imigomo yakamoya.

ibe neKukhonta Kwemndeni kwakusihlwa ngaso sonkhe sikhatsi.

[Imibuto Yesihloko Lesifundvwako]