Jesu—Kungani Afa?
Jesu—Kungani Afa?
‘INdvodzana yemuntfu . . . yetela kutawunikela ngekuphila kwayo kutsi ibe yinhlawulo yalabanyenti.’—MAKHO 10:45.
JESU abekwati loko lobekutawumehlela. Bekati kutsi abengeke aphile ngekuthula. Kunaloko, bekati kutsi abetawusheshe afe kabuhlungu aseseminyakeni yabo-30, kodvwa loko abekulungele.
LiBhayibheli liveta kutsi kufa kwaJesu kubaluleke kakhulu. Lenye incwadzi itsi emiBhalweni yemaKhristu yesiGriki, nobe eThestamenteni Lelisha kukhulunywa ngekufa kwaJesu tikhatsi letingaba ngu-175. Kodvwa-ke, kungani bekudzingeka kutsi Jesu ahlupheke futsi afe? Kufanele sati ngobe kufa kwaJesu kungakutsintsa kakhulu kuphila kwetfu.
▪ Loko Jesu labekulindzele Emnyakeni wekugcina wekuphila kwakhe, Jesu wabecwayisa kanyenti bafundzi bakhe ngekuhlupheka kanye nekufa labetawuhlangabetana nako. Endleleni leya eJerusalema kuyewugubha liPhasika lekugcina, watjela baphostoli bakhe labangu-12: “INdvodzana yeMuntfu itawunikelwa kubaphristi labakhulu nasetatini temtsetfo, batayilahla ngelicala kutsi ibulawe. Batayinikela kubetive. Batawuhlekisa ngayo, bayikhafulele ngematse, bayibhambabule, bayibulale.” a (Makho 10:33, 34) Kungani abeciniseka kangaka ngaloko lobekutawumehlela?
Jesu abetati kahle tiphrofetho letinyenti letisemiBhalweni yesiHebheru letatibiketela indlela labetawufa ngayo. (Lukha 18:31-33) Cabanga ngaletinye taletiphrofetho kanye nemavesi lachaza indlela letagcwaliseka ngayo.
Mesiya . . .
▪ Abetawutsengiswa ngetinhlavu tesiliva letingu-30.—ZAKHARIYA 11:12; MATEWU 26:14-16.
▪ Abetawushaywa futsi akhafulelwe.—ISAYA 50:6; MATEWU 26:67; 27:26, 30.
▪ Abetawubetselwa.—TIHLABELELO 22:16; MAKHO 15:24, 25.
▪ Abetawedzelelwa ngesikhatsi aselugodvweni.—TIHLABELELO 22:7, 8; MATEWU 27:39-43.
▪ Abetawubulawa kodvwa kube bete ematsambo akhe lephulwako.—TIHLABELELO 34:20; JOHANE 19:33, 36.
Jesu watigcwalisa letiphrofetho kanye naletinye letinyenti. Abengeke akwati kwenta konkhe loko ngemandla akhe. Kugcwaliseka kwato tonkhe letiphrofetho kuJesu kufakazela kutsi abetfunywe nguNkulunkulu. b
Kodvwa-ke, kungani bekudzingeka kutsi Jesu ahlupheke futsi afe?
▪ Jesu wafa kute aphendvule timphikiswane letibalulekile Jesu abetati timphikiswane lebetibalulekile endzaweni yonkhe, letaphakanyiswa ensimini yase-Edeni. Bayengwa sidalwa semoya lesisihlubuki, bo-Adamu na-Eva bakhetsa kungamlaleli Nkulunkulu. Kuhlubuka kwabo kwenta kutsi kufaneleka kwebukhosi baNkulunkulu, nobe indlela yakhe yekubusa kungatjatwe. Kona kwabo kwaphakamisa nembuto wekutsi bakhona yini bantfu labebatawuhlala betsembekile kuNkulunkulu nabavivinywa.—Genesisi 3:1-6; Jobe 2:1-5.
Jesu waphendvula letimphikiswane letimayelana nebukhosi baJehova kanye nebucotfo bebantfu ngendlela leyenetisa kunato tonkhe. Ngekulalela kwakhe ngalokuphelele “kwadzimate kwaba ngusekufeni . . . [elugodvweni lwekuhlushwa],” Jesu wasekela bukhosi baNkulunkulu. (Filiphi 2:8) Jesu waphindze wafakazela kutsi umuntfu lote sono angakwati kulondvolota bucotfo lobuphelele kuJehova ngisho nangetulu kwetilingo letimatima.
▪ Jesu wafa kute ahlenge bantfu Umphrofethi Isaya wabiketela kutsi kuhlupheka nekufa kwaMesiya lotsenjisiwe bekutawuletsa inhlawulo yetono tebantfu. (Isaya 53:5, 10) Jesu abekucondza kahle loku, futsi ngekutitsandzela ‘wanikela ngemphilo yakhe, kutsi ibe yinhlawulo yalabanyenti.’ (Matewu 20:28) Kufa kwakhe lokungumhlatjelo kwavulela bantfu labanesono litfuba lekuba nebuhlobo lobuhle naJehova kanye nekukhululwa esonweni nasekufeni. Kufa kwaJesu kusivulela nelitfuba lekutfola loko bo-Adamu na-Eva labakulahla—lokulitsemba lekuphila phakadze etimeni letinhle emhlabeni. c—Sembulo 21:3, 4.
▪ Loko longakwenta Kuletihloko, siye sahlola loko liBhayibheli lelikushoko ngaJesu—lapho avela khona, indlela labephila ngayo, kanye nekutsi kungani afa. Kwati lamaciniso ngaJesu angeke kugcine ngekulungisa imibono leliphutsa lekhona ngaye. Kuphila ngekuvumelana nawo kungaletsa tibusiso—lokukuphila lokuncono nyalo kanye nekuphila lokuphakadze esikhatsini lesitako. LiBhayibheli lisitjela loko lokufanele sikwente kute sitfole leto tinzuzo.
▪ Fundza lokwengetiwe ngaJesu Khristu kanye nendzima yakhe enjongweni yaJehova.—JOHANE 17:3.
▪ Bani nekukholwa kuJesu, futsi uphile ngendlela leveta kutsi uyamemukela njengeMsindzisi wakho.—JOHANE 3:36; IMISEBENTI 5:31.
BoFakazi BaJehova bangakujabulela kukusita kutsi ufundze lokwengetiwe ngaJesu Khristu, ‘loyiNdvodzana yaNkulunkulu lekukuphela kwayo,’ nalesitawusitfola ngaye sipho ‘sekuphila lokuphakadze.’—Johane 3:16.
[Imibhalo lengentansi]
a Jesu abevame kutibita ngekutsi ‘uyiNdvodzana yemuntfu.’ (Matewu 8:20) Lamavi awaveti nje kuphela kutsi abengumuntfu mbamba kodvwa nekutsi ‘abeyindvodzana yemuntfu’ lokukhulunywa ngayo esiphrofethweni seliBhayibheli.—Danyela 7:13, 14.
b Kute utfole kwatiswa lokubanti mayelana netiphrofetho letagcwaliseka kuJesu, fundza sandzisanchazo esihlokweni lesitsi “Jesu Khristu—Mesiya Lotsenjisiwe,” encwadzini letsi Lifundzisani Mbambambamba LiBhayibheli? leshicilelwa boFakazi BaJehova.
c Kute utfole kwatiswa lokubanti ngekubaluleka kwekufa kwaJesu, fundza sehluko 5 lesitsi “Sihlengo—Sipho SaNkulunkulu Lesikhulu Kunato Tonkhe,” encwadzini letsi Lifundzisani Mbambambamba LiBhayibheli?