Jesu—Wavelaphi?

“[Philatu] wangena endlini, watsi kuJesu: ‘Wena uphumaphi?’ Kodvwa Jesu akazange amphendvule.”—JOHANE 19:9.

PHONTIYUSI PHILATU, uMbusi wemaRoma, wabuta lombuto ngalesikhatsi ateka licala lebelitsintsa kuphila kwaJesu. a Philatu bekati kutsi Jesu abevela kuyiphi incenye yaka-Israyeli. (Lukha 23:6, 7) Bekati nekutsi Jesu abengasuye nje umuntfu lovamile. Kungenteka yini kutsi Philatu abetibuta kutsi Jesu wake waphila ngembikwekutsi ete emhlabeni? Lombusi lolicaba abetimisele yini kulemukela liciniso futsi ente ngekuvumelana nalo? Kunobe ngukuphi, Jesu akazange amphendvule, futsi ngekushesha kwacaca kutsi Philatu abekhatsateke kakhulu ngemsebenti wakhe kwendlula liciniso nobe kulunga.—Matewu 27:11-26.

Kuyajabulisa kutsi labo labafuna ngebucotfo kwati kutsi Jesu wavelaphi, bangakutfola melula loko. LiBhayibheli lisitjela ngalokucondzile kutsi Jesu Khristu wavelaphi. Cabanga nganaku lokulandzelako.

▪ Indzawo latalelwa kuyo Indlela yekubala yalamuhla iveta kutsi entfwasabusika yemnyaka wa-2 B.C.E., Jesu watalwa edolobheni lemaJuda, eBhetlehema. Umyalo waKhesari Agustusi wekutsi kubhaliselwe lubalo wenta kutsi Mariya, make waJesu ‘lobekatetfwele,’ kanye naJosefa indvodza yakhe, bahambe baye eBhetlehema, lokuyindzawo yabokhokho baJosefa. Ngesizatfu sekutsi abazange bayitfole indzawo yekuhlala kulelidolobha, baya esitebeleni, lapho Jesu afike watalelwa khona futsi bambeka emkhombeni.—Lukha 2:1-7.

Emakhulwini eminyaka ngembikwaloko, siphrofetho seliBhayibheli sabiketela indzawo Jesu labetawutalelwa kuyo. Satsi: “Bhetlehema Efratha, nome ungulomunye wemiti lemincane yakaJuda, kodvwa ngiyawuveta kuwe umbusi loyawubusa sive saka-Israyeli.” b (Mikha 5:2) IBhetlehema bekulidolobha lelincane kakhulu kunawo onkhe emadolobha akaJuda. Nanobe kunjalo, lelidolobha lelincane belitawuhlonishwa kakhulu, ngobe Mesiya lotsenjisiwe, nobe Khristu, abetawutalelwa kulo.—Matewu 2:3-6; Johane 7:40-42.

▪ Indzawo lakhulela kuyo Ngemuva kwekuhlala sikhashana eGibhithe, umndeni wakuboJesu watfutsela eNazaretha, lokulidolobha lelisesifundzeni saseGalile lelingemakhilomitha langu-96 ngasenyakatfo yeJerusalema. Ngaleso sikhatsi, Jesu abeneminyaka lengaphansi kwalemitsatfu budzala. Lena yindzawo lenhle balimi, belusi, kanye nebadwebi labebenta kuyo imisebenti yabo, futsi Jesu wakhulela emndenini lomkhulu nalophuyile.—Matewu 13:55, 56.

 Kusasele emakhulu eminyaka, liBhayibheli labiketela kutsi Mesiya abetawuba “ngumNazaretha.” Umvangeli Matewu watsi umndeni wakuboJesu wahamba wayewuhlala ‘eNazaretha, kuze kugcwaliseke lokwashiwo baphrofethi kutsi: “Uyawubitwa ngekutsi ngumNazaretha.”’ (Matewu 2:19-23) Leligama lelitsi umNazaretha lihlobene neligama lesiHebheru lelitsi “lihlumela.” Ecinisweni, Matewu abekhuluma ngesiphrofetho sa-Isaya lesabita Mesiya ngekutsi “lihlumela” laJese, lokusho kutsi Mesiya abetawuba situkulwane saJese, babe weNkhosi Davide. (Isaya 11:1) Jesu abesitukulwane saJese lesivela kuDavide.—Matewu 1:6, 16; Lukha 3:23, 31, 32.

▪ Indzawo labephila kuyo ekucaleni LiBhayibheli lifundzisa kutsi Jesu abephila ngembikwekutsi atalwe esitebeleni, eBhetlehema. Siphrofetho saMikha, lesicashunwe ngenhla, sichubeka sitsi “lusendvo lwakhe luyawusukela kulolo lwaluvele lukhona kwasekucaleni.” (Mikha 5:2) NjengeNdvodzana yaNkulunkulu lelitubulo, Jesu abesidalwa semoya lebesihlala ezulwini ngembikwekutsi atalwe njengemuntfu emhlabeni. Jesu watsi: ‘Ngehla ezulwini.’ (Johane 6:38; 8:23) Kwenteka njani loku?

Asebentisa umoya wakhe longcwele, Nkulunkulu Jehova wenta simangaliso ngekundlulisela kuphila kwaJesu, iNdvodzana yakhe yasezulwini esibeletfweni sentfombi lengumJuda, lenguMariya, kute Jesu atalwe njengemuntfu lote sono. c Lesimangaliso senteka ngesizatfu semandla aNkulunkulu longuSomandla. Njengobe ingilosi leyatjela Mariya lendzaba yasho: “Nkulunkulu akehlulwa lutfo.”—Lukha 1:30-35, 37.

LiBhayibheli aligcini ngekusitjela kutsi Jesu wavelaphi. EmaVangeli lamane—Matewu, Makho, Lukha, kanye naJohane—asitjela lokwengetiwe ngekutsi abephila njani.

[Imibhalo lengentansi]