Kwetsembela Ngalokuphelele KuJehova Kuyasicinisa

“Simakadze uyangiva nangikhala kuye.”—HLA. 4:3.

1, 2. (a) Ngusiphi simo lesiyingoti Davide lahlangabetana naso? (b) Ngutiphi tehluko lesitawucoca ngato?

 INKHOSI DAVIDE beseyibuse ka-Israyeli sikhatsi lesidze, kodvwa beseyibhekene nesimo lesiyingoti. Absalomu, indvodzana yakhe lenebucili beseyitibeke inkhosi, futsi Davide waphocelelwa kutsi ahambe eJerusalema. Umngani wakhe lomkhulu besekamlahlile, futsi Davide abesahamba nebantfu labambalwa lebebatsembekile kuye. Wenyukela eNtsabeni Yemincumo, ahamba akhala futsi angakagwabeli lutfo. Ngekuhamba kwesikhatsi, Shimeyi, labevela emndenini wendlu yeNkhosi Sawula, wajikijela Davide ngematje nangemhlabatsi, futsi wamcalekisa.—2 Sam. 15:30, 31; 16:5-14.

² Davide abetawukwehlela eShiyoli ahlazekile futsi aselusizini yini? Abengeke, ngobe abetsembele kuJehova. Loku sikubona kahle esehlukweni sesitsatfu seTihlabelelo, lapho Davide abhala khona ngekubalekela kwakhe Absalomu. Waphindze futsi wabhala nesehluko sesine seTihlabelelo. Totimbili letehluko tiveta kuciniseka kwaDavide kutsi Nkulunkulu uyayiva imithandazo futsi uyayiphendvula. (Hla. 3:4; 4:3) Letehluko tisicinisekisa ngekutsi Jehova utinaka busuku nemini tinceku takhe letetsembekile, uyatisekela, aphindze atinikete kuthula nekulondzeka. (Hla. 3:5; 4:8) Ngako-ke, asesitihlole letehluko, futsi sibone indlela letisicinisa ngayo futsi tisente setsembele kuNkulunkulu.

Lapho ‘Sebabanyenti Labasivukelako’

3. Njengobe kuvetiwe kuTihlabelelo 3:1, 2, sasinjani simo Davide labekuso?

³ Sitfunywa satsi kuDavide: “Tinhlitiyo tawo onkhe emadvodza aka-Israyeli setiku-Absalomu.” (2 Sam. 15:13) Amangele kutsi Absalomu ukhone njani kuzuza bantfu labanyenti kangaka, Davide watsi: “Maye, Simakadze, setinyenti  titsa tami! Sebanyenti labo labangivukelako. Banyenti lese bafakana imilomo ngami, batsi: ‘Nkulunkulu angeke amsindzise.’” (Hla. 3:1, 2) Ema-Israyeli lamanyenti bekacabanga kutsi Jehova angeke akhone kuvikela Davide ku-Absalomu kanye nasecenjini lakhe.

4, 5. (a) Yini Davide labeciniseka ngayo? (b) Asho kutsini emavi latsi “uyangisimisa”?

⁴ Nobe kunjalo, Davide akazange esabe ngobe abetsembele ngalokucinile kuNkulunkulu. Wahlabela: “Kodvwa-ke wena, Simakadze, ulihawu lami, nebukhosi bami, uyangisimisa, unginike sibindzi sekuncoba.” (Hla. 3:3) Abeciniseka kutsi Jehova utawumvikela njengelihawu lelivikela lisotja. Nanobe kunjalo, Davide wabaleka, inhloko yakhe ibheke phansi ngesizatfu selusizi, kodvwa Loyo Losetikwako Konkhe abetawusishintja leso simo sakhe, amletsele injabulo. Jehova abetawumsita Davide, amsimise nobe asuse lonkhe lolusizi lwakhe. Davide wathandaza kuNkulunkulu ati kutsi utawumphendvula. Wena uyakuveta yini kwetsembela kwakho kuJehova njengaDavide?

⁵ Ngemavi latsi “uyangisimisa,” Davide abevuma kutsi Jehova utawumsita. I-Today’s English Version ifundzeka kanjena: “Kodvwa wena, NKHOSI yami, ulihawu lami, ungivikela engotini, unginike sibindzi sekuncoba.” Mayelana nemavi latsi “uyangisimisa,” lenye incwadzi itsi: “Nkulunkulu nakasimisa umuntfu, umniketa litsemba nesibindzi.” Njengobe abemukwa umbuso, Davide kwakufanele kutsi acindzeteleke. Kodvwa-ke, ‘kusinyiswa’ kwakhe kwakutawumletsela emandla lamasha, sibindzi, futsi kumente etsembele ngalokuphelele kuNkulunkulu.

‘Simakadze Uyangiphendvula’

6. Kungani Davide atsi Jehova utawuphendvula imithandazo yakhe asentsabeni yakhe lengcwele?

⁶ Etsembele kuJehova futsi agcwele sibindzi, Davide wachubeka: “Ngelivi lami ngikhala kuSimakadze, uyangiphendvula asentsabeni yakhe lengcwele.” (Hla. 3:4) Ngesicondziso saDavide, libhokisi lesivumelwane, lelaliluphawu lwekuba khona kwaNkulunkulu, belitsatsiwe layiswa eNtsabeni iSiyoni. (Fundza 2 Samuweli 15:23-25.) Kuyafaneleka-ke kutsi Davide abekhuluma ngekutsi Jehova utawuphendvula imithandazo yakhe asentsabeni yakhe lengcwele.

7. Kungani Davide angazange esabe?

⁷ Davide akazange esabe ngobe bekaciniseka kutsi Nkulunkulu utawuva umthandazo wakhe. Kunekutsi esabe, wahlabela: “Ngicambalele phansi ngatunywa butfongo, ngaphindze ngavuka, ngobe Nkulunkulu uyangicinisa.” (Hla. 3:5) Ngisho nasebusuku, lapho ematfuba ekutunywa sitsa aba makhulu khona, Davide akazange esabe. Abeciniseka ngekutsi utawuvuka aphephile ngobe tintfo labehlangabetane nato esikhatsini lesengcile tamenta waciniseka kutsi Nkulunkulu ungumuntfu langetsembela kuye. Natsi singativa ngendlela Davide lativa ngayo nasigcina “imiyalo yaSimakadze” futsi singamshiyi.—Fundza 2 Samuweli 22:21, 22.

8. Tihlabelelo 27:1-4 tikufakazela njani kutsi Davide wetsembela kuNkulunkulu?

⁸ Sibindzi saDavide kanye nekwetsembela kwakhe ngalokucinile kuNkulunkulu kuyabonakala nakulamanye emavesi, njengalawa: “Simakadze usibane sami nensindziso yami. Ngiyakwesaba bani? Simakadze uyinqaba yami yekufihla kuphila kwami. Pho, ngubani lengingamesaba? . . . Nome ngingavinjetelwa yimphi, inhlitiyo yami ingeke yesabe. . . . Kunye kuphela lengakucela kuSimakadze, ngiko kodvwa lengikufunako: kutsi ngihlale endlini yaSimakadze onkhe emalanga ekuphila kwami, ngibukisise buhle baSimakadze, ngizindle ngaye ngisethempelini lakhe.” (Hla. 27:1-4) Nangabe nawe utiva ngaleyo ndlela futsi timo takho tikuvumela, utawuba khona njalo emihlanganweni yelibandla kanye naletinye tikhonti taJehova.—Heb. 10:23-25.

9, 10. Nangetulu kwemavi eTihlabelelo 3:6, 7, kungani ungasho kutsi Davide bekangafuni kutiphindziselela?

⁹ Nanobe Davide abehlubukwe ngu-Absalomu futsi labanye bantfu labanyenti bebangaketsembeki kuye, wahlabela: “Bantfu angibesabi,  nome bangaba ngemashumi etinkhulungwane labangivimbetele ndzawo tonkhe. Vuka Simakadze, ngisindzise, Nkulunkulu wami, ngobe tonkhe titsa tami utihlakaye imihlatsi, wephula nematinyo alababi.”—Hla. 3:6, 7.

¹⁰ Davide akazange abatfukutselele, nobe afune kutiphindziselela. Nkulunkulu nguye ‘lobekatawuhlakaya titsa takhe imihlatsi.’ NjengeNkhosi, Davide abetibhalele ikhophi yeMtsetfo, futsi bekati kutsi Jehova watsi: “Kuphindzisela kwami; ngimi loyawutibuyiselela.” (Dut. 17:14, 15, 18; 32:35) KwakunguNkulunkulu futsi ‘labetawephula ematinyo alababi.’ Kubephula ematinyo kusho kubenta babe bete emandla ekulimata. Jehova uyabati bantfu lababi ngobe yena “ubuka inhlitiyo.” (1 Sam. 16:7) Sijabula kakhulu ngekutsi Nkulunkulu usinikete kukholwa nemandla ekumelana ngalokucinile nalomubi longuSathane, lotawuvalelwa ngekushesha njengelibhubesi lelibhodlako kodvwa lelite ematinyo, lelifanelwe kubhujiswa nje kuphela!—1 Phet. 5:8, 9; Semb. 20:1, 2, 7-10.

“Insindziso Ivela Kuwe, Simakadze”

11. Kungani kufanele sibathandazele labo lesikholwa nabo?

¹¹ Davide bekati kutsi nguJehova kuphela labengamkhulula, njengobe leyo bekuyintfo labeyidzinga kakhulu. Kodvwa lomhlabeli abengaticabangeli yena kuphela. Kutsiwani-ke ngabo bonkhe bantfu baJehova? Davide waphetsa ingoma yakhe lephefumulelwe nganankha emavi: “Insindziso ivela kuwe, Simakadze; sibusiso sakho asibesesiveni sakho!” (Hla. 3:8) Kuliciniso kutsi Davide abenetinkinga letinkhulu kakhulu, kodvwa abecabanga ngebantfu baJehova futsi abeciniseka ngekutsi Nkulunkulu abetawubabusisa. Akukafaneli yini natsi sicabange ngalabo lesikholwa nabo? Natsi kufanele sibakhumbule emithandazweni yetfu, sicele Jehova kutsi abanikete umoya wakhe longcwele kute bacine, futsi babe nesibindzi sekumemetela tindzaba letinhle.—Ef. 6:17-20.

12, 13. Yini leyenteka ku-Absalomu, futsi Davide wentani nakeva ngaloko?

¹² Siphetfo sa-Absalomu sagcina singulesihlazisako kakhulu—lokusecwayiso kubo bonkhe labo labahlupha labanye, ikakhulukati labagcotjiwe baNkulunkulu, njengaDavide. (Fundza Taga 3:31-35.) Kwabhedvuka imphi, futsi emabutfo a-Absalomu ehlulwa. Absalomu abegibele umnyuzi, futsi wahhukeka ngetinwele egaleni lesihlahla lesikhulu. Walenga lapho aphila futsi kute labengamsita, kwate kwafika Jowabe wamjijimeta esifubeni ngetikhali letintsatfu.—2 Sam. 18:6-17.

¹³ Davide wajabula yini nakeva ngaloko lokwehlele indvodzana yakhe? Cha. Kunaloko wabhala: “Awu, ndvodzana yami, Absalomu! Ndvodzana yami, ndvodzana yami, Absalomu! Kube kufane kwafa mine esikhundleni sakho! Awu, Absalomu, ndvodzana yami, ndvodzana yami!” (2 Sam. 18:24-33) Ngemavi aJowabe kuphela lacedza buhlungu baDavide. Loko lokwenteka ku-Absalomu kwaba siphetfo lesibuhlungu, ngobe sifiso sakhe sebugovu samenta walwa nababe wakhe—logcotjiwe waJehova, futsi wafuna nekumletsela inhlekelele!—2 Sam. 19:1-8; Taga 12:21; 24:21, 22.

Davide Uphindze Uveta Kwetsembela Kwakhe KuNkulunkulu

14. Yini lengashiwo ngekubhalwa kweTihlabelelo 4?

¹⁴ Sehluko sesitsatfu kanye nesesine seTihlabelelo, sinemthandazo lowashiwo nguDavide lapho aveta khona kutsi abetsembele kuJehova ngalokuphelele. (Hla. 3:4; 4:3) Kungenteka kutsi Davide wabhala lengoma kute avete kutsi abekhululekile futsi abebonga Jehova ngemuva kwekwehluleka kwa-Absalomu kumbulala. Kungenteka nekutsi wayibhala acabanga ngebahlabeli labangemaLevi. Kunobe ngabe ngukuphi, kuzindla ngayo kungacinisa kwetsembela kwetfu kuJehova.

15. Kungani singathandaza kuJehova ngekukhululeka ngeNdvodzana yakhe?

¹⁵ Davide waphindze waveta kwetsembela  kwakhe ngalokuphelele kuNkulunkulu kanye nekuciniseka kutsi uyayiphendvula imithandazo yakhe. Wahlabela: “Ngiphendvule nangikhala kuwe, wena Nkulunkulu ukulunga kwami. Ekucindzetelweni kwami uyangikhulula; ngihawukele, ukwemukele kuncenga kwami.” (Hla. 4:1) Natsi sitawumetsemba ngendlela lefananako Nkulunkulu nangabe senta tintfo letilungile. Nasicaphela kutsi Jehova, ‘Nkulunkulu wekulunga,’ ubusisa bantfu bakhe labalungile, singathandaza kuye ngekukhululeka ngeNdvodzana yakhe futsi sibe nekukholwa emhlatjelweni wayo wesihlengo. (Joh. 3:16, 36) Loku kusiletsela kuthula lokukhulu!

16. Kungani Davide advumala?

¹⁶ Ngaletinye tikhatsi sihlangabetana netimo letisidvumatako naletisicedza emandla. Kungenteka kutsi loku bekwenteka nakuDavide, ngobe wahlabela watsi: “Madvodza! Kuyawuze kube ngunini libito lami linyembenywa? Kuyawuze kube ngunini nitfungatsa lite nilandzelana nemanga?” (Hla. 4:2) Lamavi latsi “madvodza” ashiwo kubantfu kodvwa ngendlela lengasiyinhle. Titsa taDavide betitsandza ‘kutfungatsa lite.’ I-New International Version inanankha emavi: “Kuyawuze kube ngunini nitsandza tintfo letingasilo liciniso futsi nifuna bonkulunkulu bemanga?” Ngisho nobe kusidvumata loko lokwentiwa ngulabanye, asichubeke sithandaza ngebucotfo futsi sivete kwetsembela kwetfu kuNkulunkulu weliciniso lokukuphela kwakhe.

17. Chaza kutsi singatisebentisa njani Tihlabelelo 4:3.

¹⁷ Kwetsembela kwaDavide kuNkulunkulu kuyavela emavini latsi: “Kodvwa kufanele nati kutsi Simakadze utehlukanisele lolungile. Simakadze uyangiva nangikhala kuye.” (Hla. 4:3) Sibindzi kanye nekwetsembela kuJehova ngalokuphelele kuyadzingeka kute sihlale sicotfo kuye. Imindeni yemaKhristu iyatidzinga letimfanelo nangabe sihlobo lesingaphendvuki sisuswa ekuhlanganyeleni. Nkulunkulu uyababusisa labo labacotfo kuye futsi labenta loko lakufunako. Ecinisweni, kuba cotfo kanye nekwetsembela kuJehova ngalokuphelele kwenta bantfu bakhe bajabule.—Hla. 84:11, 12.

18. Sisebentisa Tihlabelelo 4:4, yini lokufanele siyente nangabe sike sakhulunyiswa nobe saphatfwa kabi?

¹⁸ Kutsiwani nangabe lotsite asho nobe enta intfo lesenta sitfukutsele? Singahlala sijabulile nangabe senta loko lokwashiwo nguDavide: “Nanitfukutsele ningoni, cabangisisani nisathulile etinhlitiyweni tenu, nisacambalele emacansini enu.” (Hla. 4:4) Nangabe sike sakhulunyiswa nobe saphatfwa kabi, singabotiphindziselela. (Rom. 12:17-19) Singaveta indlela lesitiva ngayo ngekutsi sikhulume ngekhatsi enhlitiyweni nasicambalele. Nangabe sithandaza ngalendzaba, singayibona ngendlela leyehlukile futsi sitsetselele ngelutsandvo. (1 Phet. 4:8) Kufanele sisinake seluleko semphostoli Pawula, lokungenteka kutsi sitsetfwe kuTihlabelelo 4:4: “Tfukutselani, kodvwa ningoni; lilanga lingashoni solomane nitfukutsele. Ningamniki Sathane litfuba.”—Ef. 4:26, 27.

19. Tihlabelelo 4:5 tingasisita njani nasenta imihlatjelo yetfu yakamoya?

¹⁹ Aveta sidzingo sekwetsembela kuNkulunkulu, Davide wahlabela: “Nikelani ngemihlatjelo leyemukeleka kuNkulunkulu, bese nibeka litsemba lenu kuSimakadze.” (Hla. 4:5) Imihlatjelo lebeyinikelwa ngema-Israyeli beyiba  ngulebalulekile nangabe ayenta ngetisusa letinhle. (Isa. 1:11-17) Ngako-ke, kute imihlatjelo yetfu yakamoya yemukeleke kuNkulunkulu, kufanele siyente ngetisusa letinhle futsi setsembele kuye ngalokuphelele.—Fundza Taga 3:5, 6; Hebheru 13:15, 16.

20. Kusho kutsini ‘kukhanya kwebuso baJehova’?

²⁰ Davide wachubeka watsi: “Labanyenti batsi: ‘Ngubani longasentela tintfo letinhle?’ Simakadze, sikhanyisele ngebukhona bakho.” (Hla. 4:6) ‘Kukhanya kwebuso baJehova’ kuveta sihawu sakhe. (Hla. 89:15) Ngesikhatsi Davide athandaza atsi: “Sikhanyisele ngebukhona bakho,” abesho kutsi Jehova ‘akasihawukele.’ Ngesizatfu sekutsi setsembele kuJehova, uyasihawukela futsi sijabula kakhulu njengobe sichubeka senta intsandvo yakhe ngekukhululeka.

21. Yini lesiciniseka ngayo nangabe sihlanganyela ngalokugcwele kulomsebenti wekuvuna walamuhla?

²¹ Abuke embili enjabulweni levela kuNkulunkulu leyendlula leyo letfolwa bantfu labavunako, Davide wahlabelela Jehova: “Ungiphe injabulo lenkhulu enhlitiyweni yami, leyengca injabulo lababa nayo nabanenala yemabele neyeliwayini.” (Hla. 4:7) Natsi singaba nenjabulo lefananako nangabe sihlanganyela ngalokugcwele emsebentini wekuvuna. (Luk. 10:2) Sikanye ‘nesive lesandzile’ salabagcotjiwe labaholako kulomsebenti, siyajabula njengobe linani ‘letisebenti tekuvuna’ lichubeka likhula. (Isa. 9:3) Uyahlanganyela yini kulomsebenti wekuvuna lojabulisako?

Chubeka Wetsembela KuNkulunkulu

22. Ngekuvumelana neTihlabelelo 4:8, ema-Israyeli abusiswa njani ngekulalela uMtsetfo waNkulunkulu?

²² Davide waphetsa lengoma ngemavi latsi: “Ngitawutilahla phansi, ngilale butfongo ngekuthula, ngobe nguwe wedvwa, Simakadze, longenta ngihlale ngiphephile.” (Hla. 4:8) Ngesikhatsi ema-Israyeli awulalela uMtsetfo waJehova, bekaba nekuthula naye futsi ative alondzekile. Sibonelo saloku kutsi ngesikhatsi kubusa Solomoni, ‘emaJuda kanye nema-Israyeli abehlala ngekuthula.’ (1 Khos. 4:25) Labo labebatsembela kuNkulunkulu bebajabulela kuthula ngisho nalapho tive letibomakhelwane tinenzondo. NjengaDavide, natsi silala ngekuthula ngobe Nkulunkulu usenta sitive siphephile.

23. Yini lesitawuyijabulela nangabe setsembela kuNkulunkulu ngalokuphelele?

²³ Asichubeke sitimisela emsebentini waJehova. Shengatsi singathandaza sinekukholwa futsi sijabulele “kuthula kwaNkulunkulu lokwendlula konkhe kwati.” (Fil. 4:6, 7) Loko kutawusiletsela injabulo lenkhulu! Singalindzela likusasa ngekuciniseka nangabe sichubeka setsembela kuJehova ngalokuphelele.

Ungaphendvula Njani?

• Ngutiphi tinkinga Davide lahlangabetana nato letabangelwa ngu-Absalomu?

• Tihlabelelo 3 tisicinisa njani?

• Tihlabelelo 4 tingakucinisa njani kwetsembela kwetfu kuJehova?

• Singazuza njani ngekwetsembela kuNkulunkulu ngalokuphelele?

[Imibuto Yesihloko Lesifundvwako]

[Emavi lahambisana nesitfombe ekhasini 32]

Uyetsembela yini kuJehova ngalokuphelele?