Sondzela KuNkulunkulu

“Jehova Ngumelusi Wami”

ASEWUBUKE lesitfombe lesikulelikhasi. Cabanga ngendlela lelizinyane lemvu lelitiva lilondzeke ngayo njengobe lisesifubeni salomelusi. KuTihlabelelo 23, liBhayibheli lisebentisa sifananiso ngco semelusi kanye netimvu kute livete indlela Jehova latinakekela ngayo tikhonti takhe. Ufuna sitive silondzekile njengaDavide, lowasho ngekuciniseka: “Jehova ngumelusi wami.” a—Livesi 1. Catsanisa ne-NW.

Davide, umbhali walengoma, abengumelusi ngesikhatsi asesengumfana. Bekati kutsi yini ledzingwa timvu kanye nekutsi uyini umsebenti wemelusi. Davide, lowativela yena kunakekelwa nguNkulunkulu, wabhala loko lokubitwa ngekutsi “yingoma lesenta siciniseke futsi sibe nelitsemba.” Lelibito laNkulunkulu lelitsi Jehova, livela ekucaleni kanye nasekugcineni kwalengoma. (Livesi 1, 6) Lamavesi lasemkhatsini achaza tindlela letintsatfu Jehova labanakekela ngato bantfu bakhe njengemelusi anakekela timvu takhe.—Tihlabelelo 100:3.

Jehova uyatihola timvu takhe. Timvu letite umelusi tiyalahleka. Ngalokufananako, natsi siyaludzinga lusito kute sitfole indlela lefanele ekuphileni. (Jeremiya 10:23) Davide watsi Jehova ucondzisa bantfu bakhe abayise “emadlelweni laluhlata” kanye “nasemantini ekuphumula.” Ubaholela “nasetindleleni tekulunga.” (Livesi 2, 3) Lemifanekiso lekhuluma ngemvelo isicinisekisa ngekutsi singetsembela kuNkulunkulu. Ngekulandzela sicondziso semoya wakhe longcwele njengobe kuvetiwe eBhayibhelini, singaphila imphilo letawusiletsela kwenetiseka, kucabuleka, kanye nekulondzeka.

Jehova uyativikela timvu takhe. Timvu natite umelusi tiyesaba futsi kubabete lotawutisita. Jehova utjela bantfu bakhe kutsi akukafaneli besabe, ngisho nalapho bahamba “esigodzini lesinelitfunti lekufa”—lokusikhatsi lesibonakala simnyama kakhulu. (Livesi 4) Jehova uyabelusa, futsi uhlale akulungele kubasita. Uniketa tikhonti takhe kuhlakanipha nemandla kute tibeketelele tilingo.—Filiphi 4:13; Jakobe 1:2-5.

Jehova uyatondla timvu takhe. Timvu tetsembela kumelusi wato kute titfole kudla. Natsi sinesidzingo sekwati Jehova lesingasenetisa kuphela ngelusito lwakhe. (Matewu 5:3) Kuyajabulisa kutsi Jehova unguMondli lonesandla lesivulekile, lodekela tinceku takhe litafula lekudla. (Livesi 5) LiBhayibheli kanye netincwadzi letisekelwe kulo, njengalomagazini lowufundzako, lingumtfombo wekudla kwakamoya lokwenetisa sidzingo setfu sekwati injongo yekuphila, kanye nenjongo Nkulunkulu lanayo ngatsi.

Davide wativa alondzekile, ati kutsi nakangahlala asedvute naJehova, uMelusi wakhe losezulwini, utawumnakekela ngelutsandvo “imihla yonkhe yekuphila [kwakhe].” (Livesi 6) Uyakufuna yini kulondzeka lokunjalo? Nangabe kunjalo, kufanele ufundze indlela longasondzela ngayo kuJehova. Ngaleyo ndlela utawutiva ulondzekile emikhonweni yeMelusi Lomkhulu, lobaholako, abavikele, futsi abondle labo labahlala betsembekile kuye.—Isaya 40:11.

[Umbhalo longentansi]