BANTFU labanjingile bakhonile kucedza buphuya​—kodvwa loku batentele bona. Imetamo yekucedza buphuya babo bonkhe bantfu ayikaphumeleli. Kungani? Kungobe bantfu labanjingile ngalokuvamile abafuni kutsi kube khona umuntfu nobe intfo letawubaphatamisa ekunjingeni kwabo. Solomoni, inkhosi yaka-Israyeli wasendvulo, wabhala: “Ngabona tinyembeti talabacindzetelwe, bate ngisho nemdvudvuti; emandla abengakubacindzeteli babo.”​—Umshumayeli 4:1.

Bantfu labakhulu eveni futsi labanemandla bangakhona yini kunciphisa buphuya emhlabeni? Solomoni waphefumulelwa kutsi abhale: “Konkhe kulite, kufanana nekucosha umoya. Loko lokugwegwile kungeke kucondziseke.” (Umshumayeli 1:14, 15) Bufakazi baloku sibubona kahle emetameni yalamuhla yekucedza buphuya.

Tindlela Tekuphumelelisa Wonkhe Umuntfu

Ngelikhulu lesi-19 leminyaka, emave lambalwa aye atfola imali lenyenti kakhulu kutekutsengiselana kanye nakutemisebenti lemikhulu. Ngako-ke, labanye bantfu labakhulu bafune tindlela tekulwa nebuphuya. Yini lebeyingentiwa kute bonkhe bantfu batfole umcebo lolinganako?

Labanye bantfu bebacabanga kutsi kubusa ngekwabelana nobe bukhomanisi kutawukwenta kutsi bantfu emhlabeni wonkhe bafanane futsi babe nemcebo lolinganako. Bantfu labanjingile abazange bakutsandze loku. Bantfu labanyenti bakhangwa ngumbono wekutsi wonkhe umuntfu kufanele ente lokutsite emmangweni wakubo futsi aphindze azuze kuwo, kuye ngetidzingo takhe. Baba nelitsemba lekutsi onkhe emave atawuyisebentisa lendlela yekubusa ngekwabelana kute umhlaba ube yindzawo lekahle yekuphila. Emave lambalwa lanjingile acala kusebentisa letinye tici talendlela yekubusa futsi akha tinhlangano tetenhlalakahle letatitsembisa kunakekela bonkhe bantfu “kuko konkhe kuphila kwabo.” Ngemuva kwaloko, lamanye emave atsi sekabucedzile buphuya kubantfu bawo.

 Nanobe kunjalo, kubusa ngekwabelana akuwufezanga umgomo wako. Umgomo wekutsi bantfu batawusebentela kuzuzisa ummango kunekutsi batizuzise bona awuzange uphumelele. Labanye bakwalile kusita bantfu labaphuyile, ngobe batsi bantfu labaphuyile babese abasafuni kusebenta ngobe bayati kutsi kukhona lobasitako. Lamavi eliBhayibheli abonakale aliciniso: “Kute ngisho nobe munye umuntfu emhlabeni lowenta lokuhle kuphela, kubete lakonako. . . . Nkulunkulu wadala umuntfu, wamenta waba ngulocondzile, kodvwa bantfu besuka bayawufuna emachinga abo lamanyenti.”​—Umshumayeli 7:20, 29.

Lelinye litsemba bekungulelo bantfu labanyenti labalibita ngekutsi yi-American Dream​—lokuliphupho lekutsi kutawuba nendzawo lapho bonkhe bantfu labatimisele kusebenta kamatima batawuphumelela. Emhlabeni wonkhe, emave lamanyenti acale kusebentisa timiso letitsite, njengentsandvo yelinyenti, kanye nekutsengiselana ngalokukhululekile. Loku kubonakala kungiko lokwente iMelika yanjinga. Kodvwa akusiwo onkhe emave layisebentisa lendlela, ngobe emave laseNyakatfo yeMelika akanjingiswanga yindlela yawo yekubusa. Kunaloko anjingiswa kutsi anemicebo yemvelo leminyenti futsi kumelula ngawo kutsengiselana nemave angaphandle. Ngakulokunye, kucudzelana kutemnotfo akwenti bantfu banjinge nje kuphela kodvwa kwenta labanye baphuye. Emave lanjingile angawasita yini laphuyile?

LuHlelo Lwe-Marshall Lungabucedza Yini Buphuya?

Ekupheleni kweMphi Yelive Yesibili, iYurophu yayicekelwe phansi futsi bantfu labanyenti bebahlushwa yindlala. Hulumende waseMelika bekakhatsatekile ngalokubusa ngekwabelana lokwakuvamile eYurophu. Ngako-ke esikhatsini lesasingaba minyaka lemine, iMelika yayikhipha tinsambansamba tetimali kute kucaliswe imisebenti lemikhulu kanye netekulima emaveni labekavuma kusebentisa inchubo yayo yekubusa. LoluHlelo lwe-Marshall lwabonakala luphumelela kakhulu. ENshonalanga yeYurophu, lemetamo yeMelika yabonakala ikhula, futsi buphuya bancipha kakhulu. Kodvwa lena kwakuyindlela yekucedza buphuya emhlabeni wonkhe yini?

Kuphumelela kwaloluHlelo lwe-Marshall kwaholela hulumende waseMelika kutsi unikete lusito emaveni laphuyile emhlabeni wonkhe, uwasite atfutfukise tekulima, temphilo, temfundvo kanye netekutfutsa. IMelika yavuma kutsi yayenta konkhe loku kute itizuzise yona. Nalamanye emave etama kuniketa lusito emaveni laphuyile. Ngemuva kweminyaka lengu-60, sekacitse sikhatsi lesinyenti enta loku, atfola imiphumela ledvumatako. Kuliciniso kutsi lamanye emave labephuyile agcina sekanjinge ngendlela lemangalisako, ikakhulukati emave laseMphumalanga ye-Asia. Kulamanye emave, nanobe lolusito lwabangela kutsi babe bancane bantfwana labafako futsi labanyenti babo batfola imfundvo, emave lamanyenti bekasolo aphuye kakhulu.

Kungani Lusito Loluvela Kulamanye Emave Lwehlulekile Kucedza Buphuya?

Kusita emave laphuyile kutsi ancobe buphuya kubonakale kumatima kwendlula kusita emave lanjingile labehlaselwe timphi. IYurophu beyivele inayo imisebenti lemikhulu, tekutsengiselana, kanye netekutfutsa. Umnotfo wayo wawudzinga kulungiswa nje kuphela. Emaveni laphuyile, nanobe lamanye emave abesita ngekwakha imigwaco, tikolwa, kanye nemitfolamphilo, bantfu bebaloku baphuye kakhulu ngobe bekute emabhizinisi, imicebo yemvelo, futsi abengakhoni kutsengiselana nalamanye emave.

Tinkinga letibangela buphuya kanye naleto  letibangelwa ngibo tinyenti kakhulu. Sibonelo saloku kutsi tifo tibangela buphuya, kantsi nebuphuya bubangela tifo. Bantfwana labangondleki kahle bangatsikameteka emtimbeni kanye nasengcondvweni kangangekutsi batsi lapho sebakhulile bangakhoni kunakekela babo bantfwana. Nangabe emave lanjingile amikisa lusito lwekudla emaveni laphuyile, balimi kanye nabosomabhizinisi balawo mave bayalimala, ngaloko buphuya buyandza. Imali letfunyelwa kubohulumende bemave laphuyile nayo ibangela letinye tinkinga. Sizatfu saloku kutsi kumelula kuyeba, futsi ingaholela ekukhwabaniseni, kantsi kukhwabanisa kona kungaholela ebuphuyeni lobukhulu. Ngako-ke, lusito loluvela kulamanye emave alukhoni kucedza buphuya ngobe luyehluleka kulungisa imbangela lenkhulu yabo.

Yini Lebangela Buphuya?

Buphuya lobugcwele lamuhla bubangelwa ngemave, bohulumende, kanye nebantfu labafuna kutizuzisa bona nje kuphela. Sibonelo saloku kutsi bohulumende bemave lanjingile abakhatsateki ngekucedza buphuya emhlabeni wonkhe ngobe bakhetfwe ngentsandvo yelinyenti, ngako-ke bafuna kujabulisa labo bantfu lababavotela. Ngako-ke, bayabalela balimi bemave laphuyile kutsi batsengise imikhicito yabo emaveni lanjingile kute emabhizinisi ebalimi balamave lanjingile angawi. Kulokunye, babusi bemave lanjingile basita balimi bemave abo ngekwetimali kute behlule bozakwabo bemave laphuyile.

Ngako-ke, imbangela yebuphuya​—lokungumkhuba webantfu kanye nabohulumende wekufuna kutizuzisa bona, iyintfo lebangelwa bantfu. Solomoni wakubeka ngalendlela: “Umuntfu usuke atihlisibete etikwalabanye kantsi utilimata yena.”​—Umshumayeli 8:9.

Buyoke buphele yini buphuya? Ukhona yini hulumende longagucula lesimo bantfu labakuso?

[Libhokisi ekhasini 6]

UMtsetfo Lowawuvikela Buphuya

Nkulunkulu Jehova waniketa ema-Israyeli asendvulo imitsetfo leyayitawuvikela buphuya nayilalelwa. Ngephansi kweMtsetfo, yonkhe imindeni, ngephandle kwaleyo yesive sebaphristi semaLevi, yatfola lifa lemhlaba. Lelifa lemndeni lalilondzekile ngobe umhlaba bewungeke utsengiswe nomphelane. Bekutsi ngemuva kweminyaka lengu-50, yonkhe imihlaba ibuyiselwe kubanikati bayo nobe emindenini yabo. (Levithikhusi 25:10, 23) Nangabe umuntfu kwakudzingeka atsengise umhlaba wakhe ngesizatfu sekugula, sehlakalo, nobe kuvilapha, kwakufanele ubuyiselwe kuye ngephandle kwemali ngeMnyaka Wekubuyiselwa. Ngaleyo ndlela, kute umndeni lowawutawuhlale uhlushwa buphuya.

Kulokunye, uMtsetfo waNkulunkulu wawuvumela indvodza lehluphekile kutsi ititsengisele ebugcilini. Umuntfu lonjalo abebhadalwa kusengembili kute atewukhona kubhadala tikweleti takhe. Nangabe angakatihlengi ngemnyaka wesikhombisa, kwakufanele akhululwe futsi aniketwe kudla kanye nemfuyo kute naye atewukhona kufuya. Futsi nangabe umuntfu lophuyile aboleka imali, uMtsetfo bewuwalela ema-Israyeli kutsi afune intalo kuye. UMtsetfo wawuphindze utsi bantfu kufanele bangavuni bate bafike emacentselweni emasimi abo kute bantfu labaphuyile batewukhona kukhwimita. Ngaleyo ndlela, kute umIsrayeli lobekangahamba acela kudla.​—Dutheronomi 15:1-14; Levithikhusi 23:22.

Nanobe kunjalo, umlandvo uyaveta kutsi lamanye ema-Israyeli abanjwa buphuya. Kungani? Ema-Israyeli akawulalelanga uMtsetfo waJehova. Ngaleso sizatfu, njengakuto tonkhe tindzawo, labanye bantfu banjinga, baba nemhlaba lomnyenti kantsi labanye bebete umhlaba futsi baphuyile. Intfo leyabangela buphuya kuma-Israyeli kutsi lamanye awo akawunakanga uMtsetfo waNkulunkulu futsi aticabangela wona kunekutsi acabangele labanye bantfu.​—Matewu 22:37-40.