KUPHUYA kakhulu kusongela kuphila. Kusho kungabi nekudla lokwenele, emanti, oyili, kuswela indzawo yekulala lefanele, kunganakekeleki kahle kwemphilo, kanye nekungatfoli imfundvo. Buphuya buhlasele bantfu labasigidzigidzi, labalingana nelinani lebantfu labahlala eNdiya. Nanobe kunjalo, bantfu labanyenti labasemaveni laseNshonalanga yeYurophu kanye naseNyakatfo yeMelika, abakake bambona umuntfu lophuye kakhulu. Ngako-ke, asesicoce ngalabanye balabo labaphuye kakhulu.

Mbarushimana waseRwanda, e-Africa, uhlala nemfati wakhe kanye nebantfwana babo labasihlanu. Umntfwana wabo wesitfupha wabulawa ngumalaleveva. Mbarushimana utsi: “Babe wami wasehlukanisela umhlaba wakhe sonkhe njengobe besisitfupha. Incenye yami beyiyincane kakhulu, ngako kwadzingeka kutsi umndeni wami utfutsele edolobheni. Mine nemkami senta umsebenti wekutfwala emasaka lanematje kanye nesihlabatsi. Indlu yetfu ite emafasitelo. Emanti siwakha emtfonjeni losesiteshini semaphoyisa. Sivame kudla kanye ngelilanga, kodvwa nakwenteka singawutfoli umsebenti, asidli lilanga lonkhe. Nasiba sesimeni lesinjalo, ngivele ngihambe ngobe kungivisa buhlungu kuva bantfwana bami bakhaliswa yindlala.”

Victor kanye naCarmen batfunga ticatfulo. Bahlala nebantfwana babo labasihlanu eBolivia, edolobheni lelikhashane. Bacashe ekamelweni lelilodvwa leligugile, lelite gesi, futsi lelineluphahla loluvutako. Sikolwa sakuleyo ndzawo sinebantfwana labanyenti, ngako kwadzingeka kutsi Victor entele umntfwana wakhe litafula kute naye akwati kuya esikolweni. BoVictor naCarmen bahamba emakhilomitha lalishumi nabayewutfota tinkhuni tekupheka kanye netekubilisa emanti. Carmen utsi: “Site indlu yangansense, ngako siya ngasemfuleni, futsi kugezelwa kuwo kuphindze kulahlwe khona tibi. Esikhatsini lesinyenti bantfwana betfu bayagula.”

Francisco kanye na-Ilídia bahlala eMozambique endzaweni yasemakhaya. Bantfwana babo labane basaphila; kantsi lomunye wabulawa ngumalaleveva ngesizatfu sekutsi esibhedlela abamelaphanga. BoFrancisco na-Ilídia balima lilayisi kanye nabhatata ensimini yabo lencane kute bakwati kutfola kudla kwetinyanga letintsatfu. Francisco utsi: “Ngaletinye tikhatsi imvula ayini nobe tigebengu tebe loko  lesikulimile. Ngako-ke, ngitfola imali lencane ngekutsi ngigawule umhlanga ngiphindze ngiwutsengise. Siphindze sihambe ema-awa lamabili nasiyewutfota tinkhuni ehlatsini. Mine nemkami sitfwala tinyandza letimbili tetinkhuni, lena lenye isichuba liviki lonkhe kute sikwati kupheka, bese kutsi lena lenye siyayitsengisa.”

Bantfu labanyenti batsi kubuhlungu futsi kubi kutsi umuntfu loyedvwa kulabasikhombisa aphile njengaMbarushimana, Victor kanye naFrancisco, babe labanye bantfu bona baphila kamnandzi. Labanye betamile kwenta lokutsite ngalendzaba. Sihloko lesilandzelako sitawucoca ngemetamo labayentile kanye nelitsemba labanalo.

 [Sitfombe ekhasini 2, 3]

Carmen kanye nebantfwana bakhe lababili bakha emanti emfuleni