LIVI LANKULUNKULU liyasicinisekisa: “Labandzindzako bangeke bakhohlakale phakadze naphakadze.” (Tihlabelelo 9:18) LiBhayibheli liphindze lisho naku ngeMdali wetfu: “Uvula sandla sakho, wesutsise tonkhe tifiso talokuphilako.” (Tihlabelelo 145:16) Lelitsemba leliseVini laNkulunkulu alisilo liphupho. Nkulunkulu Somandla angenta loko lokudzingekako kute acedze buphuya. Bantfu labaphuyile badzingani?

Lesinye sati setemnotfo sase-Afrika satsi emave laphuyile adzinga “umholi lonemusa.” Kute buphuya buphele, kudzingeka umuntfu lonemandla kanye nemusa. Lombusi longakhona kucedza buphuya kufanele abuse umhlaba wonkhe ngobe esikhatsini lesinyenti buphuya bubangelwa kutsi emave akazuzi ngelizinga lelifananako. Ngetulu kwaloko, kufanele ente lokutsite ngembangela yebuphuya​—lokubugovu bebantfu. Singamtfolaphi umbusi lonjena?

Nkulunkulu watfuma Jesu kutsi ayise tindzaba letimnandzi kubantfu labaphuyile. Ngesikhatsi Jesu achaza lomsebenti Nkulunkulu labemtfume wona, watsi: “Umoya weNkhosi ukimi, ngobe ungigcobile kutsi ngishumayele tindzaba letimnandzi etimphuyeni.”​—Lukha 4:16-18.

Tiyini Letindzaba Letimnandzi?

Nkulunkulu ubeke Jesu kutsi abe yiNkhosi. Leti tindzaba letimnandzi mbamba. Jesu unguMbusi lokhetsekile lotawucedza buphuya ngobe (1) utawubusa bonkhe bantfu futsi unemandla; (2) uyabahawukela bantfu labaphuyile futsi ufundzisa balandzeli bakhe kutsi babanakekele; futsi (3) angakususa loko lokubangele buphuya, lokusifiso setfu sebugovu lesisitfole njengelifa. Asesihlole letici letintsatfu taletindzaba letimnandzi.

1. Kubusa kwaJesu tonkhe tive LiVi laNkulunkulu litsi ngaJesu: “Wanikwa emandla ekubusa . . . bonkhe bantfu, netive, nebantfu bato tonkhe tilwimi bakhotsama kuye bamkhonta.” (Danyela 7:14) Uyabubona yini buhle bekuba nahulumende lowodvwa lotawubusa bonkhe bantfu? Bantfu angeke basabanga imicebo yemhlaba nobe bahlupheke. Bonkhe bantfu batawuzuza ngalokufananako. Jesu wasicinisekisa ngekutsi utawuba nguMbusi wemhlaba wonkhe lonemandla ekwenta lushintjo. Watsi: “Ngiphiwe emandla onkhe ezulwini nasemhlabeni.”​—Matewu 28:18.

2. Jesu uyabahawukela bantfu labaphuyile Ngesikhatsi alapha emhlabeni, Jesu wabahawukela bantfu labaphuyile. Nasi sibonelo: Lomunye make lowasebentisa konkhe labenako kute atfole kwelashwa, watsintsa ingubo yaJesu anelitsemba lekutsi utawuphila. Abesagule iminyaka lengu-12 anesifo sekopha futsi akungabateki kutsi besekete ingati leyenele emtimbeni wakhe. UMtsetfo bewutsi wonkhe umuntfu lamtsintsako abetawuba ngulongcolile. Kodvwa Jesu waba nemusa kuye. Watsi: “Ndvodzakati yami, kukholwa kwakho kukuphilisile. Hamba ngekuthula, uphile esifeni sakho.”​—Makho 5:25-34.

Timfundziso taJesu tinemandla ekushintja indlela bantfu labacabanga ngayo kute nabo babe nemusa. Nasi sibonelo: Asewucabange ngendlela Jesu layiphendvula ngayo lendvodza lebeyifuna kwati kutsi ingamjabulisa njani Nkulunkulu. Lendvodza beyati kutsi Nkulunkulu ufuna kutsi sitsandze bomakhelwane betfu, kodvwa yabuta Jesu nangumbuto: “Ngubani makhelwane wami?”

Nakayiphendvula, Jesu wasebentisa umfanekiso wakhe lodvumile lomayelana nemuntfu labephuma eJerusalema aya eJerikho lowahlaselwa tigebengu tamshiya “asatawufa.” Umphristi lobekehla ngaleyo ndlela wagega nakambona.  NemLevi wenta lokufananako. “Kepha umSamariya lotsite labehamba ngaleyo ndlela wamkhandza; watsi kube ambone lomuntfu, wamhawukela.” Wesula emanceba akhe, wamtsatsa wamyisa endlini yetihambi, wase unika lomnikati walendlu imali yekutsi amnakekele. Jesu wambuta: “Ngubani-ke . . . longatsi waba ngumakhelwane kulomuntfu lowahlaselwa tigebengu?” Waphendvula watsi: “Ngulona lowaba nesihawu kuye”. Jesu wase utsi: “Hamba, nawe wente njalo!”​—Lukha 10:25-37.

Bantfu lababa boFakazi BaJehova bafundza emaciniso aJesu lafanana nalawa bese bashintja indlela labacabanga ngayo ngekusita labo labeswele. Nasi sibonelo: Naku umbhali waseLatvia lakubhala encwadzini yakhe letsi Women in Soviet Prisons mayelana nesifo lebesimphetse ngesikhatsi asebenta ePotma lokuyinkambu yekujeziswa ngabo-1960: “Ngesikhatsi ngigula [boFakazi] bebanginakekela ngekutimisela. Loku bekukunakekelwa lebengikudzinga kakhulu.” Wachubeka watsi: “BoFakazi BaJehova bebakwenta umsebenti wabo kusita bonkhe bantfu, ngisho nobe bakuyiphi inkholo nobe baphuma kusiphi sive.”

Ngesikhatsi tinkinga temnotfo tibangela boFakazi BaJehova base-Ancón, e-Ecuador kutsi baphelelwe yimisebenti, labanye boFakazi bacabanga indlela yekubatfolela imali; bebapheka kudla bese bakutsengisela badwebi betinhlanti labebabuya kuyodweba ebusuku (labavetwe esitfombeni lesisesandleni sekudla). Bonkhe ebandleni bebabambisana, lokufaka ekhatsi nebantfwana. Bebacala kupheka ngensimbi yekucala entsatsakusa kute kutsi badwebi nabefika ngensimbi yesine bakhandze kudla sekulungile. Lemali lebebayitfola bebayehlukanisa bacabangela tidzingo temndeni ngamunye.

Lokuhlangenwe nako lokufanana naloku kuveta kutsi sibonelo kanye netimfundziso taJesu tinemandla ekushintja indlela bantfu labacabanga ngayo kute basite labeswele.

3. Jesu unemandla ekugucula simo sebantfu Umkhuba webantfu wekuba nebugovu uyintfo sonkhe lesiyatiko futsi lesesiyemukele. LiBhayibheli liwubita ngekutsi sono. Umphostoli Pawula wabhala: “Ngako ngikhandza kutsi kunemtsetfo losebenta kimi: Nangifuna kwenta lokulungile, lokubi kunami shaqa.” Wachubeka watsi: “Ngitawukhululwa ngubani mine kulomtimba wekufa? Akabongwe Nkulunkulu ngeNkhosi yetfu Jesu Khristu!” (Roma 7:21-25) Kulamavi, Pawula abekhuluma ngendlela Nkulunkulu latawumsebentisa ngayo Jesu kute akhulule tikhonti takhe teliciniso emikhubeni yesono, lokubugovu lobubangele buphuya. Kutawukwenteka njani loku?

Ngemuva kwesikhashana Jesu abhajatisiwe, Johane uMbhabhatisi wametfula, watsi: “Nalo liWundlu laNkulunkulu lelisusa sono selive!” (Johane 1:29) Masinyane umhlaba utawugcwala bantfu labakhululwe esonweni, kanye nasekubeni nebugovu. (Isaya 11:9) Jesu utawube sekakususile loko lokubangele buphuya.

Kutawuba mnandzi kakhulu kuphila ngesikhatsi lapho bonkhe bantfu batawube banako konkhe labakudzingako. LiVi laNkulunkulu litsi: “Bonkhe bantfu bayawuhlala ngekuthula ngulowo nalowo esivinini sakhe nasemikhiweni yakhe, kubete lobesabisako.” (Mikha 4:4) Lamavi achaza sikhatsi lapho bonkhe bantfu batawube banemisebenti leyenetisako, kulondzeka, futsi bajabulela kuphila emhlabeni lote buphuya. Loku kutawuletsa ludvumo kuJehova.