“Ngiyatitondza tindlela letimbi.”​—HLA. 119:128.

1, 2. (a) Nawufuna sicondziso lesitawukusita ufike endzaweni letsite, ngusiphi secwayiso longajabulela kusitfola, futsi kungani? (b) Ngutiphi tecwayiso Jehova latiniketa labo labamkhontako, futsi kungani?

 ASESITSI kufanele uye endzaweni letsite. Kute utfole ticondziso tendlela lokufanele uhambe ngayo, uya kumngani wakho lometsembako loyatiko lendzawo loya kuyo. Njengobe akulayela, angase atsi: “Uligadze-ke lelo jika, ngobe luphawu lolukulo luyalahlana. Bantfu labanyenti bayalilandzela bese bayalahleka.” Bewutawusijabulela yini lesecwayiso lakuniketa sona futsi usilalele? Jehova ufanana naloyo mngani kitsi. Usiniketa ticondziso letihlakaniphile tekutsi singakutfola njani kuphila lokuphakadze, futsi uphindze asecwayise nangetingoti letingasenta sihambe ngendlela lengakafaneli.​—Dut. 5:32; Isa. 30:21.

² Kulesihloko kanye nakulesilandzelako, sitawucoca ngetingoti Nkulunkulu Jehova, uMngani wetfu, lasecwayisa ngato. Kufanele sikhumbule kutsi Jehova usiniketa letecwayiso ngesizatfu sekutsi unendzaba natsi futsi uyasitsandza. Ufuna sifike endzaweni lesiya kuyo. Uva buhlungu nakabona bantfu bavumela kuyengwa futsi balahleka. (Hez. 33:11) Kulesihloko, sitawucoca ngetingoti letintsatfu. Ingoti yekucala ivela kulabanye bantfu, kantsi yesibili ivela kitsi. Ingoti yesitsatfu ayiphatseki, kodvwa iyingoti lenkhulu. Kufanele sitati kahle letingoti kanye naloko Babe wetfu wasezulwini lasifundzisa kona kute sitibalekele. Lomunye umhlabeli lobekaphefumulelwe watsi kuJehova: “Ngiyatitondza tindlela letimbi.” (Hla. 119:128) Nawe utiva ngendlela lefananako yini? Ase sibone kutsi singayikhulisa njani imiva lenjalo, futsi sente ngekuvumelana nayo.

Ungalilandzeli “Linyenti”

3. (a) Kungani kungase kube yingoti kulandzela labanye bashayeli nangabe singayati indlela? (b) Ngusiphi simiso lesibalulekile lesisitfola ku-Eksodusi 23:2?

³ Nawutsatsa luhambo loludze, yini longayenta nangabe ungaciniseki ngendlela lokufanele uhambe ngayo? Ungase ulingeke kutsi ulandzele labanye bashayeli​—ikakhulukati nangabe ubona labanyenti babo benta sincumo lesifananako. Kwenta kanjalo kuyingoti. Kungenteka kutsi labashayeli lobabonako abayi lapho wena uyakhona, nobe kungenteka kutsi nabo balahlekile. Njengobe sikhuluma ngalendzaba, cabanga ngesimiso lesisekela lomunye wemitsetfo leyaniketwa ema-Israyeli asendvulo. Labo labebakhonta njengebehluleli nobe labo labebebaba bofakazi etindzabeni temtsetfo, bebacwayiswa ngengoti ‘yekulandzela linyenti.’ (Fundza Eksodusi 23:2.) Kuliciniso kutsi kumelula ngebantfu labanesono kuyengwa bontsanga, bese bephula umtsetfo. Nanobe kunjalo, lesimiso lesimayelana nekubalekela kulandzela linyenti sisebenta kuphela etindzabeni temtsetfo yini? Cha!

4, 5. BoJoshuwa naKhalebi bacindzetelwa njani kutsi balandzele linyenti, kodvwa yini leyabasita kutsi bakwati kumelana nako?

⁴ Kucindzetelwa kutsi ‘silandzele linyenti’ kungavela nobe kunini. Kungavela singakalindzeli, futsi kungase kube matima kumelana nako. Nasi sibonelo: Cabanga ngekucindzetelwa bontsanga boJoshuwa naKhalebi labake bahlangabetana nako. Bebakulelicembu lemadvodza  langu-12 lelatfunywa kutsi liyewuhlola liVe Lesetsembiso. Nasebabuyile, emadvodza lalishumi aletsa umbiko lomubi lobewucedza emandla. Aze atsi labanye bebantfu labebahlala kulelo live bebatidlakela letitalwa ngemaNefili, bantfwana betingilosi letahlubuka. (Gen. 6:4) Loko labakusho bekute ingcondvo. Ngobe letidalwa letimbi betibhujiswe kuZamcolo emakhulwini eminyaka ngembikwaloku, futsi atizange tishiye bantfwana. Kodvwa ngisho nembono lote sisekelo njengalona ungaba nemandla kubantfu labangakacini ekukholweni. Lemibiko lemibi leyaletfwa nguletinhloli letilishumi yavele yenta bantfu bacala kwesaba. Ngekushesha ngemuva kwaloko, labanyenti babo besebaciniseka ngekutsi bekungaba liphutsa kulalela sicondziso saJehova sekungena eVeni Lesetsembiso. BoJoshuwa naKhalebi bentani njengobe besebakulesimo?​—Num. 13:25-33.

⁵ Abazange balandzele linyenti. Nanobe sicumbi sebantfu besingafuni kulalela, lamadvodza lamabili asitjela liciniso futsi abambelela kulo, ngisho nalapho esatjiswa ngekugcotjwa ngematje. Basitsatsaphi lesibindzi lesingaka? Asingabati kutsi baba naso ngesizatfu sekukholwa kwabo. Bantfu labanekukholwa bayakwati kwehlukanisa emkhatsini wetinsolo tebantfu letite sisekelo kanye nasetetsembisweni taNkulunkulu Jehova letingcwele. Ngekuhamba kwesikhatsi, omabili lamadvodza aveta indlela labetiva ngayo ngelikhono laJehova lekugcwalisa tonkhe tetsembiso takhe. (Fundza Joshuwa 14:6, 8; 23:2, 14.) BoJoshuwa naKhalebi bebanebuhlobo lobusedvute naNkulunkulu wabo lowetsembekile, futsi bebangafuni kumvisa buhlungu ngekutsi balandzele sicumbi sebantfu lesite kukholwa. Ngesizatfu saloko, bahlala bacinile, futsi basibekela sibonelo lesihle lamuhla.​—Num. 14:1-10.

6. Ngutiphi tindlela lesingacindzetelwa ngato kutsi silandzele linyenti?

⁶ Kuke kwenteke yini utive ucindzetelwa kutsi ulandzele linyenti? Lamuhla, banyenti bantfu labehlukaniswe naJehova futsi labangatinaki timiso takhe tekutiphatsa. Nakutiwa etindzabeni tekutijabulisa, labo bantfu bavame kukhutsata imibono lete sisekelo. Bangase batsi kutiphatsa lokubi, budlova, kanye nekusebentelana nemimoya lokugcwele etinhlelweni te-TV, kumabhayisikobho, kanye nasemidlalweni yema-video, kute ingoti. (2 Thim. 3:1-5) Nawukhetsa tekutijabulisa kwakho kanye nekwemndeni wakho, uyavuma yini kutsi tincumo lotentako kanye nanembeza wakho kuhungwe bonembeza labangcolile balabanye bantfu? Kwenta kanjalo angeke yini kukubangele kutsi ulandzele linyenti?

7, 8. (a) Singayicecesha njani ‘imicondvo’ yetfu, futsi kungani kuceceshwa lokunjalo kuncono kunekumane wente loko labanye labakwentako? (b) Kungani ujabula nawubona sibonelo lesihle lesibekwa ngemaKhristu lasemasha lamanyenti?

 ⁷ Jehova usinikete sipho lesiligugu kakhulu lesingasisita nasenta tincumo. Lesipho ‘ngumcondvo lohlutekile.’ Nanobe kunjalo, kufanele siwuceceshe ngekuwusebentisa. (Heb. 5:14) Angeke sikwati kuba nemicondvo lehlutekile nangabe simane senta loko labanye bantfu labakwentako, nobe nangabe silindzela kutjelwa ngulabanye kutsi senteni. Kungako bantfu baJehova banganiketwa luhla lwemafilimu, tincwadzi, kanye nemakheli e-Internet lokufanele bangawabuki. Sizatfu saloko sikutsi lelive lishintja ngekushesha, luhla lolunjalo belungase ludzinge kushintjwa lusandza kwentiwa. (1 Khor. 7:31) Ngetulu kwaloko, bekutawusincisha litfuba lekwenta umsebenti lobalulekile, lokukuhlolisisa timiso teliBhayibheli ngemthandazo, kanye nekwenta tincumo letisekelwe kuleto timiso.​—Ef. 5:10.

⁸ Kuliciniso kutsi tincumo tetfu letisekelwe eBhayibhelini tingabangela kutsi singatsandvwa ngulabanye bantfu. Labasha labangemaKhristu, bangase bacindzetelwe ngulabo labafundza nabo kutsi bente loko lokwentiwa bantfu bonkhe. (1 Phet. 4:4) Ngako-ke, kuyajabulisa kubona emaKhristu, lamasha kanye nalamadzala alingisa kukholwa kwaJoshuwa naKhalebi ngekutsi angavumi kulandzela linyenti.

Ungalandzeli ‘Inhlitiyo Nemehlo Akho’

9. (a) Nawutsetse luhambo, kungani kungaba yingoti kulandzela tifiso takho? (b) Kungani umtsetfo lokuNumeri 15:37-39 bewubalulekile kubantfu baNkulunkulu basendvulo?

⁹ Ingoti yesibili lesitawucoca ngayo ivela kitsi. Asewucabange nganaku: Asesitsi uya endzaweni letsite futsi uphetse libalave kute likusite ukwati kufika lapho uya khona. Yini lebeyingenteka kube bewungakhetsa kungalisebentisi kodvwa kunaloko ukhetse kulandzela tifiso takho, futsi uhambe ngendlela lebonakala iyinhle kuwe? Loko bekutawukwenta kutsi ungafiki lapho ufuna kuya khona. Mayelana naloku, cabanga ngalomunye umtsetfo Jehova lawuniketa ema-Israyeli asendvulo. Bantfu labanyenti lamuhla bakutfola kumatima kucondza kutsi kungani ema-Israyeli bekufanele afake timvakaza kanye nelucotfo loluluhlata kwesibhakabhaka etingutjeni tawo. (Fundza Numeri 15:37-39.) Uyabona yini kutsi kungani lomtsetfo bewubalulekile? Kuwulalela bekwenta kutsi bantfu baNkulunkulu batigcine behlukile kuletinye tive lebetingamkhonti. Loko bekubaluleke kakhulu kute bahlale bemukeleka kuJehova. (Lev. 18:24, 25) Nanobe kunjalo, lomtsetfo uphindze uvete lenye ingoti levela kitsi lengasenta siphambuke endleleni leya ekuphileni lokuphakadze. Loku kungenteka njani?

10. Jehova uvete njani kutsi uyabacondza bantfu?

¹⁰ Ngesikhatsi Jehova akhipha lomtsetfo, nasi sizatfu lasitjela bantfu bakhe: “Khona ningetiwuba tingwadla ngekudvonswa tinkhanuko tetinhlitiyo tenu netemehlo enu.” Jehova ubacondza kahle bantfu. Wati kahle kutsi kumelula kakhulu ngetinhlitiyo tetfu kutsi tiyengwe nguloko lesikubuka ngemehlo etfu. Ngako-ke, liBhayibheli liyasecwayisa: “Inhlitiyo iyayengana ngetulu kwato tonkhe tintfo, futsi yonakele ngalokwengcile. Ngubani nje longayicondza?” (Jer. 17:9) Uyabona yini kutsi lesecwayiso Jehova lasiniketa ema-Israyeli besifaneleka kangakanani? Jehova bekati kahle kutsi ema-Israyeli abengalingeka kutsi abuke bantfu baletinye tive futsi ayengwe nguloko lakubonako. Abengase afune kufanana nalabantfu labangamkhonti Nkulunkulu ngekutsi acabange, ative, futsi ente tintfo njengabo.​—Taga 13:20.

11. Tintfo lesitibonako tingasiyenga ngayiphi indlela?

¹¹ Lamuhla, kumelula kakhulu kutsi tinhlitiyo tetfu tiyengwe nguloko lesikubonako. Siphila eveni lelenta kube melula kutsi silandzele tifiso tenyama yetfu. Ngako-ke, singasisebentisa njani simiso lesitfolakala kuNumeri 15:39? Cabanga ngaloku: Nangabe bantfu lofundza nabo, losebenta nabo, nobe labo labasemmangweni wakini bagcoka ngendlela lengakazitsi, wena utawutsintseka yini? Utawulingeka yini kutsi ulandzele ‘inhlitiyo kanye nemehlo akho’ futsi  uyengwe nguloko lokubonako? Utawulingeka yini kutsi ushintje indlela yakho yekugcoka bese ugcoka njengabo?​—Rom. 12:1, 2.

12, 13. (a) Yini lokufanele siyente nangabe sihle sifisa kubuka tintfo letimbi? (b) Yini lengasichuba kutsi sibalekele kwenta tintfo letingakhuba labanye?

¹² Kubalulekile kutsi sifundze kutibamba. Nangabe sihle sifisa kubuka tintfo letimbi, kufanele sikhumbule sincumo lesentiwa nguJobe, indvodza leyetsembekile. Wenta sivumelwane nemehlo akhe, kutsi angeke ambuke ngenkhanuko umuntfu lomsikati langakashadi naye. (Jobe 31:1) Ngendlela lefananako, iNkhosi Davide yenta nasi sincumo: “Angeke ngibuke nobe yini lengasiti ngalutfo.” (Hla. 101:3, NW.) Tonkhe tintfo letingalimata nembeza wetfu kanye nebuhlobo betfu naJehova titintfo ‘letingasiti ngalutfo.’ Loku kungafaka ekhatsi nobe nguyiphi intfo lesiyibukako lengasenta sibe nesifiso lesibi, bese isiholela ekwenteni lokubi.

¹³ Ngakulokunye, kufanele sikubalekele kuba bantfu ‘labangasiti ngalutfo,’ ngekutsi sente tintfo letingalinga labanye kutsi bente lokubi. Ngako-ke, kufanele sisilalelisise seluleko seliBhayibheli lesiphefumulelwe sekugcoka timphahla letihloniphekile naletizitsile. (1 Thim. 2:9) Kute sigcoke ngendlela lezitsile, akukafaneli sicabangele loko lesikutsandzako kuphela. Kufanele sicabangele bonembeza balabanye kanye naloko lokungabalimata, futsi sifune kujabulisa bona kunekutijabulisa tsine. (Rom. 15:1, 2) Ebandleni lebuKhristu kunalabasha labanyenti lababeka sibonelo lesihle kulendzaba. Kusijabulisa kakhulu kubona kutsi abalandzeli ‘tinhlitiyo kanye nemehlo abo,’ kunaloko bakhetsa kujabulisa Jehova kuko konkhe labakwentako​—ngisho nasendleleni yabo yekugcoka.

Ungalandzeli Tintfo ‘Letingenamsebenti’

14. Ngusiphi secwayiso Samuweli lasikhipha mayelana nekuphishanekela tintfo ‘letingenamsebenti’?

¹⁴ Asewuphindze uticabange usachubeka neluhambo lwakho futsi wendlula ehlane lelikhulu. Utsi usahamba ucabange kutsi ubona emanti, kantsi akusiwo. Yini lebeyingenteka kube bewungaphambuka kute ulandzele lentfo loyibonako? Kwenta kanjalo bekungafaka kuphila kwakho engotini! Jehova uyati kutsi kwenta kanjalo kuyingoti kangakanani. Cabanga nganasi sibonelo: Ema-Israyeli abefuna kufanana naletinye tive letatibuswa ngemakhosi labantfu. Ecinisweni, leso sifiso besisono lesikhulu, ngobe sawenta angasamemukeli Jehova njengeNkhosi yawo. Nanobe Jehova awavumela kutsi abe nenkhosi, wasebentisa Samuweli umphrofethi wakhe kutsi awanikete secwayiso lebesimayelana nekuphishanekela tintfo ‘letingenamsebenti.’​—Fundza 1 Samuweli 12:21.

15. Ema-Israyeli atiphishanekela ngayiphi indlela tintfo letingenamsebenti?

¹⁵ Kungenteka yini kutsi ema-Israyeli abecabanga kutsi inkhosi  lengumuntfu incono futsi ingetsenjwa kakhulu kunaJehova? Nangabe kunjalo, abephishanekela intfo lengenamsebenti, futsi bekungaba melula kutsi anake letinye tintfo letingenamsebenti letivela kuSathane. Emakhosi awo abengawenta kutsi akhonte titfombe. Bantfu labakhonta titfombe bacabanga kutsi labonkulunkulu babo labakhiwe ngelugodvo nobe ngematje bangabetsemba ngobe bayababona. Abametsembi Nkulunkulu Jehova longabonakali, nalowadala tonkhe tintfo. Nanobe kunjalo, umphostoli Pawula watsi tithico ‘atiphili.’ (1 Khor. 8:4) Atikwati kubona, kuva, kukhuluma, nobe kwenta tintfo letitsite. Kuliciniso kutsi ungakwati kutibona futsi utitsintse, kodvwa kutikhonta kungasho kutsi uphishanekela intfo lengenamsebenti nalengasiko kuhlakanipha, futsi letawukuletsela imiphumela lemibi.​—Hla. 115:4-8.

16. (a) Lamuhla, Sathane ubayenga njani bantfu labanyenti kutsi baphishanekele tintfo letingenamsebenti? (b) Kungani singase sitsi umcebo uyintfo lengenamsebenti, ikakhulukati nasiwucatsanisa naNkulunkulu Jehova?

¹⁶ Sathane unebucili futsi usatimisele kuyenga bantfu kutsi bafune tintfo letingenamsebenti. Sibonelo saloku kutsi uyenge bantfu labanyenti kutsi baphishanekele umcebo kute batfole kulondzeka. Imali, tintfo letinyenti, kanye nemsebenti loholela kahle kungabonakala kuletsa tinzuzo letinyenti. Kodvwa umcebo uzuzisa ngani lapho umuntfu agula, simo semnotfo sihhohloka nobe lapho kuvela tehlakalo? Uzuzisa ngani lapho umuntfu ativa angakenetiseki futsi adzinga kutfola injongo yekuphila, sicondziso, kanye netimphendvulo temibuto lebalulekile ekuphileni? Ungakwati yini kumsita umuntfu lapho afa? Nangabe silindzele kutsi umcebo usisite ekwatini Nkulunkulu, sitawudvumateka. Umcebo awukwati kusindzisa umuntfu, umane nje uyintfo lengenamsebenti. Angeke ukwati kusenta sijabule, nobe uvimbele kugula kanye nekufa. (Taga 23:4, 5) Nanobe kunjalo, Jehova unguNkulunkulu lokhona mbamba nalesingametsemba. Nangabe sinebuhlobo lobucinile naye, sitawukwati kutfola kulondzeka lokungukonakona. Loku kusibusiso lesikhulu kakhulu! Asingalokotsi simshiye Nkulunkulu ngekufuna tintfo letingenamsebenti.

17. Yini lotimisele kuyenta mayelana naletintfo letiyingoti lesifundze ngato?

¹⁷ Sijabula kakhulu ngekutsi Jehova unguMngani wetfu futsi uyasicondzisa endleleni leya ekuphileni lokuphakadze. Nasichubeka silalela tecwayiso takhe telutsandvo letimayelana nekulandzela linyenti, tinhlitiyo tetfu, kanye netintfo letingenamsebenti sitawukwati kutfola kuphila lokuphakadze. Esihlokweni lesilandzelako, sitawucoca ngaletinye tecwayiso letintsatfu Jehova lasiniketa tona kute asisite sitondze futsi sibalekele tindlela letimbi lesetidukise labanyenti.​—Hla. 119:128.

Ucabangani?

Letimiso letivetwe kulemiBhalo lelandzelako ungatisebentisa njani ekuphileni kwakho?

• Eksodusi 23:2

• Numeri 15:37-39

• 1 Samuweli 12:21

• Tihlabelelo 119:128

[Imibuto Yesihloko Lesifundvwako]

[Sitfombe ekhasini 11]

Kuke kwenteke yini ulingeke kutsi ulandzele linyenti?

[Sitfombe ekhasini 13]

Kungani kuyingoti kulandzela tifiso takho?

[Sitfombe ekhasini 14]

Uphishanekela tintfo letingenamsebenti yini?