Fundzisa Bantfwabakho

Gehazi Wawiswa Bugovu

WAKE wafisa yini kutsi ube nentfo letsite ngenhlitiyo yakho yonkhe?— a Nakunjalo, awuwedvwa kodvwa loko kusho kutsi kufanele ucale emanga yini kuze utfole lokufunako?— Cha, akukafaneli. Umuntfu lowenta njalo uligovu. Ase sibone kutsi bugovu bamlahlekisela njani Gehazi lutsandvo lwaNkulunkulu. Abeyinceku ya-Elisha umphrofethi waNkulunkulu Jehova.

Elisha naGehazi baphila kadzeni cishe eminyakeni lengaba yinkhulungwane ngembikwekutsi kutalwe Jesu indvodzana yaNkulunkulu. Jehova wasebentisa Elisha kutsi ente timangaliso. Sibonelo saloko kutsi liBhayibheli lisitjela ngendvodza lebalulekile yaseSiriya lebeyinesifo lesibi lokutsiwa bulephelo. Kute umuntfu lowakhona kuyelapha ngaphandle kwa-Elisha.

Njengobe Elisha asetjentiswa nguNkulunkulu kutsi asite bantfu, akazange ababhadalise. Uyati yini kutsi kungani?— Kungobe Elisha bekati kutsi letimangaliso tivela kuJehova—hhayi kuye. Nasalaphekile Namani, wajabula kakhulu kangangekutsi abefuna kupha Elisha sipho segolide, lisiliva netimphahla letinhle. Elisha akatitsatsanga letipho kodvwa Gehazi yena bekatifuna ngenhlitiyo yakhe yonkhe.

Nasahambile Namani, Gehazi wamlandzela wangasho ku-Elisha kutsi uyaphi. Nakafika kuNamani, uyati yini kutsi wafike watsini?— Watsi: ‘Elisha ungitfume kuwe watsi ngikutjele kutsi ufikelwe tivakashi letimbili. Ucela kutsi amuphe timphahla kuze atiphe lamajaha.’

Lawo bekungemanga. Gehazi bekacala emanga nakatsi kufike emajaha lamabili. Wacala emanga ngobe abefuna kutfola letimphahla  Namani labefuna kutipha Elisha. Kuliciniso kutsi Namani bekangati kutsi Gehazi ucala emanga, wajabula kakhulu waniketa Gehazi letipho. Namani wamniketa tintfo letinyenti kwendlula leti labeticelile. Uyati kutsi yini leyenteka ngemuva kwaloko?—

Nakabuya Gehazi, Elisha wambuta watsi: “Uphumaphi?”

Gehazi wamphendvula watsi: “Bengingakayi ndzawo.” Nobe kunjalo, Jehova wenta kutsi Elisha ati kutsi Gehazi wenteni. Ngako, Elisha watsi: “Lesikhatsi lesi ngiso yini sikhatsi sekwemukela timali, netimphahla?”

Gehazi watitsatsela imali netimphahla lokungesito takhe. Ngako Nkulunkulu wenta kutsi bulephelo baNamani bunamatsele kuGehazi. Ucabanga kutsi yini lesingayifundza kulendzaba?— Lenye yetintfo lendzaba lesifundzisa yona kutsi singacali emanga futsi sakhe indzaba lengekho.

Yini indzaba Gehazi akha indzaba lengemanga?— Kungobe Gehazi abenebugovu. Bekafuna kuba netintfo letingesito takhe futsi wetama kutitfola ngekutsi acale emanga. Ngenca yaloko watfola sifo lesibuhlungu lesamphatsa kuphila kwakhe konkhe.

Nembala, Gehazi wahlupheka kwendlula kuba nebulephelo. Uyati kutsi yini leyamenta wahlupheka?— Walahlekelwa kutsandvwa nguNkulunkulu. Shengatsi singahlala singenti tintfo letitasilahlekisela kutsandvwa nguNkulunkulu. Esikhundleni saloko kufanele sibe nemusa futsi sihlanganyele nalabanye tintfo lesinato.

Fundza eBhayibhelini lakho

2 Emakhosi 5:5, 20-27; Juda 21

Johane 15:10

[Umbhalo longentansi]