Ngubani Lova Imithandazo?

NANGABE akhona lova imithandazo, kunengcondvo kutsi unguMdali. NguMdali kuphela lowadala ingcondvo yemuntfu longakhona kufundza imicabango yemuntfu. Ukhona yini lomunye longaphendvula imithandazo futsi anikete bantfu lusito labaludzingako ngaphandle kweMdali? Ungase utibute kutsi, ‘kunengcondvo yini kukholelwa kutsi ukhona uMdali?’

Bantfu labanyenti bacabanga kutsi kuze ukholelwe kuMdali kufanele uphikisane nalokushiwo yisayensi yesimanje. Umbono wekutsi kukholelwa kuNkulunkulu kuphambene nalokushiwo yisayensi awusilo liciniso. Cabanga nganaku lokulandzelako.

◼ Eluhlolweni lwakamuva lolwentiwa bophrofesa labangu-1 646 besayensi nabacoca nebafundzi basemanyuvesi langu-21 lahamba embili eMelika, kwatfolakala kutsi kubafundzi labatsatfu, munye vo umfundzi lowatsi “Angikholelwa kuNkulunkulu.”

Liciniso likutsi bososayensi labanyenti bayakholelwa kutsi Nkulunkulu ukhona.

Bufakazi Bekutsi Ukhona UMdali

Kufanele yini simane sikukholelwe kutsi ukhona uMuvi wemithandazo sibe site bufakazi baloko? Cha. Umbono wekutsi awudzingi bufakazi kuze ukholwe, awusilo liciniso. LiBhayibheli lichaza kukholwa ngekutsi “kukweneliseka ngetintfo lesingakatiboni.” (Hebheru 11:1) Lelinye lihumusho leliBhayibheli litsi kukholwa “kusenta siciniseke ngetintfo letiliciniso nanobe singatiboni.” (I-The New English Bible) Nasi sibonelo, ngeke uwabone emandla ekuhambisa imilayeto ngemoya kodvwa makhalekhikhini wakho wenta kucace kutsi akhona emandla ekwendlulisela emavi; ngako uyacondza kutsi emandla lanjalo akhona. Ngendlela lafanako, nanobe singeke sikhone kumbona Lova imithandazo, singabuka bufakazi lesinabo lobungasicinisekisa kutsi ukhona.

Singabutfola kuphi bufakazi bekutsi Nkulunkulu ukhona? Lokudzingeka sikwente kubuka tintfo latidalile. LiBhayibheli litsi: “Tonkhe tindlu tinebakhi bato, kodvwa Nkulunkulu ungumakhi  wako konkhe.” (Hebheru 3:4) Uyavumelana yini nalokushiwo ngulelivesi? Nawucabanga ngekuhleleka kwendalo, ngemsuka wekuphila, ngendalo letinhlobonhlobo lekhona lamhlabeni nangengcondvo yemuntfu, uyabona kutsi kufanele kutsi ukhona lotsite lomkhulu kunemuntfu. a

Kuncane lesingakufundziswa yindalo ngaNkulunkulu. Kunaka bufakazi bekutsi ukhona Nkulunkulu ngekubuka indalo yakhe kufana nekuva tigi temuntfu losondzela ngasemnyango lovaliwe. Uyeva kutsi kukhona lotsite losemnyango, kodvwa awati kutsi ngubani? Kuze utfole kutsi ngubani lomuntfu losemnyango, kudzingeka kutsi umvulele. Kudzingeka sente lokufanako kuze sitfole kutsi ngubani lowadala tonkhe tintfo.

LiBhayibheli lifana nemnyango wekwati ngaNkulunkulu. Nawulifundza futsi ucabange nangetiphrofetho nekugcwaliseka kwato, utawutfola bufakazi bekutsi Nkulunkulu ukhona. b Ngetulu kwekusinika bufakazi bekutsi Nkulunkulu ukhona, kulandzisa kwalo lokukhuluma ngendlela Nkulunkulu lasebentelana ngayo nebantfu, kukhombisa kutsi unjani uMuvi wemithandazo.

Unjani UMuvi Wemithandazo?

LiBhayibheli litsi uMuvi wemithandazo ungumuntfu longakhona kumati. Kuliciniso kutsi ngumuntfu kuphela longakhona kulalela nekucondza. Kuyasicinisekisa kufundza kutsi: “Wena  uva imithandazo uyiphendvule; bonkhe bantfu bafanele kuta kuwe.” (Tihlabelelo 65:2) UMuvi wemithandazo uva labo labathandaza kuye ngekukholwa futsi unalo libito. LiBhayibheli litsi: “[Jehova] ukhashane nebantfu lababi; kodvwa uyayiva imithandazo yebantfu labalungile.”—Taga 15:29.

Jehova unemiva. ‘UnguNkulunkulu welutsandvo’ ubitwa nangekutsi nguNkulunkulu lojabulako. (2 Khorinte 13:11; 1 Thimothi 1:11) Mayelana nalakwenta ngalesikhatsi kugcwele bubi lamhlabeni, liBhayibheli litsi: “Wadzabuka enhlitiyweni yakhe.” (Genesisi 6:5, 6) Tinkhulumo letitsi Nkulunkulu ubangela kuhlupheka ngobe avivinya bantfu, atisilo liciniso. LiBhayibheli litsi: “Akube khashane naNkulunkulu kuba ngumenti walokubi.” (Jobe 34:10) Nobe kunjalo, ungase utibute kutsi ‘nangabe Nkulunkulu unguMdali longuSomandla, yini indzaba avumela kuhlupheka kutsi kuchubeke?’

Jehova unikete bantfu lilungelo lekutikhetsela futsi loko kusitjela kutsi unguNkulunkulu lonjani. Asilijabuleli yini lilungelo lekuba nenkhululeko yekutikhetsela kutsi sitawuphila njani? Kuyadzabukisa kutsi bantfu labanyenti bayisebentisa kabi inkhululeko yabo batibangele bona kanye nalabanye kuhlupheka. Umbuto lobalulekile lokufanele sicabangisise ngawo ngunangu: Nkulunkulu angakucedza njani kuhlupheka ngaphandle kwekwemuka bantfu inkhululeko yabo? Sitawucoca ngalombuto esihlokweni lesilandzelako.

[Imibhalo lengentansi]

[Libhokisi ekhasini 5]

Ikwenta Ungabate Yini Inkholo?

Lokudzabukisako kutsi inkholo ngiyo leyente bantfu bangabata kutsi ukhona uMuvi wemithandazo loneluvelo. Kufaka kwayo sandla etimphini, ebuphekuleni nekuvumela kuhlukunyetwa kwebantfwana, kwenta kutsi ngisho nebantfu labathandaza njalo batsi “Angikholelwa kuNkulunkulu.”

Yini leyenta kutsi inkholo ibe nesandla etintfweni letimbi? Kalula nje singatsi bantfu labenta lokubi benta tintfo letimbi egameni lenkholo. LiBhayibheli lasho kutsi labanye bantfu bebatakona buKhristu futsi bente tintfo letingatsandvwa nguNkulunkulu. Umphostoli Pawula watjela babonisi labangemaKhristu kutsi: “Emkhatsini wenu kuyawuvela bantfu labayawufundzisa lokuphambene neliciniso badvonse emakholwa lamanyenti alandzele bona.”—Imisebenti 20:29, 30.

Nkulunkulu uyayenyanya inkholo yemanga. Ecinisweni liVi laNkulunkulu liBhayibheli libeka tinkholo temanga licala ‘lengati . . . yabo bonkhe bantfu lababulawako emhlabeni.’ (Sembulo 18:24) Ngesizatfu sekutsi tinkholo temanga tehlulekile kufundzisa bantfu ngaNkulunkulu weliciniso lonelutsandvo, tinelicala kuye.—1 Johane 4:8.

UMuvi wemithandazo uyabevela bantfu labahlupheka ngenca yenkholo. Ngekushesha, lutsandvo lwaNkulunkulu ngebantfu lutamenta ehlulele konkhe kutentisa kwenkholo asebentisa Jesu. Jesu watsi: “Ngalelo langa labanyenti bayakutsi kimi ‘Nkhosi, Nkhosi, asizange siphrofethe yini ngelibito lakho? . . . Kepha ngiyawubaphendvula ngitsi: ‘Angizange nginati. Sukani kimi, nine benti balokubi!”—Matewu 7:22, 23.