Sondzela KuMuvi Wemithandazo

BANTFU labanyenti labatsi bakholelwa kuNkulunkulu bete tizatfu letivakalako tekukholwa kwabo. Abakhoni ngisho nekuchaza kutsi kungani inkholo iyimbangela yetintfo letimbi nekutsi Nkulunkulu ukuvumelelani kuhlupheka. Labakhona kukwenta kuthandaza kuNkulunkulu labangamati.

Nome labanye bangakhoni kuchaza, wena ungakhona kusondzela kuNkulunkulu. Ungakha kukholwa kwakho kuNkulunkulu lomatiko lokutakwenta umtsandze futsi abaluleke kuwe. Kukholwa lokucinile kusekelwe ebufakazini. (Hebheru 11:1) Nawufundza liciniso ngaNkulunkulu ungakhona kumati futsi ukhulume naye njengemngani. Cabanga ngalokwenteke kulabanye lebebavame kuthandaza ngisho nobe bebangabata kutsi Nkulunkulu ukhona.

◼ Patricia lokukhulunywe ngaye esihlokweni sekucala, utsi: “Ngalelinye lilanga, benginebangani bami labacishe babe lishumi lebebacoca ngenkholo. Ngabatjela kutsi ngalelinye lilanga ngaphuma endlini ngashiya babe lebengakholelwa kuNkulunkulu acoca nalomunye Fakazi WaJehova lebekafike ekhaya. Lomunye webangani bami watsi ‘mhlawumbe boFakazi BaJehova bakhuluma liciniso.’

“Lomunye watsi ‘asiyi ngani kulomunye wemihlangano yabo kuze siyotivela?’ Saya kulemihlangano. Nanobe besingabata, labanye betfu bachubeka nekuya kulemihlangano ngesizatfu sekutsi boFakazi bebanebungani.

“Ngalelinye lilanga kuLisontfo ngeva lokutsite lokwangenta ngashintja indlela lebengicabanga ngayo. Lobeketfula inkhulumo wachaza kutsi kungani bantfu bahlupheka. Bengingakase ngive kutsi umuntfu wadalwa ete sono nekutsi sono nekufa kwangena ngemuntfu munye kwase kusakatekela kubo bonkhe bantfu. Lesikhulumi saphindze sachaza nekutsi yini leyenta kwadzingeka kutsi Jesu afe kuze bantfu batfole loko umuntfu wekucala lakulahla. a (Roma 5:12, 18, 19) Kusukela lapho, ngatitfola timphendvulo temibuto lebenginayo. Ngase ngiyacabanga kutsi ‘ukhona mbamba Nkulunkulu lonendzaba natsi.’ Ngachubeka nekutadisha liBhayibheli futsi ngekushesha ngemuva kwaloko ngatfola kwekucala ngca ekuphileni kwami kutsi ngingathandaza kuNkulunkulu lokhona sibili.”

◼ Allan, naye lokukhulunywe ngaye esihlokweni sekucala utsi: “Ngalelinye lilanga boFakazi BaJehova bafika kami, umkami wabemukela ngobe atsandza lendzaba lebebakhuluma ngayo yekuphila phakadze emhlabeni. Ngacasuka. Ngako, ngashiya letivakashi lakatingenisa khona  umkami, ngambita saya ekhishini ngatsi kuye ‘ungayengwa ngulabantfu, awukwati kuvele ukholelwe ngulabakushoko kanjalo nje.’

“Umkami watsi ‘nakunjalo, hamba uye kubo ubakhombise kutsi labakushoko kungemanga.’

“Liciniso likutsi kute lebengingakusho. Bebanemusa futsi bangishiyela incwadzi lekhuluma ngekutsi kuphila kwadalwa yini nobe kwaba khona ngekutigucukela kwemvelo. Inchazelo yayo beyicacile futsi iniketa tizatfu letivakalako lokwangenta ngancuma kutsi kufanele ngati kabanti ngaNkulunkulu. Ngacala kufundza liBhayibheli naboFakazi BaJehova, ngekushesha ngabona kutsi lelikushoko kwehluke kakhulu kuloko bengikucabanga ngenkholo. Njengobe bengifundza ngaJehova, ngacala kuthandaza kuye. Benginemibono leliphutsa, ngako ngathandaza ngicela lusito. Ngiyaciniseka kutsi Jehova wayiphendvula imithandazo yami.”

◼ Andrew, lohlala eNgilandi utsi: “Nanobe benginembono locinile futsi ngiyitsandza kakhulu isayensi, bengikholelwa emfundzisweni yekutigucukela kwemvelo ngobe labanye bantfu batsi iliciniso. Bengiphika kutsi Nkulunkulu ukhona ngenca yato tonkhe tintfo letimbi letentekako.

 “Ngaletinye tikhatsi bengike ngicabange: ‘Nangabe akhona Nkulunkulu, ngifuna kwati kutsi yini leyenta kube netintfo letimbi. Yini indzaba kunebugebengu lobunyenti kangaka netimphi?’ Nangisebumatimeni ngaletinye tikhatsi bengithandaza ngicele lusito kodvwa bengingati kutsi ngikhuluma nabani.

“Ngalawo malanga umuntfu lotsite waniketa umkami lipheshana lelishicilelwa boFakazi BaJehova lelinesihloko lesitsi “Ingabe Lelizwe Liyosinda?” Bengitibuta kanyenti ngaloko. Lelipheshana langenta ngatibuta kutsi ‘kubalulekile yini kunaka timphendvulo teliBhayibheli?’ Ngemuva kwesikhatsi ngitivakashele, lotsite wangipha incwadzi letsi “IBhayibheli—Izwi LikaNkulunkulu Noma Elomuntu?” b Ngatsi nangibona kutsi liBhayibheli liyavumelana nemaciniso esayensi, ngabona sidzingo sekulifundza kabanti. Ngako, ngalesikhatsi lomunye Fakazi WaJehova acela kufundza nami, ngavuma. Njengobe besengiyicondza injongo yaJehova ngativa shengatsi ngimati njengemuntfu sibili, umuntfu lengingacoca naye ngemthandazo ngikhululeke.”

◼ Jan, lowakhula angumphrothestani eLondon utsi: “Butentisi etinkholweni nekuhlupheka kwangenta ngayishiya inkholo. Ngayekela nekufundza ekolishi ngacala kuhlabela nekudlala lugitali kuze ngitentele imali. Satana lapho naPat. Yena abekhuliswe ngemaKatolika, naye wagcina angasakholwa njengami.

“Besihlala endlini lebeyingasahlali muntfu, sihlala nalabanye labambalwa nabo labayekela sikolwa lebebatsandza tinkholo letisemaveni laseMphumalanga yemhlaba. Besihlala kuze kube sebusuku kakhulu sicoca kabanti ngenjongo yekuphila. Nanobe mine naPat besingakholelwa kuNkulunkulu besinemuva wekutsi afanele kuba khona ‘emandla ladalako nobe lasenta siphile’.

“Indvodzana yetfu yatalwa ngemuva kwekutfutsa kwetfu saya enyakatfo yeNgilandi siyewufuna umsebenti njengebahlabeleli. Ngalobunye busuku yagula ngatikhandza sengithandaza kuloNkulunkulu lebengingakholelwa kuye. Ngekushesha ngemuva kwaloko sacabana naPat, ngatsatsa umntfwana ngahamba. Ngaphindze ngathandaza ngicela lusito ngicabanga nje kutsi mhlawumbe kukhona longilalele. Bengingati kutsi naPat uyathandaza.

“Ntsambama ngalelolanga, kwefika boFakazi BaJehova lababili banconcotsa endlini yaPat bamkhombisa seluleko seliBhayibheli. Pat wangibita wangibuta kutsi ngingatsandza yini kufundza liBhayibheli naye naboFakazi. Ngekushesha safundza kutsi nangabe sifuna kujabulisa Nkulunkulu kufanele sishade ngalokusemtsetfweni. Bekubonakala kungumcansa ngenca yekutsi besihlale sicabana.

“Besifuna kwati kabanti ngekugcwaliseka kwetiphrofetho teBhayibheli, imbangela yekuhlupheka nekutsi uyini uMbuso waNkulunkulu. Kancane kancane sabona kutsi Nkulunkulu uyasikhatsalela futsi besifuna kwenta lasitjela kona. Sashada. Kuhlakanipha lokutfolakala eVini laNkulunkulu kusisite sakhulisa bantfwabetfu labatsatfu. Siyaciniseka kutsi Nkulunkulu uyayilalela imithandazo yetfu.”

Tihlolele Wena Bufakazi

Njengobe kwentekile etigidzini talabanye bantfu, laba lokukhulunywe ngabo kulesihloko abazange bakhohliswe yinkholo yemanga futsi batitfolile tizatfu letenta Nkulunkulu avumele kuhlupheka. Unakile yini kutsi ngamunye walabantfu lokukhulunywe ngabo lapha basitwa kulicondza kahle liBhayibheli lokwabenta baciniseka kutsi nembala Jehova uyayiva imithandazo?

Ungatsandza yini kuhlola bufakazi bekutsi Nkulunkulu ukhona? BoFakazi BaJehova batokujabulela kukusita kuze ufundze liciniso ngaJehova nekutsi ungasondzela njani ‘kuMuvi wemithandazo.’—Tihlabelelo 65:2.

[Imibhalo lengentansi]

[Emavi lacashuniwe lasekhasini 10]

“Njengobe besengiyicondza injongo yaJehova ngativa shengatsi ngimati njengemuntfu sibili, umuntfu lengingacoca naye ngemthandazo ngikhululeke”

[Sitfombe ekhasini 9]

Kukholwa mbamba kusekelwe ebufakazini nasesifisweni sekwati liciniso ngaNkulunkulu