Umbuto Lovela Kubafundzi . . .

Uphatseka Njani Nkulunkulu Nangibhema Ligwayi?

▪ Umuntfu lofuna mbamba kwati angase awubute lombuto njengobe ungekho umtsetfo eBhayibhelini lolahla ligwayi. Kutsi awukho umtsetfo lonjalo, kusho kutsi kungaba matima yini kutfola indlela Nkulunkulu lativa ngayo ngekubhema? Cha, ngeke kube matima.

LiBhayibheli litsi: “Yonkhe imiBhalo iphefumulelwe nguNkulunkulu.” (2 Thimothi 3:16) ImiBhalo inetimiso leticacile letiveta indlela Nkulunkulu lafuna siyinakekele ngayo imphilo yetfu. Kwekucala, ase sihlole loko bacwaningi labakutfolile ngemiphumela yekubhema emphilweni yemuntfu. Ngemuva kwaloko sitawuhlola kutsi timiso teliBhayibheli tihlobana njani nalokutfolwe ngulabacwaningi.

Ligwayi lilimata imphilo yalolibhemako futsi libangela kufa lokungavikeleka. EMelika kufa umuntfu munye kulabasihlanu ngenca yekubhema. Ngekusho kwembiko we-National Institute on Drug Abuse, eMelika kubhema kubulala bantfu labanyenti kwendlula bantfu lababulawa “tjwala, kudla tidzakamiva, labafa ngekubulawa, ngekutibulala, ngetingoti temgwaco nalababulawa yi-AIDS.”

Bantfu lababhema ligwayi balimata nebantfu labangalibhemi. Ngisho nekuyihogela kancane nje intfutfu yeligwayi, kuyingoti. Bantfu labangabhemi labahogela intfutfu yeligwayi basematfubeni lamakhulu ekuba nemdlavuza wemaphaphu nesifo senhlitiyo. Muva nje, bodokotela batfole lokunye lokuyingoti ngeligwayi. Butsi lobuyingoti lobusala etimphahleni, kukhaphethi nakuletinye tindzawo umuntfu nakabhema, buhlala sikhatsi lesidze. Buyingoti kakhulu kubantfwana futsi bungaphatamisa likhono labo lekufundza tintfo njengobe bakhula.

Ligwayi liyangenana. Lenta umuntfu lolibhemako abe sigcila salomkhuba loyingoti. Ecinisweni, bacwaningi bakholelwa kutsi i-nicotine, lokuyikhemikhali lenyenti lesegwayini, ngiyo leyenta kube matima kuyekela kubhema.

Timiso teliBhayibheli tihlobana njani nalokushiwo bacwaningi? Naka naku lokulandzelako:

Nkulunkulu ufuna sikuhloniphe kuphila. EMtsetfweni lawuniketa sive sema-Israyeli, watsi umuntfu lofuna kumjabulisa kufanele akuhloniphe kuphila. (Dutheronomi 5:17) Ema-Israyeli bekufanele akhe lutsango lolutawutungeleta luphahla lwetindlu tawo. Kungani bekufanele ente njalo? Luphahla lwetindlu tawo belubekile futsi beluyindzawo yekuphumula. Lolutsango beluvikela bantfu bakulelokhaya nalabanye kutsi bangawi balimale nobe bafe. (Dutheronomi 22:8) Ngetulu kwaloko, ema-Israyeli bekufanele aciniseke kutsi tilwane latifuyile atibalimati labanye bantfu. (Eksodusi 21:28, 29) Umuntfu lobhema ligwayi wephula timiso letisekelwe kulemitsetfo. Ulimata imphilo yakhe ngemabomu aphindze alimate netimphilo talabanye bantfu.

Nkulunkulu ulindzele kutsi simtsandze, sitsandze nabomakhelwane betfu. Jesu watsi balandzeli bakhe kufanele bagcine imiyalo lemibili lemikhulu. Kufanele batsandze Nkulunkulu ngayo yonkhe inhlitiyo yabo, umphefumulo, ingcondvo nangemandla abo baphindze batsandze bomakhelwane babo njengobe batitsandza bona. (Makho 12:28-31) Njengobe kuphila kusipho lesivela kuNkulunkulu, umuntfu lobhemako ukhombisa kungasihloniphi lesipho lesikuphila nekutsi akamtsandzi Nkulunkulu. (Imisebenti 17:26-28) Umuntfu lobhemako angabalimata kakhulu labanye, futsi usuke angakhulumi liciniso nakatsi uyabatsandza bomakhelwane bakhe.

Nkulunkulu ufuna sibalekele imikhuba lengcolile. LiBhayibheli litsi emaKhristu awatihlante “kuko konkhe lokungcolisa umtimba nemoya.” (2 Khorinte 7:1) Kubhema ligwayi kuyamngcolisa umuntfu. Bantfu labafuna kuyekela kubhema kuze bajabulise Nkulunkulu babhekana nensayeya, kodvwa ngekusitwa nguye bangakhona kuyekela kubhema.