Uphatseka njani nawucabanga nga-December 21, 2012, lebekulilanga bantfu labanyenti labebatsi umhlaba wonkhe utawushintja ngalo? Kuye ngekutsi yini lebewugadze kutsi itakwenteka, ungase uve kutsi dlwe, udvumale nobe uphelelwe litsemba. Kungashintji kwemhlaba nga-December 21, 2012 bekungulokunye yini kucombela lokumayelana nekuphela kwelive lokungasilo liciniso?

Kutsiwani ‘ngekuphela kwelive’ lokukhulunywa ngako eBhayibhelini? (Matewu 24:3) Labanye bantfu besaba kutsi umhlaba utawushiswa. Labanye balangatelela kubona lokutakwenteka nakubhujiswa umhlaba. Bantfu labanyenti sebadziniwe kutjelwa kutsi umhlaba utawubhujiswa ngobe loko solo akwenteki. Indlela labativa ngayo ibangelwa kukholelwa tintfo letingasilo yini liciniso?

Kungase kukumangalise lokushiwo liBhayibheli ngekubhujiswa kwemhlaba. LiBhayibheli alikhulumi kuphela ngekutsi kufanele sikulangatelele kubhujiswa kwemhlaba kodvwa liphindze likhulume nangekucindzeteleka lokungaba khona nangabe kubhujiswa kwemhlaba kubonakala kutsatsa sikhatsi lesidze kufika. Sicela ucabange ngetimphendvulo teliBhayibheli ngaleminye imibuto bantfu labavame kuyibuta ngekubhujiswa kwemhlaba.

IMPHENDVULO YELIBHAYIBHELI: “[Nkulunkulu] wasimisa umhlaba etikwetisekelo tawo, kuze ungatanyatanyiswa, phakadze naphakadze.”—TIHLABELELO 104:5.

Umhlaba ngeke ubhujiswe ngemlilo nobe ngalokunye. Esikhundleni saloko, liBhayibheli lifundzisa kutsi lomhlaba lesiphila kuwo ulikhaya lebantfu laphakadze. Tihlabelelo 37:29 titsi: “Labalungile bayawudla lifa lemhlaba, bahlale kulo kuze kube phakadze.”—Tihlabelelo 115:16; Isaya 45:18.

Ngemuva kwekudala umhlaba, Nkulunkulu watsi ‘muhle kakhulu’ futsi nanyalo usativa ngaleyo ndlela ngawo. (Genesisi 1:31) Akakucabangi nakancane kuwubhubhisa. Wetsembisa kutsi ‘utawubabhubhisa babhubhisi bemhlaba,’ futsi utawuvikela umhlaba kuze ungabhujiswa.—Sembulo 11:18.

Ungase utibute ngalokushiwo ngu-2 Phetro 3:7. Lelivesi litsi: “Emazulu nemhlaba lokukhona nyalo kugcinelwe umlilo.” Lamavi asho kutsi utawushiswa yini umhlaba? Ecinisweni, ngaletinye tikhatsi liBhayibheli lisebentisa emagama latsi “emazulu,” “umhlaba” nalelitsi “umlilo” nalibekisa. Sibonelo saloko kutsi Genesisi 11:1 utsi: “Umhlaba wonkhe wawukhuluma lulwimi lunye.” Kulelivesi ligama lelitsi “umhlaba” libhekisele kubantfu.

Kulombhalo wa-2 Phetro 3:7 emazulu, umhlaba nemlilo lokukhulunywa ngako nako kumelela lokutsite. Emavesi 5 na-6 achaza lokwenteka ngaZamcolo wangesikhatsi saNowa. Bantfu lebebaphila ngaleso sikhatsi babhujiswa kodvwa iplanethi lengumhlaba lesihlala kuwo isasekhona. Kunekutsi abhubhise leplanethi lengumhlaba, Zamcolo wakhukhula bantfu labanebudlova nobe “umhlaba.” Zamcolo waphindze wabhubhisa “nemazulu,” lebekubabusi bangaleso sikhatsi. (Genesisi 6:11) Ngendlela lefanako, 2 Phetro 3:7 utsi bantfu lababi nabohulumende labangaketsembeki batawubhujiswa baphele nya.

IMPHENDVULO YELIBHAYIBHELI: “Live liyendlula netinkhanuko talo, kodvwa lowo lowenta intsandvo yaNkulunkulu, uyawuphila kuze kube phakadze.”—1 JOHANE 2:17.

“Live” lelitakwendlula akusiyo leplanethi lengumhlaba lesiphila kuwo kodvwa bantfu labangamlaleli Nkulunkulu. Njengobe dokotela lohlindzako angasusa simila lesibangelwe  ngumdlavuza kuze asindzise kuphila kwesigulane, Nkulunkulu ‘utawushabalalisa’ bantfu lababi kuze bantfu labalungile bajabulele kuphila emhlabeni. (Tihlabelelo 37:9) Ngaleyo ndlela, “kuphela kwelive” kuyintfo lenhle.

Inchazelo lengiyo yekuphela kwelive isekelwa ngisho nangulamanye emahumusho eliBhayibheli lachaza emavi latsi “kuphela kwelive” ngekutsi “kuphela kweluhlelo lwetintfo” nobe ‘kuphela kwetikhatsi.’ (Matewu 24:3) Njengobe kutawusindza bantfu kanye nemhlaba, akunangcondvo yini kutsi kutawulandzela tikhatsi letinsha, lokuluhlelo lolusha lwetintfo? Yebo kunengcondvo loko ngobe liBhayibheli likhuluma kanyenti ‘ngetikhatsi letitako.’—Lukha 18:30.

Jesu wabita lesikhatsi lesitako ngekutsi ‘kudalwa kabusha kwetintfo tonkhe.’ Ngaleso sikhatsi, utabuyisela bantfu esimeni Nkulunkulu labevele asifuna kwasekucaleni. (Matewu 19:28) Ngaleso sikhatsi sitawujabulela

• Umhlaba lophephile lolipharadisi kanye nekuphila kahle.—Isaya 35:1; Mikha 4:4.

• Umsebenti lokahle nalowenetisako.—Isaya 65:21-23.

• Kwelashwa kwato tonkhe tifo.—Isaya 33:24.

• Kucedvwa kwekuguga.—Jobe 33:25.

• Kuvuswa kwalabafile.—Johane 5:28, 29.

Nasenta “intsandvo yaNkulunkulu,” senta loko lakulindzele kitsi, akudzingeki sikwesabe kubhujiswa kwemhlaba. Esikhundleni saloko, singakulangatelela.

IMPHENDVULO YELIBHAYIBHELI: “Nanibona letintfo tenteka, nibokwati kutsi umbuso waNkulunkulu sewutawufika.”—LUKHA 21:31.

Encwadzini yakhe letsi “The Last Days Are Here Again” Profesa Richard Kyle wabhala kutsi “kushintja lokusheshako netiphitsiphitsi temimango kwenta bantfu bacabange kutsi umhlaba uyabhubha” ikakhulukati nangabe loloshintjo nobe siphitsiphitsi kumatima kuchaza imbangela yaso.

Njengobe tintfo letenteka emhlabeni tikhombisa kutsi bantfu labanyenti bayakulangatelela kubhujiswa kwemhlaba, tiphrofetho teliBhayibheli letimayelana nekubhujiswa kwawo tisho lokwehlukile. Sikusho ngani loko? Baphrofethi lababhala ngekubhujiswa kwemhlaba bebangachazi imbangela yetintfo letimbi lebetenteka ngesikhatsi sabo. Esikhundleni saloko, baphefumulelwa nguNkulunkulu kutsi bachaze timo lebetitawukhombisa kutsi  kubhubha kwemhlaba sekusondzele. Cabanga ngaletinye taletiphrofetho bese uyatincumela kutsi tiyagcwaliseka yini esikhatsini lesiphila kuso.

• Timphi, indlala, kutamatama kwemhlaba nelubhubhane lwetifo.—Matewu 24:7; Lukha 21:11.

• Kwenyuka kwelizinga lebugebengu.—Matewu 24:12.

• Bantfu labona umhlaba.—Sembulo 11:18.

• Bantfu bayatitsandza, batsandza imali nenjabulo kunekutsandza Nkulunkulu.—2 Thimothi 3:2, 4.

• Kucitseka kwemiti.—2 Thimothi 3:2, 3.

• Kunganaki kwebantfu kutsi kubhujiswa kwemhlaba kuyasondzela.—Matewu 24:37-39.

• Kushunyayelwa kwetindzaba letimnandzi teMbuso emhlabeni wonkhe.—Matewu 24:14.

Njengobe Jesu asho, nasibona “konkhe loku kwenteka” kufanele sati kutsi kuphela kwelive sekusondzele. (Matewu 24:33) Bofakazi BaJehova bakholelwa kutsi konkhe loku kuyenteka futsi bacoca nalabanye ngalabakukholelwako ngekushumayela emaveni langu-236.

IMPHENDVULO YELIBHAYIBHELI: “Ngesikhatsi bantfu batsi: ‘Kunekuthula nenhlalakahle,’ ngekushesha lokukhulu kubhujiswa kuyawubatuma njengemhelo ufikela umfati nasatawubeleka; futsi kute loyawusindza.”—1 THESALONIKA 5:3.

LiBhayibheli lifanisa kubhujiswa kwemhlaba nekucala kwemhelo, lokubuhlungu lobungavimbeki lobuviwa ngumake lokhulelwe lobufika angakagadzi. Sikhatsi lesiholela ekupheleni naso sifana nekukhulelwa kwamake ngobe make lonjalo uhlale agadze timphawu tekutsi sewutawubeleka. Dokotela wakhe angase amtjele lilanga lokungenteka abeleke ngalo ngisho nome lingendlula, lomake utawuhlale aciniseka kutsi utawubeleka. Ngendlela lefanako, naloku kuphela kusengakafiki njengobe bantfu bakulindzele, loko akukushintji kutsi lankha ‘ngemalanga ekugcina.’—2 Thimothi 3:1.

‘Nangabe kumelula kubona sibonakaliso sekutsi sekusondzele kubhujiswa kwemhlaba, ungase utibute kutsi ‘kwentiwa yini kutsi bantfu labanyenti bangakuboni loko?’ LiBhayibheli liveta kutsi nasekusondzele kubhujiswa kwemhlaba bantfu labanyenti batakutsatsa kancane loko bakwente umdlalo. Kunekutsi banake lushintjo lolukhulu emalangeni ekugcina, batawukhuluma  ngekuphukuta batsi: “Seloku kwalala bobabemkhulu, tonkhe tintfo tihamba njengobe tatinjalo kusukela ekucaleni kwendalo.” (2 Phetro 3:3, 4) Ngalamanye emagama, sesiyabonakala sibonakaliso semalanga ekugcina kodvwa bantfu labanyenti abasinaki.—Matewu 24:38, 39.

Lesihloko sikhulume ngemiBhalo lembalwa lefakazela kutsi kubhujiswa kwemhlaba sekusondzele. a Ungatsandza yini kwati kabanti? Nakunjalo, kungaba njani utsintsane naboFakazi BaJehova ubavumele kutsi bafundze nawe liBhayibheli mahhala. Sifundvo seliBhayibheli singachutjelwa ekhaya lakho, endzaweni lekulungelako nobe nisebentise lucingo. Kuyavunywa kutsi lokufundza kutawudzinga sikhatsi sakho kodvwa lotakufundza kutakushiya ubambe wangentasi.