SIHLOKO SEKUCALA: LOKO LESIKUFUNDZA KUMOSI
Bekangubani Mosi?
Yini lefika engcondvweni yakho nawuva ligama lelitsi Mosi? Ucabanga . . .
-
luswane lolwafakwa ngunina ebhasikidini walufihla eMfuleni iNayili?
-
umfana lowakhuliswa yindvodzakati yaFaro eGibhithe ekhaya lelinjingile kodvwa longakhohlwanga kutsi ungum-Israyeli?
-
indvodza lebeyingumelusi eveni lakaMidiyani iminyaka lengu-40?
-
indvodza leyakhuluma naJehova a embikwesihlahla lesivutsako?
-
indvodza leyabonana buso nebuso nenkhosi yaseGibhithe ngesibindzi yacela kutsi ema-Israyeli akhululwe ebugcilini?
-
indvodza leyacondziswa nguNkulunkulu kutsi imemetele tishayo letilishumi lebetitakwehlela iGibhithe nangabe inkhosi yakhona ingamlaleli Nkulunkulu weliciniso?
-
indvodza leyahola ema-Israyeli nawaphuma eGibhithe?
-
indvodza leyasetjentiswa nguNkulunkulu kutsi yehlukanise Lwandle Lolubovu?
-
indvodza leyaniketa ema-Israyeli iMiyalo Lelishumi levela kuNkulunkulu?
KONKHE loku nalokunye, Mosi wakwenta. Kungaleso sizatfu lendvodza leyetsembekile ihlonishwa kakhulu ngemaKhristu, ngemaJuda nangemaMoslem.
Asingabati kutsi Mosi bekangumphrofethi ‘lowenta imisebenti leyesabekako.’ (Dutheronomi 34:10-12) Wavuma kwenta tabelo letibalulekile letivela kuNkulunkulu. Nome kunjalo, Mosi bekangumuntfu phaca. Njengemphrofethi Elija lowavela embonweni aseceleni kwakhe ngesikhatsi Jesu asemhlabeni, Mosi ‘abengumuntfu lofana natsi.’ (Jakobe 5:17; Matewu 17:1-9) Mosi wahlangabetana netinkinga letinyenti letifana netetfu futsi watincoba.
Ungatsandza yini kwati kutsi watincoba njani? Fundza ngetintfo letinhle letintsatfu letiveta kutsi Mosi bekangumuntfu lonjani nekutsi yini lesingayifundza esibonelweni sakhe.
a Jehova ligama laNkulunkulu njengobe lembulwe eBhayibhelini.
