SIHLOKO LESINGUMGOGODLA | UNGASONDZELANA NANKULUNKULU
Utiva Usondzelene Yini NaNkulunkulu?
“Kusondzelana naNkulunkulu kukwenta utive uvikelekile, wenetisekile, futsi ungesabi. Kuba shengatsi Nkulunkulu uhlale akubukile ngaso sonkhe sikhatsi kuze akwentele lokuhle.”—KUSHO LIJAHA LASEGHANA LOKUTSIWA NGUCHRISTOPHER.
“Nkulunkulu ukubona konkhe kucindzeteleka kwakho, akutsandze kakhulu futsi akunake ngelizinga lebewungeke uze ulicabange.”—KUSHO HANNAH, LONEMINYAKA LENGU-13, LOHLALA E-ALASKA,U.S.A.
“Kwati kutsi usondzelene naNkulunkulu, kuyintfo leligugu kakhulu nalekwenta utive ukhululekile!”—KUSHO LOMUNYE MAKE WASEJAMAICA LOSEMINYAKENI YABO-40, LOKUTSIWA NGUGINA.
Akusibo boChristopher, naHannah, naGina kuphela labativa ngalendlela. Bantfu labanyenti emhlabeni wonkhe nabo bayakholelwa kutsi Nkulunkulu ubatsatsa njengebangani bakhe. Kutsiwani ngawe? Utiva usondzelene yini naNkulunkulu? Nobe ungatsandza kusondzela kuye nobe kusondzelana naye kakhudlwana? Mhlawumbe uyatibuta: ‘Kungenteka yini kutsi umuntfu nje asondzelane naNkulunkulu Somandla? Nangabe kunjalo, loko kungenteka njani?’
SINGAKHONA KUSONDZELANA NANKULUNKULU
Ngekusho kweliBhayibheli, singakhona kusondzelana naNkulunkulu, sibe nebuhlobo naye. LiBhayibheli litsi Nkulunkulu wabita Abrahama ngekutsi ‘ngumngani wakhe.’ (Isaya 41:8) Naka futsi simemo lesiveta umusa lesikuJakobe 4:8 lesitsi: “Sondzelani kuNkulunkulu, naye utawusondzela kini.” Ngako-ke kuyacaca kutsi singakhona kuba nebuhlobo naNkulunkulu, sibe bangani naye. Njengobe Nkulunkulu angabonakali, ‘ungasondzela’ njani kuye futsi ube nebuhlobo lobuhle naye?
Kuze siphendvule lombuto, cabanga ngaloko lokwentekako kuze bantfu babe bangani. Ngalokuvamile kucala ngekutsi bantfu lababili batane emagama abo. Njengobe bavama kucoca, batjelana loko labakucabangako kanye nendlela labativa ngayo, bungani babo buyakhula. Lobungani buyacina nalapho bentelana tintfo letitsite. Kwenteka lokufanako nalapho sakha bungani naNkulunkulu. Asesibone kutsi loku kwenteka njani.
Lokunye Longatsandza Kukuhlola
SICONGOSEKULINDZA
Uyalati Yini Libito LaNkulunkulu Futsi Uyalisebentisa Yini Vele?
Nkulunkulu utetfulile kitsi, watsi: “NginguJehova. Lelo libito lami.”
