Kukhohlakala kwabohulumende kuchazwe ngekutsi kulapho umuntfu lokuhulumende asebentisa kabi ligunya lakhe kuze atizuzise yena. Lenkinga beyisolo ikhona kusukela endvulo. Nasi sibonelo: LiBhayibheli linemtsetfo lotsi bantfu kufanele bangadizelwa nakutekwa emacala, lokukhombisa kutsi lomkhuba besewuvele ukhona ngisho nasesikhatsini lesingetulu kweminyaka lengu-3 500 leyendlulile. (Eksodusi 23:8) Kodvwa-ke inkhohlakalo ayihlanganisi kudizelwa nje kuphela. Ngaletinye tikhatsi tisebenti tahulumende letinenkhohlakalo teba imphahla, tizuze emisebentini lokungakafaneli tizuze kuyo, futsi tebe ngisho nemali. Tingaphindze tisebentise tikhundla tato kuze tihlobo nebangani bato batfole imphatfo lencono.

Ngisho nobe inkhohlakalo ingaba khona kunobe nguyiphi inhlangano yebantfu, kubonakala shengatsi inkhohlakalo letfolakala kubohulumende yimbi kakhulu. Umbiko lowakhishwa yi-“Transparency International” nga-2013 waveta kutsi emhlabeni wonkhe bantfu bacabanga kutsi tindzawo letisihlanu lapho kugcwele khona inkhohlakalo kusemaphathini etepolitiki, emaphoyiseni, etisebentini tahulumende, kubantfu labatishayamtsetfo kanye nasetinkantolo. Ase unake leminye yalemibiko leveta loku.

• E-AFRIKA: Nga-2013, tisebenti tahulumende letingaba ngu-22 000 eNingizimu Afrika tabekwa emacala enkhohlakalo.

• EMELIKA LESENINGIZIMU: Nga-2012, bantfu labangu-25 eBrazil badliwa ngemacala ekusebentisa imali yahulumende kuze batitfolele kusekelwa kutepolitiki. Lomunye walabo labadliwa ngulamacala ngulobekasita mengameli, lokungumuntfu losesikhundleni sesibili ngebukhulu kulelive.

• E-ASIA: ESeoul, leseNingizimu Korea, bantfu labangu-502 bafa ngesikhatsi sitolo lesikhulu siwela etikwabo nga-1995. Baphenyi batfola kutsi baphatsi belidolobha bebadizelwe kuze bavumele tinkapani lebetakha lesitolo kutsi tisebentise khonkolo longekho ezingeni lelifanele futsi tingayilandzeli nemitsetfo yetekuphepha.

• EYUROPHU: Ngekusho kwaCecilia Malmström, longukhomishana wetasekhaya we-European Commission, liyamangalisa lizinga lenkhohlakalo eYurophu. Waphindze washo nekutsi betepolitiki kute labakwentako kuze bacedze lomkhuba.

Inkinga yenkhohlakalo kubohulumende seyinkhulu kakhulu. Phrofesa Susan Rose-Ackerman, losati setindzaba tekulwa nenkhohlakalo wabhala kutsi kuze kube netingucuko, “bohulumende kufanele bente lushintjo lolukhulu endleleni labasebenta ngayo.” Ngisho nome lenkinga ingabonakala shengatsi ngeke isalungiseka, liBhayibheli aliveti kutsi kutawuba netingucuko letinkhulu nje kuphela kodvwa liveta nekutsi vele titawukwenteka mbamba.