Banele: Mine angisiye umuntfu loyitsandzako inkholo wena mnaketfu. Ngako-ke angicabangi kutsi kukhona lesingakukhuluma.

Linda: Ngiyabonga kungichazela ngaloko. Mine nginguLinda, wena ungubani?

Banele: NginguBanele.

Linda: Ngiyajabula kukwati Banele.

Banele: Nami ngiyajabula kukwati.

Linda: Asengibute yeBanele, ukhulele emndenini lokholwako yini?

Banele: Yebo. Kepha ngatsi nasengisukile ekhaya sengisekolishi ngayekela kuya esontfweni.

Linda: Ngiyabona. Kodvwa vele bewufundzela ini nawusekolishi?

Banele: Bengenta tifundvo letimayelana nenhlalo yebantfu kanye netifundvo temlandvo. Bengisolo ngiwutsandza umlandvo—kubona nje kutsi bantfu sebatfutfuke kangakanani kusukela ekucaleni.

Linda: Vele kumnandzi kufundza ngemlandvo. Phela neliBhayibheli liyincwadzi yemlandvo yeBanele, mhlawumbe uyakwati loko. Uke walisebentisa yini nawucwaninga?

Banele: Angikaze ngilisebentise. Kona ngiyati kutsi liyincwadzi lekahle, kodvwa angikaze ngicabange kutsi liBhayibheli liyincwadzi yemlandvo.

Linda: Ubonakala ungumuntfu lonengcondvo levulekile. Nangabe unayo imizuzu lembalwa, ngingatsandza kukukhombisa tibonelo letimbalwa temlandvo loliciniso lotfolakala eBhayibhelini.

Banele: Kulungile, kodvwa ngite liBhayibheli.

Linda: Kute inkinga. Ngitakukhombisa kunali lami. Sibonelo sekucala sisencwadzini ya-1 Tikhronike sehluko 29, emavesi 26 na-27. Lamavesi atsi: “Davide, umsa waJese, waba yinkhosi etikwawo onkhe ema-Israyeli. Wabusa ema-Israyeli iminyaka lengema-40. Wabusela eHebroni iminyaka lesikhombisa, kwatsi lengema-33 wabusela eJerusalema.”

Banele: Manje loku kukhombisa njani kutsi liBhayibheli linemlandvo loliciniso?

Linda: Phela kwake kwaba nesikhatsi lapho bantfu labaphikisako bebatsi iNkhosi Davide ayizange seyibe khona.

Banele: Hawu, bebakusho ngani loko?

Linda: Bebubuncane bufakazi bekutsi yake yaba khona ngaphandle kwalobo lobebuseBhayibhelini. Kodvwa-ke, nga-1993 licembu labososayensi latfola litje lakadzeni kakhulu lebelibhalwe ligama lelihunyushwa ngekutsi “Indlu YakaDavide.”

Banele: Bengingakwati-ke loko.

Linda: Lomunye umuntfu lokukhulunywa ngaye eBhayibhelini labake bamngabata kutsi wake waba khona nguPhontiyuse Pilatu, lobekangumbusi emalangeni aJesu. Kukhulunywa ngaye kunayi incwadzi yaLukha sehluko 3, livesi 1, ufike abalwe kanye naletinye tiphatsimandla tangaleso sikhatsi.

Banele: Yebo, ngiyabona ngobe lelivesi litsi: “Ngesikhatsi Phontiyuse Pilatu angumbusi waseJudiya, Herodi angumbusi waseGalile.”

 Linda: Usho kahle. Kwaphela iminyaka leminyenti letinye tati tingabata kutsi Phontiyuse Pilatu wake waba khona. Kwase kutsi eminyakeni lengu-50 leyendlulile, kwatfolakala litje eMphumalanga Lesekhatsi lebelinelibito lakhe lelibhalwe ngalokucacile kulo.

Banele: Ngiyacala kuyiva-ke lendzaba.

Linda: Nami kuyangijabulisa kuva kutsi uyivile lendzaba.

Banele: Uyati nangikutjela liciniso, bengisolo ngilihlonipha liBhayibheli, kodvwa bengingacabangi kutsi liyasebenta esikhatsini setfu. Lona kungenteka kutsi linemlandvo loliciniso, kodvwa mine angicabangi kutsi liyazuzisa.

Linda: Bantfu labanyenti bangavumelana naloko lokushoko. Kodvwa mine lengikukholelwako kwehlukile ngobe tidzingo lesinato atikashintji kusukela ekucaleni. Sibonelo saloku kutsi besisolo sikudzinga kudla, kwekwembatsa, kanye nendzawo yekuhlala. Besisolo sinaso nesidzingo sekukhulumisana kanye nesekuba nemindeni lejabulako. Awuvumi yini wena kutsi leto tintfo letibalulekile kitsi sonkhe?

Banele: Ngivumelana nawe.

Linda: LiBhayibheli lingasisita kuto tonkhe leto tintfo. Singatsi nje liyincwadzi lendzala kodvwa lesasebenta nalamuhla.

Banele: Usho kutsini?

Linda: LiBhayibheli linetimiso letibalulekile letingasebentiseka nalamuhla ngendlela lebetisebenta ngayo ngesikhatsi tibhalwa emakhulwini eminyaka leyendlulile.

Banele: Wo, njengakuphi nje?

Linda: Timiso teliBhayibheli tingasicondzisa etindzabeni letitsintsa kuba nembono lofanele ngemali, nekuba nemndeni lojabulako nobe kuba ngumngani lokahle. Lencwadzi ifanana nelibalave leliholela emphumelelweni. Awuvumi yini kutsi kulamalanga kumatima kuyifeza kahle indzima yekuba yindvodza kanye neyekuba yinhloko yelikhaya?

Banele: Lisho uliphindze lelo. Mine nemfati wami sesicishe sinemnyaka sishadile, kodvwa asivumelani ngaso sonkhe sikhatsi.

Linda: Uyabona-ke. Kodvwa njengobe ngishito, liBhayibheli linetimiso letimelula futsi letisebentako. Cabanga nje nga-Efesu sehluko 5. Asesifundze emavesi 22, na-23, kanye na-28. Ungatsandza yini kuwafundza lamavesi?

Banele: Asengiwafundze. Atsi: “Bafati abatfobele emadvodza abo kube shengatsi batfobela iNkhosi, ngobe indvodza iyinhloko yemkayo njengobe nje naKhristu ayinhloko yelibandla, futsi angumsindzisi walomtimba.” Livesi 28 lona litsi: “Ngalendlela, emadvodza kufanele atsandze bomkawo njengobe atsandza imitimba yawo. Loyo lotsandza umkakhe utitsandza yena.”

Linda: Ngiyabonga, ufundze kahle. Awucabangi yini kutsi nangabe indvodza nemfati wayo betama kusebentisa leso seluleko lesimelula, kuphila kwemndeni kungaba ncono?

Banele: Kona kungaba ncono. Kodvwa kumelula kukusho loku kunekukwenta.

Linda: Kuliciniso kutsi kute umuntfu longawenti emaphutsa. Ecinisweni, kuso sona lesehluko kunelivesi lelisikhutsata kutsi sikhombise kuba nengcondvo singaticabangeli tsine. a Kunome ngubuphi buhlobo, bantfu kudzingeka kutsi babe nembono lofanele futsi bangafuni kutsi kwentiwe loko lokutsandvwa ngibo ngaso sonkhe sikhatsi. Mine nemfati wami sitfole kutsi liBhayibheli lingasisita kutsi sikwente loko.

Banele: Ngikuva kahle.

Linda: BoFakazi BaJehova bane-Web site lenemininingwane lelusito mayelana nemshado kanye nekuphila kwemndeni. Nangabe unaso sikhashana, ngingakukhombisa kutsi kunani kuyo.

Banele: Kute inkinga ngingaba nayo imizuzu lembalwa.

Linda: Ngiyabonga. Le-Web site itsi www.pr418.com/zu. Naku lokuvelako nawuvula ekucaleni.

Banele: Maye tinhle letitfombe.

Linda: Wo, leti titfombe letiveta umsebenti wetfu wekushumayela lesiwenta emhlabeni wonkhe. Naku-ke lelengifuna kukukhombisa kona. Lana kunanayi incenye  letsi “Usizo Lwabashadile Nabazali.” Kulencenye kunetihloko letinyenti letikhuluma ngetimo letehlukehlukene. Sikhona yini lositsandzako?

Banele: Ngitsandza nasi lesitsi “Ukuxazulula Izinkinga.” Ngicabanga kutsi singangisita.

Linda: Lesihloko sicoca ngetindlela letine longatisebentisa kuze ucatulule tinkinga. Asewunake nje nasi sigaba. Ungakhona yini kusifundza?

Banele: Kulungile. Sitsi: “Uma ukukhulumisana kungafaniswa negazi emshadweni, khona-ke uthando nenhlonipho kungafaniswa nenhliziyo namaphaphu alobo buhlobo.” Ngaze ngayitsandza-ke lendlela lokuchazwa ngayo.

Linda: Ufundze kahle kakhulu. Kunelivesi leliBhayibheli lelikhona lana. Nawufuna kulivula uvele utsintse nje lakulo.

Banele: Wo ngiyalibona, ngu-Efesu 5:33. Angilifundze-ke, litsi: “Nguloyo naloyo kini akatsandze umkakhe njengobe atitsandza yena; nemfati kufanele abe nenhlonipho lenkhulu ngendvodza yakhe.”

Linda: Unakile yini kutsi lapha kugcizelelwa kutsi umuntfu ngamunye kufanele ente loko lalindzele kutsi kwentiwe kuye?

Banele: Angikuva kahle.

Linda: Angitsi indvodza iyafuna kuhlonishwa ngumfati wayo? Kantsi nemfati naye uyafuna kutsi indvodza yakhe imcinisekise kutsi imtsandza mbamba?

Banele: Vele kunjalo.

Linda: Nangabe indvodza ihlale ifuna tindlela tekukhombisa lutsandvo kumfati wayo, awucabangi yini kutsi kungaba melula ngemfati kutsi ayihloniphe indvodza yakhe?

Banele: Kubonakala ngatsi tintfo tingalunga nakunjalo.

Linda: Uyabona-ke kutsi lelivesi linye nje leliBhayibheli, ngisho nome labhalwa eminyakeni lecishe ibe ngu-2 000 leyendlulile, likhuluma ngetidzingo tabo bobabili bantfu labashadene liphindze linikete seluleko lesilusito lesingaba nemiphumela lemihle nasisetjentiswa. Nasibuyela kulomfanekiso lesikhulume ngawo ekucaleni, loku kungenta kutsi “inhlitiyo nemaphaphu” alomshado ahlale aphile kahle.

Banele: Uyati ngikhulume liciniso, bengingacabangi kutsi liBhayibheli lilusito kangaka.

Linda: Ngiyajabula nawusho njalo Banele. Ngingatsandza kutsi siphindze sihlangane khona lapha kuze sicoce ngesihlokwana lesitsi “Izinyathelo Ezine Zokuxazulula Izinkinga” lesikuso lesihloko lebesisivulile kule-Web site yetfu. b

Banele: Kulungile. Ngitawuke ngisifundze ngikanye nemfati wami.