“Nkulunkulu Simakadze wamtsatsa umuntfu wambeka ensimini yase-Edeni kutsi ayilime, ayilindze. Nkulunkulu Simakadze wamyala umuntfu watsi kuye: ‘Ungadla ngekutsandza kwakho tonkhe titselo letilapha ensimini; kodvwa ungasidli sitselo sesihlahla sekwati lokulungile nalokungakalungi, ngobe mhlazana usidla uyakufa nekufa.’”​—Genesisi 2:15-17.

Nkulunkulu wabeka Adamu umuntfu wekucala, emhlabeni ensimini yase-Edeni, lebeyilipharadisi leligcwele tilwane kanye netitjalo letinhle. Bekunetihlahla lebetitsela titselo labengadla kuto ngekukhululeka. Nanobe kunjalo, Jehova Nkulunkulu wamtjela ngalokucacile kutsi angadli esihlahleni sinye nje kuphela, ngobe nakadla kuso utawukufa.

Abekucondza yini Adamu loko Jehova lamtjela kona? Abekwati kutsi kuyini kufa, ngobe abetibona tilwane tifa. Kube abedalelwe kutsi utawufa ngekuhamba kwesikhatsi, lomyalo waNkulunkulu bewungeke usho lutfo. Kodvwa Adamu wacondza kutsi nakalalela Nkulunkulu futsi angadli kulesihlahla, abetawuphila phakadze, angafi.

Labanye bakholelwa kutsi lesihlahla simelela kuya ecasini, kodvwa loko akusilo liciniso. Jehova abefuna kutsi Adamu nemkakhe Eva ‘batalane, bandze, bagcwalise umhlaba, bawuncobe.’ (Genesisi 1:28) Ngako-ke, lomyalo bewusho sihlahla mbamba. Jehova wasibita ngekutsi “sitselo sesihlahla sekwati lokulungile nalokungakalungi,” ngobe besimelela lilungelo lanalo lekuncumela bantfu kutsi yini lelungile nobe lengakalungi. Ngekungasidli sitselo salesihlahla, Adamu abengeke akhombise nje kuphela kutsi uyalalela, kodvwa abetawukhombisa nekutsi uyamhlonipha Loyo lowamdala futsi wamniketa netibusiso letinyenti.

“Ku-Adamu [Nkulunkulu] watsi: ‘Njengobe . . . wasidla lesitselo salesihlahla lengakuyala ngaso, . . . uyawusebenta kamatima, ukujulukele kudla kwakho, udzimate ubuyele emhlabatsini, ngobe vele watsatfwa kuwo; njengobe ulutfuli, uyawubuyela elutfulini.’”—Genesisi 3:17, 19.

Adamu wadla kulesihlahla labekangakavunyelwa kutsi adle kuso. Kungalaleli lokunjalo bekungakafaneli kutsatfwe kancane. Bekukuvukela, kukungatihloniphi tonkhe tintfo Jehova labementele tona. Ngekudla lesitselo, Adamu wamala Jehova wakhetsa kutibusa, lobekutawuba nemiphumela lemibi kakhulu.

Adamu wagcine afile, njengobe Jehova abeshito. Nkulunkulu abemdale “ngelutfuli lwemhlabatsi” futsi abemtjelile kutsi ‘utawubuyela emhlabatsini.’ Adamu akazange achubeke aphila akulesinye simo nobe kulenye indzawo. Nasafile, abengasaphili, afanana nelutfuli labetsetfwe kulo.​—Genesisi 2:7; Umshumayeli 9:5, 10.

“Ngako-ke ngemuntfu munye sono sangena eveni, nekufa kwangena ngesono, ngenca yaloko kufa kwasakatekela kubo bonkhe bantfu ngobe bonkhe bonile.”—Roma 5:12.

Kungalaleli kwa-Adamu nobe kona kwakhe, kwaba nemiphumela lebuhlungu kakhulu. Ngekona, Adamu akazange nje alahle kuphila lesikwetayele lamuhla, lokungaba yiminyaka lengu-70 nobe lengu-80, kodvwa walahla sipho lesiligugu kakhulu sekuphila phakadze. Ngetulu kwaloko, ngesikhatsi Adamu ona, walahla kuphila lokute sono futsi wendlulisela sono kuso sonkhe situkulwane sakhe.

Sonkhe sisitukulwane sa-Adamu. Ngako-ke satfola umtimba lonesono nalogcine ufile, futsi loko akuzange kube ngekutsandza kwetfu. Pawula wasichaza kahle simo setfu. Wabhala watsi: “Mine ngiyinyama, futsi ngitsengiswe esonweni. Maye mine muntfu lohluphekako! Ngubani lotangikhulula kulomtimba lofako?” Pawula wabese uyawuphendvula lombuto wakhe, watsi: “Akabongwe Nkulunkulu ngaJesu Khristu iNkhosi yetfu!”​—Roma 7:14, 24, 25.

“Babe utfumele iNdvodzana yakhe kuze ibe nguMsindzisi welive.”—1 Johane 4:14.

Jehova Nkulunkulu wenta indlela yekucedza imiphumela yesono kanye neyekusikhulula ekufeni lokungumphumela waso. Wakwenta kanjani loko? Watfumela iNdvodzana yakhe letsandzekako kutsi italwe ibe ngumuntfu lote sono njenga-Adamu. Kodvwa Jesu yena “akentanga sono.” (1 Phetro 2:22) Ngesizatfu sekutsi abete sono, abengeke afe futsi abetawuphila phakadze.

Kunaloko, Jehova wavumela kutsi Jesu abulawe titsa takhe. Ngemuva kwemalanga lamatsatfu, Jehova wamvusa asanemtimba wemoya kuze ngekuhamba kwesikhatsi abuyele ezulwini. Nasasezulwini, Jesu waniketa Nkulunkulu linani lekuphila kwakhe lokute sono kuze abuyise loko Adamu lakulahla. Jehova wawemukela lowo mhlatjelo, lokwenta kutsi labo labanekukholwa kuJesu batfole kuphila lokuphakadze.​—Roma 3:23, 24; 1 Johane 2:2.

Ngako Jesu wabuyisela loko Adamu labekulahlile. Wafa ngenca yetfu kuze sitfole kuphila lokuphakadze. LiBhayibheli litsi: “Jesu . . . wahlupheka wadzimate wafa, kuze kutsi ngemusa waNkulunkulu afele bonkhe bantfu.”​—Hebheru 2:9.

Lomhlatjelo waJesu usembulela lokunyenti ngaJehova. Ngekuvumelana netimiso taJehova letiphakeme tekulunga, bantfu labanesono ngeke bakhone kutikhulula bona. Nanobe kunjalo, lutsandvo lwakhe kanye nemusa wakhe lumente wanikela ngeNdvodzana yakhe lekuphela kwayo kuze asikhulule, ngisho nobe loko bekusho kulahlekelwa lokukhulu kuye.​—Roma 5:6-8.

“Khristu uvusiwe kulabafile, wekucala kubo bonkhe labafile. Njengobe kufa kwavela ngemuntfu, nekuvuswa kwalabafile nako kuvela ngemuntfu. Njengobe ku-Adamu bonkhe bayafa, nakuKhristu bonkhe batawutfola kuphila.”​—1 Khorinte 15:20-22.

Asingabati kutsi Jesu waphila wabese uyafa, kodvwa-ke ngubuphi bufakazi lesinabo bekutsi wavuswa kulabafile? Lobunye bufakazi lobunemandla kutsi ngemuva kwekuvuswa kwakhe, Jesu wabonakala kubantfu labanyenti, ngetikhatsi letingafani kanye nasetindzaweni letehlukehlukene. Ngalelinye lilanga, wabonakala kubantfu labangetulu kwa-500. Umphostoli Pawula wabhala ngaloko encwadzini yakhe leya kubaseKhorinte, waveta kutsi labanye balabo labambona bebasaphila, lokusho kutsi bebangafakaza ngaloko labakubona futsi bakuva.​—1 Khorinte 15:3-8.

Ngesikhatsi Pawula abhala kutsi Khristu “wekucala” kulabavusiwe, abeveta kutsi nalabanye bebatawuvuswa. NaJesu naye washo kutsi sikhatsi siyeta lapho ‘bonkhe labasemathuneni batawuphuma.’​—Johane 5:28, 29.

“Nkulunkulu walitsandza kakhulu live kangangekutsi waze wanikela ngeNdvodzana yakhe lekuphela kwayo, kuze wonkhe umuntfu lokholwa ngiyo angabhubhi, kodvwa atfole kuphila lokuphakadze.”​—Johane 3:16.

Incwadzi yekucala yeliBhayibheli isitjela ngesikhatsi lokwangena ngaso kufa kanye nekulahleka kweliPharadisi. Incwadzi yekugcina yeliBhayibheli yona isitjela ngesikhatsi lapho kufa kutawentiwa lite khona futsi Nkulunkulu abuyisele liPharadisi emhlabeni. Bantfu batawubese bayakhona kuphila phakadze banenjabulo nekwenetiseka. Sembulo 21:4 sitsi: “Kufa ngeke kusaba khona.” Kuze kugcizelelwe kutsi vele leso setsembiso sitawufezeka, livesi 5 litsi: “Lamavi etsembekile futsi aliciniso.” Loko Jehova lakutsembisako, uyakhona kukufeza.

Uyakholelwa yini kutsi “lamavi etsembekile futsi aliciniso”? Nangabe kunjalo, fundza kabanti ngaJesu Khristu futsi ukholwe kuye. Jehova utakwemukela nangabe ukwenta loko. Angeke nje ugcine ngekutfola tibusiso letinyenti nyalo, kodvwa utawuba nelitsemba lekuphila phakadze emhlabeni loliPharadisi, lapho ‘kufa kungeke kusaba khona, nekulila, nekukhala kanye nebuhlungu.’