KUPHILA KWEMAKHRISTU
Singasilungiselela Kanjani Sikhumbuto?
Kusukela kulomnyaka, sitawuba nesikhatsi lesinyenti sekulungiselela Sikhumbuto sekufa kwaKhristu. Nangabe lilanga leSikhumbuto lisemkhatsini weliviki, Kuphila KwemaKhritsu Nemsebenti Wawo ngeke kube khona kulelo viki. Nangabe lilanga leSikhumbuto lingemphelasontfo, inkhulumo yelinyenti kanye neSifundvo seSicongosekulindza ngeke kube khona. Ungakhona yini kusisebentisa kahle leso sikhatsi njengobe singeke siye emihlanganweni yelibandla? Njengasekhulwini lekucala, kufanele kwentiwe emalungiselelo alomkhosi lobalulekile. (Luk. 22:7-13; km 3/15 1) Kodvwa kufanele silungise tinhlitiyo tetfu kute sizuze kakhulu kulomkhosi. Singakwenta kanjani loko?
-
Cabanga ngekubaluleka kwekuba khona kulomkhosi.—1 Khor. 11:23-26
-
Thantaza futsi ucabange ngebuhlobo bakho naJehova.—1 Khor. 11:27-29; 2 Khor. 13:5
-
Fundza futsi ucabangisise ngemiBhalo lekhuluma ngekubaluleka kwaloMkhosi.—Joh. 3:16; 15:13
Labanye bamemeteli bafundza baphindze bacabangisise ngekufundvwa kweliBhayibheli kwemalanga eSikhumbuto lokutfolakala encwadzini letsi, Kuhlolisisa ImiBhalo Malanga Onkhe. Labanye bafundza emavesi eliBhayibheli laseshadini lelihambisana nemalanga eSikhumbuto. Labanye babuyeketa tihloko letiku-Sicongosekulindza letikhuluma ngeSikhumbuto, nelutsandvo Jehova naJesu labanalo ngatsi. Nobe ngabe yini lokhetsa kuyisebentisa, shengatsi ingakwenta usondzelane naNkulunkulu kanye neNdvodzana yakhe.