Jakobe bekati kutsi Jehova ufuna kutsi umuntfu atinikele kuye ngalokuphelele ngisho nobe Jehova bekangakamniketi umtsetfo lobewumelene nekukhonta tithico. (Eks 20:3-5) Ngako ke, ngemuva kwekutsi Jehova atjele Jakobe kutsi abuyele eBetheli, Jakobe wayala wonkhe muntfu kutsi alahle tonkhe tithico. Jakobe wabese utiveta ebaleni tintfo lebetihambelana nekukhona tithico, lokufaka ekhatsi emacici, lobekukholelwa kutsi aniketana inhlanhla nobe sivikelo emimoyeni lemibi. (Gen 35:1-4) Siyaciniseka kutsi Jehova bekajabula ngaJakobe.

Nasesikhatsini setfu, singakhombisa njani kutsi sitinikele kuJehova ngalokuphelele? Sicala ngekutsi sigweme nobe ngabe yini lehlobene nekukhonta tithico nobe budimoni. Loku kufaka ekhatsi kulahla yonkhe intfo lehlobene nemilingo nobe yekubiketela inhlanhla. Sibonelo nje, tibute kutsi: ‘Ngiyatitsandza yini tincwadzi nobe emafilimu lanebantfu labadla ingati yebantfu, tiphoko, nobe bantfu labanemandla langetulu kwalavamile? Ngabe tiyangijabulisa yini tintfo letikhombisa umlingo, kutsebula nobe kucalekisa labanye?’ Kufanele sitibalekele tintfo Jehova latitondzako.—Hl 97:10.

BUKELA I-VIDEO LETSI “MELANANI NADEVELI,” BESE UPHENDVULA LEMIBUTO LELANDZELAKO:

• Nguyiphi inkinga leyaphakama ekuphileni kwemfundzi weliBhayibheli lokutsiwa nguPalesa?

• Kungani kufanele ufune lusito lwemadvodza lamadzala nangabe wena nobe umuntfu lomatiko anenkinga lehambisana nemimoya lemibi?

• Nangabe sifuna kuvikelwa nguJehova, ngutiphi tintfo lokufanele sitilahle nobe sitiyekele?

• Ngusiphi sincumo lesicinile lesatsatfwa nguPalesa?

• Endzaweni lohlala kuyo, ngutiphi letinye tindlela bantfu labatisebentisako tekutivikela emadimonini?