Usemkhatsini weminyaka lengu-23 nalengu-65 yini futsi usemsebentini wasikhatsi sonkhe? Simo sakho semphilo sikahle yini, futsi ungakhona yini kukhonta lakunesidzingo lesikhulu khona? Nangabe imphendvulo yakho ingu-yebo kulemibuto, bosoke wacabanga yini kufaka sicelo eSikolweni Sebavangeli BeMbuso? Kusukela kwaba nelikilasi lekucala, tinkhulungwane tebazalwane nabodzadze labashadile nalabangakashadi setike tafaka ticelo. Nobe kunjalo, sidzinga bazalwane labanyenti labangakashadi kutsi bafake ticelo. Cela Jehova akhulise sifiso sakho sekumjabulisa nesekulingisa iNdvodzana yakhe. (Hl 40:8; Mat 20:28; Heb 10:7) Ngemuva kwaloko, cabanga ngetindlela longanciphisa ngato tintfo letikuvimbako kutsi ufake sicelo.

Ngumiphi iminyango levulekele labaphotfule kulesikolwa ngemuva kwekuceceshwa kwabo? Labanye labaphotfululile babelwe kutsi bayokhonta etindzaweni letikhuluma lolunye lulwimi nobe kute bayoba nencenye emikhankhasweni lekhetsekile yekushumayela emadolobheni lamakhulu. Labanye labaphotfulile, ngekuhamba kwesikhatsi babelwe kutsi babe babonisi batigodzi lababambele, babonisi betigodzi nobe titfunywa telivangeli letisensimini. Njengobe ucabangisisa ngekukhonta Jehova ngaletindlela, shengatsi ungaba nembono wemphrofethi Isaya lowatsi: “Nangu mine! Tfuma mine!”—Isa 6:8.

BUKELA I-VIDEO LETSI TITFUNYWA TELIVANGELI—TISEBENTI LETIVUNAKO, BESE NIPHENDVULA LEMIBUTO LELANDZELAKO:

• Titfunywa telivangeli tikhetfwa njani?

• Ngumuphi umsebenti lomuhle lowentiwa titfunywa telivangeli?

• Ngutiphi letinye tetibusiso tekuba sitfunywa selivangeli?