Jehova utitsatsa njengaletibalulekile tifungo temshado. Watsi indvodza nemfati kufanele banamatselane. (Mat 19:5, 6) Banyenti bantfu baNkulunkulu labajabulako emishadweni yabo. Nobe kunjalo, umshado wakhiwa bantfu labanesono. Tibakhona tinkinga. Akukafaneli sibe nembono lovamile wekutsi kuhlala ngekwehlukana kanye nedivosi kulikhambi nangabe umshado uba netinkinga. EmaKhristu lashadile angawulondvolota njani umshado wawo?

Cabanga nganati tindlela letisihlanu letibalulekile.

1. Vikela inhlitiyo yakho ngekutsi ugweme kudlala ngelutsandvo kanye nekutijabulisa lokugcolile, ngobe letintfo tiyawulimata umshado.—Mat 5:28; 2Ph 2:14.

2. Cinisa buhlubo bakho naNkulunkulu futsi ukhulise sifiso sekumjabulisa emshadweni wakho.—Hl 97:10.

3. Chubeka ugcoka buntfu lobusha, futsi wentele loshade naye tintfo letincane letikhombisa umusa, letitamjabulisa.—Kho 3:8-10, 12-14.

4. Ngaso sonkhe sikhatsi, khulumisanani ngenhlonipho.—Kho 4:6.

5. Umuntfu loshadile akanike lashade naye loko lokumfanele, futsi loko akwente ngelutsandvo.—1Kt 7:3, 4; 10:24.

Nangabe emaKhristu ahlonipha umshado, asuke ahlonipha Jehova, longuMsunguli wawo.

BUKELA I-VIDEO LETSI, KUFANELE ‘SIGIJIME NGEKUCINISELA’—LANDZELA IMITSETFO YALOMNCINTISWANO, BESE NIPHENDVULA LEMIBUTO LELANDZELAKO:

• Nanobe tintfo tingacale tihambe kahle emshadweni, ngutiphi tinkinga letingahle tibe khona?

• Timiso teliBhayibheli tingabasita njani labo labeva shengatsi basemishadweni lete lutsandvo?

• Ngumiphi imitsetfo Jehova layibekele bantfu labashadile?

• Kuze umshado uphumelele, yini lokufanele yentiwe ngulaba lababili?