Yini lekuhlupha onkhe malanga? Uyinhloko yemndeni yini futsi utfwele kamatima kuze unakekele umndeni wakho? Ungumtali lokhulisa bantfwana uwedvwa yini futsi ukutfola kumatima kubanakekela? Ungulosemusha lofundza sikolwa yini futsi uhlushwa bontsanga yakho? Unemphilo lebutsakatsaka yini nobe unetinkinga letihambisana nekukhula ngeminyaka? Wonkhe umuntfu unetinkinga. EmaKhristu lamanyenti abhekana nekuvivinywa lokunyenti ngasikhatsi sinye. Nobe kunjalo, siyati kutsi ngekushesha sitawukhululwa kuletinkinga.—2Kt 4:16-18.

Kodvwa njengobe sisengakefiki leso sikhatsi, kuyasidvudvuta kwati kutsi Jehova uyatati tinkinga lesibhekene nato, uyajabula nakasibona setsembekile futsi sicinisela, futsi utasibusisa kakhulu. (Jer 29:11, 12) NaJesu unendzaba natsi. Njengobe senta konkhe lokufanele kwentiwe ngemaKhristu, uyasicisekisa utsi: “Mine nginani.” (Mat 28:20) Nangabe sizindla ngekukhululwa esikhatsini lesitako nasekubusa uMbuso waNkulunkulu, sisuke sicinisa litsemba letfu kanye nekutimisela kwetfu kutsi sibeketelele tinkinga lesibhekana nato nyalo.—Rom 8:19-21.

BUKELA I-VIDEO LETSI, NJENGOBE SIPHEPHO SISONDZELA, EMEHLO AKHO AWATSI NJO KUJESU!—TIBUSISO LESITATIJABULELA ESIKHATSINI LESITAKO, BESE NIPHENDVULA LEMIBUTO LELANDZELAKO:

• Bantfu behlukana njani naNkulunkulu, futsi waba yini umphumela?

• Nguliphi likusasa lelilindzelwe ngulabo labetsembekile kuJehova?

• Singalitfola njani lelikusasa lelihle?

• Ngutiphi tibusiso lotibuke ngalabovu lotatitfola eveni lelisha?