Sikhatsi seSikhumbuto sisita sicabangisise ngetibusiso lesitatitfola ngenca yenhlawulo, lokufaka ekhatsi luvuko. Jehova akabadalanga bantfu kute bafe. Ngiko nje siva buhlungu kakhulu ngekufelwa ngulesimtsandzako. (1Ko 15:26) Jesu weva buhlungu nakabona balandzeli bakhe balila ngesizatfu sekufa kwaLazaru. (Joh 11:33-35) Njengobe Jesu afana ncamashi neYise, loko kusenta sibone kutsi naJehova uva buhlungu nakasibona silila ngendzaba yekufelwa ngulesibatsandzako. (Joh 14:7) Jehova uyakulangatelela kuvusa labafile esikhatsini lesitako, futsi natsi silangatalela kubabona.—Job 14:14, 15.

Njengobe Jehova angasiye Nkulunkulu wesiphitsiphitsi, kunengcondvo kucabanga kutsi luvuko lutakwenteka ngekuhleleka. (1Ko 14:33, 40) Esikhundleni semingcwabo, sitawujabula nasesihlangabeta labavusiwe. Uyazindla yini ngeluvuko, ikakhulu nawufelwe? (2Ko 4:17, 18) Uyambonga yini Jehova ngekusilungiselela inhlawulo kanye nangekutsi usivetele emiBhalweni kutsi labafile batawuphindze baphile?—Kho 3:15.

• Bobani bangani netihlobo takho lofisa kutibona tivusiwe?

• Kubantfu lokukhulunywa ngabo eBhayibhelini, bobani lofisa kubabona futsi ukhulume nabo?