KUBALULEKE NGANI: Incwadzi ya 1 Khorinte ingulenye yetincwadzi letingu-14 letabhalwa ngumphostoli Pawula kute akhutsate emaKhristu labekakholwa nawo. Nangabe umuntfu abhala incwadzi, uba nesikhatsi sekuwakhetsa kahle emagama latawasebentisa, futsi labo leyakubo, bayifundza bayiphindze kanyenti. Tincwadzi tiyindlela lekahle yekufakaza etihlotjeni takho kanye nakubantfu lobatayele. Tiphindze tisisite kutsi sinikete bufakazi kubantfu lesingakhoni kukhuluma nabo umlomo nemlomo. Sibonelo, umuntfu angakhombisa kutsi uyatsandza kufundza kodvwa kube matima kumtfola ekhaya. Kungaba lukhuni kutfola labanye labahlala ensimini yetfu ngenca yekutsi bahlala etindzaweni letibiyelwe letinabogadzi, nobe lokungafikeki melula kuto. Ngutiphi tintfo lekufanele kutsi uhlale utikhumbula, ikakhulu nangabe ubhalela umuntfu longamati?

INDLELA YEKUKWENTA:

• Bhala loko lobewutawukusho kube bewumbona. Ekucaleni kwalencwadzi tichaze kutsi ungubani, futsi uchaze kahle kutsi kungani ubhala lencwadzi. Mhlawumbe ungambuta umbuto langacabanga ngawo, bese umcondzisa ku-website yetfu. Bese umtjela nge-Online Bible Study Lessons nangeluhlelo lwekufundza liBhayibheli ekhaya lakhe, nobe umtjele ngetihloko letikuyinye yetincwadzi lesitisebentisa nasifundza nebantfu. Kulencwadzi ungalifaka nelikhadi lekungena ku-website, simemo nobe lipheshana.

• Condza endzabeni, ungagegi. Incwadzi yakho ayingabi yindze kakhulu, ngoba lomuntfu lombhalele angabese uyadzinwa kuyifundza.—Fundza incwadzi lesibonelo lesekhasini 8

• Yifundze lencwadzi ngaphambi kwekutsi uyihambise kute ubone emaphutsa nekutsi iyafundzeka. Ciniseka kutsi inebungani, inemavi lahlakaniphile futsi iyakha. Ciniseka nekutsi ufaka titembu letidzingekile emvilophini.