Titfombe, ema-video, nemidvwebo kwenta umuntfu akucondze futsi ahlale akukhumbula loko lakufundzile. Umfundzisi Lomkhulu, Jehova, bekasebentisa tintfo lesingakhona kutibona ngemehlo nakafundzisa tifundvo letibalulekile. (Ge 15:5; Jer 18:1-6) NeMfundzisi Lomkhulu Jesu, watisebentisa. (Mat 18:2-6; 22:19-21) Lenye indlela yekufundzisa sisebentisa tintfo lesingakhona kutibona ngemehlo nalebonakale iphumelela kuleminyaka, ngema-video. Uyawasebentisa yini ema-video nawufundzisa bantfu lofundza nabo liBhayibheli?

Silungiselelwe ema-video lalishumi latasisita kutsi sikhone kufundzisa ngetifundvo letisencwajaneni letsi Tindzaba Letimnandzi Letivela KuNkulunkulu! Ngalokuvamile, sihloko se-video ngayinye sihambisana namunye wemibuto lebhalwe ngalokugcamile kulencwajana. Lencwajana nawuyivule usebentisa intfo yebucwephesha, kuba ne-link lekukhumbuta kutsi sewungayidlala i-video. Ngetulu kwaloko, lamanye ema-video ahambisana naletinye tincwadzi tekufundzisa letisemaThulusini Etfu Ekufundzisa.

Ucoca ngendzaba leseBhayibhelini yini lokulukhuni kutsi umuntfu lofundza naye liBhayibheli ayicondze? Nobe loyo lofundza naye liBhayibheli usesimeni lesimatima? Funa ema-video latamsita ku-jw.org® kanye naseMsakatweni we-JW®. Kungaba kuhle kutsi wena kanye naloyo lofundza naye liBhayibheli nibukele yinye yawo ndzawonye bese nicoca ngayo.

Njalo ngenyanga, kukhululwa ema-video lamasha. Njengoba uwabukela, cabanga ngekutsi ungawasebentisa njani nawufundzisa labanye.