Umtapo We-JW (JW Library) uluhlelo (software application) lwamahhala lolutakusita ukhone kudawuniloda liBhayibheli kanye naletinye tincwadzi, ema-video kanye netintfo letitsetjuliwe letilalelwako utifake elucingweni lwakho, ku-tablet nobe kungcondvomshina wakho.

INDLELA YEKUWUTFOLA: Ngena ku-Internet, bese ufaka i-JW Library uyitsatsa endzaweni lokutsiwa yi-app store. Loluhlelo lwe-JW Library lutfolakala etintfweni tebuchwephesha letinyenti. Nawuseku-internet, vula loluhlelo lwemtapo we-JW bese ukhetsa tintfo lofisa kutidawunilodela entfweni yakho yebuchwephesha. Nangabe ute i-internet ekhaya, kumbe ungasebentisa yaseHholeni leMbuso, ehhovisini lemtapo wetincwadzi nobe etitolo lodvute nato. Nase utidawunilodile tintfo lotifunako, angeke usayidzinga i-internet kute utivule. Nobe kunjalo, kuloluhlelo lwemtapo we-JW kuvame kutsi kwengetwe tintfo letinsha, kufanele uhle ungena ku-internet kute utidawunilode.

KUDZINGEKE NGANI KUTSI UBE NAWO? Umtapo we-JW wenta kutsi kube melula kutichubela sifundvo sakho kanye nekulandzelela emihlanganweni yelibandla. Uphindze ube lusito emsebentini wekushumayela, ikakhulukati ekushumayeleni ungakahleli.