Umtsetfo waMosi bewutsi indvodza kufanele ilungise incwadzi lesemtsetfweni yedivosi nangabe ifuna kwehlukanisa nemkayo. Loku bekuvikela kutsi bantfu bangehlukani ngaphandle kwesizatfu nebantfu labashade nabo. Nobe kunjalo, ngesikhatsi saJesu baholi benkholo benta kwaba melula kudivosa. Emadvodza bekadivosa bafati bawo nganobe ngusiphi sizatfu. (“incwadzi yedivosi” liphuzu lelicwaningiwe laMak 10:4 leliku-nwtsty; “lodivosa umkakhe,” “uyaphinga” liphuzu lelicwaningiwe laMak 10:11 leliku-nwtsty) Jesu wagcizelela kutsi umshado ulilungiselelo lelivela kuJehova njengoba angumsunguli wawo. (Mak 10:2-12) Indvodza nemfati bekufanele ‘babe nyamanye’ baze bahlukaniswe kufa. Ngekusho kwaMatewu, sizatfu sedivosi lesisekelwe emBhalweni ngulapho lomunye ente “bundlundlulu.”​—Mat 19:9.

Namuhla, bantfu labanyenti banembono lofana newebaFarisi ngemshado, hhayi umbono waJesu. Nangabe kuvela tinkinga, bantfu labanyenti labangamkhonti Jehova bagijimela kuyodivosa. Ngalokwehlukile kuloku, emaKhristu lashadile atsatsa tifungo tawo njengaletibalulekile futsi ayatikhandla kute ancobe tinkinga lanato ngekusebentisa timiso letiseBhayibhelini. Ngemva kwekubukela i-video letsi Lutsandvo Nenhlonipho Kwenta Imindeni Ibe Nebunye, phendvulani lemibuto lelandzelako:

• Ungawusebentisa njani umBhalo weTaga 15:1 emshadweni wakho, futsi kungani loku kubalulekile?

• Kusebentisa umBhalo weTaga 19:11 emshadweni wakho kungakusita njani kutsi ugweme tinkinga?

• Nangabe ubona ngatsi umshado wakho uyaphela, kunekutsi ucabange kudivosa, ngumiphi imibuto longacabanga ngayo?

• Kusebentisa Matewu 7:12 emshadweni wakho, kungakusita njani kutsi ube yindvodza lekahle nobe umfati lokahle?