Madvutane Jehova utawuyekela kulibeketelela lelive. Inkholo yemanga itawubhujiswa, licembu letive litawuhlasela bantfu baNkulunkulu futsi Jehova utababhubhisa bantfu lababi nge-Amagedoni. EmaKhristu alangatelela kutibona letentakalo letibalulekile naletijabulisako.

Asiyati yonkhe imininingwane lemayelana nekuhlupheka lokukhulu. Sibonelo nje, asati kutsi kutawucala nini. Asitati tizatfu letitawenta betepolitiki kutsi bahlasele inkholo. Asati kutsi kuhlaselwa kwebantfu baNkulunkulu kutawutsatsa sikhatsi lesingakanani nekutsi kutawenteka kanjani. Asati nekutsi Jehova utawubabhubhisa ngani bantfu lababi nge-Amagedoni.

Nobe kunjalo, imiBhalo isiniketa yonkhe imininingwane lesiyidzingako kuze siciniseke futsi sibe nesibindzi ngaloko lokutowenteka esikhatsini lesitako. Sibonelo nje, siyati kutsi siphila encenyeni yekugcina ‘yemalanga ekugcina.’ (2Tm 3:1) Siyati nekutsi kuhlaselwa kwenkholo ‘kutawufinyetwa’ kuze inkholo yeliciniso ingabhujiswa. (Mat 24:22) Siyati kutsi Jehova utabakhulula bantfu bakhe. (2Ph 2:9) Siyati nekutsi Loyo Jehova lamkhetsile kutsi abhubhise bantfu lababi aphindze avikele sicumbi lesikhulu nge-Amagedoni ulungile futsi unemandla.​—Sem 19:11, 15, 16.

Siyaciniseka kutsi tentakalo letitawenteka esikhatsini lesitako titawenta bantfu ‘besabe kakhulu.’ Nobe kunjalo, ngekufundza nangekuzindla ngetindlela Jehova lasindzise ngato bantfu bakhe esikhatsini lesendlulile kanye naloko lakwembulile mayelana nelikusasa, sitawukhona ‘kusukuma, siphakamise tinhloko tetfu,’ siciniseka kutsi kusindziswa kwetfu sekusedvute.​—Luk 21:26, 28.