Kukhuluma Kakhulu: Ungativa uphocelelekile kutsi kufanele uchaze yonkhe intfo. Jesu wasebentisa imibuto kuze asite bantfu kutsi bacabange futsi bafike esiphetfweni lesingiso sendzaba. (Mat 17:24-27) Imibuto yenta lesifundvo siphile futsi yenta kube lula kubona kutsi yini lomfundzi layicondzako nalayikholelwako. (be 253 ¶3-4) Nawubuta umbuto, beketela futsi ulindze umfundzi kutsi aphendvule. Nangabe lomfundzi angakaphendvuli kahle, kunekutsi umtjele imphendvulo lekahle, buta imibuto letamenta agcine ayibonile imphendvulo lekahle. (be 238 ¶1-2) Khuluma ngendlela letawukwenta umfundzi akhone kutfola emaphuzu.—be 230 ¶4.

Kwenta Indzaba Ibe Lukhuni: Kugweme kucoca ngako konkhe lokwatiko lokumayelana naleyo ndzaba. (Joh 16:12) Coca ngemaphuzu layinhloko aleso sigaba. (be 226 ¶4-5) Imininingwane, ngisho nalejabulisako, ingawagciba emaphuzu layinhloko. (be 235 ¶3) Nangabe umfundzi sekalicondza liphuzu leliyinhloko, chubekela esigabeni lesilandzelako.

Kumane Ucoce Ngekwatiswa: Umgomo wetfu ukutsintsa inhlitiyo hhayi nje kucoca ngekwatiswa. (Luk 24:32) Sebentisa emandla eliVi laNkulunkulu ngekutsi unake imibhalo leyinhloko lekuleso sifundvo. (2Ko 10:4; Heb 4:12; be 144 ¶1-3) Sebentisa imifanekiso lemelula. (be 245 ¶2-4) Cabanga ngetinkinga umfundzi lanato kanye naloko lakukholelwako, bese wenta lesifundvo sivumelana naye. Buta imibuto lenjengaletsi: “Utiva njani ngaloku lokufundzako?” “Loku kusifundzisani ngaJehova?” “Ucabanga kutsi kusebentisa leseluleko kutakuzuzisa njani?”—be 238 ¶3-5; 259 ¶1.