1 KubaseKhorinte 16:1-24
16 Macondzana nekubutfwa kweminikelo yalabangcwele, ningalandzela ticondziso lengatinika emabandla aseGalathiya.
2 Ngelilanga lekucala kulelo nalelo viki, ngamunye wenu kufanele abekele eceleni lokutsite, kuye ngekwaloko lanako, kuze iminikelo ingabutfwa nasengifikile.
3 Kodvwa nasengifikile, ngitawutfuma lamadvodza leniwancomile etincwadzini tenu, kutsi amikise leminikelo yenu eJerusalema.
4 Nangabe nami kufanele ngihambe, ngitawuhamba nawo.
5 Ngitawukuta kini nasengendlule eMasedoniya, ngobe ngitawendlula khona;
6 futsi kungenteka ngihlale nobe ngicitse busika nani, kuze nitengiphekeletela kancane lapho ngitawube ngiya khona.
7 Angifuni kunibona nyalo njengobe ngitawube ngendlula, ngobe ngetsemba kutsi ngitawuba nesikhashana nginani, nangabe Jehova atsandza.
8 Kodvwa ngitawuchubeka ngise-Efesu kudzimate kube nguMkhosi weliPhentekhoste;
9 ngobe ngivulekelwe ngumnyango lomkhulu loholela emsebentini, kepha banyenti baphikisi.
10 Kodvwa-ke nakefika Thimothi, cinisekani kutsi kube bete lakwesabako nakasenani, ngobe wenta umsebenti waJehova njengami.
11 Akubete lombukela phansi. Nibomphekeletela ngekuthula kuze afike kimi, ngobe mine nebazalwane simlindzile.
12 Mayelana nemzalwane wetfu Apholosi, ngimncengile kutsi ete kini kanye nebazalwane, kodvwa akusiso sifiso sakhe kuta nyalo; ngako utawukuta nakatfola litfuba.
13 Hlalani niphapheme, nicine ekukholweni, nibe ngemadvodza futsi nibe nemandla.
14 Konkhe lenikwentako kwenteni ngelutsandvo.
15 Ngiyanincenga bazalwane, ngobe niyati kutsi indlu yaStefanasi yaba yekucala kuba bafundzi e-Akhaya, nekutsi yatinikela ekusiteni labangcwele.
16 Shengatsi nani ningachubeka nititfoba kubantfu labanjalo nakubo bonkhe lababambisanako nalabasebenta kamatima.
17 Kodvwa ngiyajabula ngekuba khona kwaStefanasi, Fothunatusi na-Akhayikhusi, ngobe bavale sikhala senu njengobe ningekho lapha.
18 Bawuvuselele umoya wami kanye newenu. Ngako nibobati bantfu labanjalo.
19 Emabandla ase-Asiya ayanivusela. Nabo-Akhwila naPhrisila kanye nelibandla lelisendlini yabo, banivusela ngenhlitiyo yonkhe eNkhosini.
20 Bonkhe bazalwane nabo bayanivusela. Nani nibovuselana ngekwanga kwebuzalwane.
21 Mine Pawula ngibhala letilokotfo ngesandla sami.
22 Nangabe kukhona longayitsandzi iNkhosi, akabe ngulocalekisiwe. Awu, kota Nkhosi yetfu!
23 Shengatsi umusa weNkhosi Jesu ungaba nani.
24 Nelutsandvo lwami shengatsi lungaba nani nonkhe, nine lenimunye naKhristu Jesu.
