1 KubaseKhorinte 5:1-13
5 Kubikwe kutsi emkhatsini wenu kunebudlundlulu* lobungazange sebube khona ngisho nakubantfu betive, kutsi indvodza letsite ihlala* nemfati weyise.
2 Niyatigabatisa yini ngaloku? Bekungakafaneli yini nilile, kuze lomuntfu lowente loku asuswe emkhatsini wenu?
3 Nanobe ngingekho ngemtimba kodvwa nginani ngemoya, sengivele ngimehlulele lomuntfu lowente loku, njengekungatsi benginani.
4 Nanihlangene ndzawonye ngelibito leNkhosi yetfu Jesu, futsi nami nginani ngemoya nemandla eNkhosi yetfu Jesu,
5 kufanele umuntfu lonjalo nimnikele kuSathane kuze kubhujiswe inyama, khona simo lesihle selibandla sitewulondvolotwa ngelilanga leNkhosi.
6 Kutigabatisa kwenu akusikuhle. Anati yini kutsi imvubelo lencane iyibilisa yonkhe inhlama?
7 Susani imvubelo lendzala, khona nitewuba yinhlama lensha njengobe nite kulata. Ngobe ecinisweni Khristu loliPhasika letfu sewuvele unikelwe.
8 Ngako asiwugcineni lomkhosi, kodvwa hhayi ngemvubelo lendzala, nobe ngemvubelo yebubi nekungcola, kodvwa ngesinkhwa lesite imvubelo sebucotfo neliciniso.
9 Encwadzini lengayibhala ngatsi yekelani kutihlanganisa netidlundlulu,
10 kodvwa bengingasho kutehlukanisa ngalokuphelele nalabatidlundlulu kulelive, lababukhali, tigebengu, nobe labakhonta titfombe. Kube bekunjalo bekutawudzingeka nisuke kulelive.
11 Kepha nyalo ngiyanibhalela kutsi niyekele kutihlanganisa nanobe ngubani lobitwa ngekutsi ngumzalwane kodvwa abe asidlundlulu, abukhali, akhonta titfombe, etfuka, asidzakwa, nobe asigebengu, futsi ningadli ngisho nekudla nemuntfu lonjalo.
12 Ngobe ngihlangene ngani nekwehlulela labo labangephandle? Nine anehluleli yini labo labangekhatsi,
13 Nkulunkulu abe ehlulela labo labangephandle? “Msuseni umuntfu lomubi emkhatsini wenu.”
