1 KubaseKhorinte 6:1-20
6 Ukhona yini kini lotsi nakanekungevani nalotsite aye enkantolo kubantfu labangakholwa, angayi kulabangcwele?
2 Anati yini kutsi labangcwele batawehlulela live? Nangabe live litawehlulelwa ngini, ningehlulwa yini-ke kwehlulela tindzaba letincane kangaka?
3 Anati yini kutsi sitawehlulela tingilosi? Pho tingasehlula njani-ke tindzaba talokuphila?
4 Nangabe-ke nitawehlulela tindzaba talokuphila, kungani nikhetsa labo libandla lelibabukela phansi kutsi babe behluleli?
5 Loku ngikukhuluma kuze nginibangele emahloni. Kute yini lohlakaniphile emkhatsini wenu longakhona kwehlulela bazalwane bakhe?
6 Umzalwane umangalela umzalwane wakhe enkantolo, kubantfu labangakholwa nekwenta!
7 Kusho kutsi senivele nehlulekile nangabe nimangalelana nodvwa. Anivumi leni koniwa? Anivumi leni-ke kudlelwa?
8 Kodvwa nine niyona futsi nidlele labanye, ngisho nebazalwane benu imbala.
9 Anati yini kutsi bantfu labangakalungi ngeke balidle lifa leMbuso waNkulunkulu? Ningadukiswa. Tidlundlulu, labakhonta titfombe, tiphingi, emadvodza lenta lokuphambene nemvelo, emadvodza lalalana nemadvodza,
10 emasela, bantfu lababukhali, tidzakwa, labetfukako, nobe tigebengu ngeke balidle lifa leMbuso waNkulunkulu.
11 Nanobe kunjalo, nguloko labanye benu lebebangiko. Kodvwa senihlantiwe, seningcwelisiwe, futsi sekutsiwe nilungile egameni leNkhosi yetfu Jesu Khristu nangemoya waNkulunkulu wetfu.
12 Tonkhe tintfo tivumelekile kimi, kodvwa akusito tonkhe letilusito. Tonkhe tintfo tivumelekile kimi, kodvwa ngeke ngivume kugcilatwa ngunobe yini.
13 Kudla kwesisu, nesisu sekudla; kodvwa Nkulunkulu utawukwenta kutsi totimbili letintfo tibe lite. Ngako umtimba awusiwo webudlundlulu, kodvwa weNkhosi; neNkhosi yemtimba.
14 Nkulunkulu wayivusa iNkhosi, futsi ngemandla akhe, natsi utasivusa ekufeni.
15 Anati yini kutsi imitimba yenu ingemalunga aKhristu? Ngako-ke ngingawatsatsa yini emalunga aKhristu ngiwahlanganise nengwadla? Cha!
16 Anati yini kutsi loyo lohlanganiswe nengwadla umtimba munye nayo? Ngobe Nkulunkulu utsi: “Laba lababili bayawuba nyamanye.”
17 Kodvwa loyo lohlanganiswe neNkhosi umoya munye nayo.
18 Bubalekeleni budlundlulu. Tonkhe letinye tono umuntfu langatenta tingephandle kwemtimba, kodvwa loyo lowenta budlundlulu wona umtimba wakhe.
19 Anati yini kutsi imitimba yenu ilithempeli lemoya longcwele lokini, leniwunikwe nguNkulunkulu? Nekutsi anisibo benu,
20 ngobe natsengwa ngelinani lelikhulu. Yentani konkhe leningakwenta kuze nikhatimulise Nkulunkulu ngemitimba yenu.
