1 KubaseKhorinte 7:1-40
7 Mayelana netintfo lenangibhalela tona, kuhle kutsi indvodza ingamtsintsi umuntfu lomsikati;
2 kodvwa ngenca yekwandza kwebudlundlulu, nguleyo naleyo ndvodza ayibe newayo umfati, nemfati abe neyakhe indvodza.
3 Indvodza ayinike umkayo loko lokumfanele, nemfati ente lokufanako endvodzeni yakhe.
4 Umfati ute ligunya emtimbeni wakhe, kodvwa yindvodza yakhe leneligunya kuwo; ngendlela lefanako nendvodza ite ligunya emtimbeni wayo, kodvwa ngumkayo loneligunya kuwo.
5 Ningagodlelani, ngaphandle kwanangabe nivumelene sikhatsi lesitsite, kuze nitinike sikhatsi sekuthantaza bese niphindze niyahlangana, khona Sathane angetuchubeka anilinga ngekwehluleka kwenu kutibamba.
6 Nanobe kunjalo, ngiyanivumela kutsi nikwente konkhe loko lengikushito, kodvwa hhayi kutsi nginishayela umtsetfo.
7 Kepha ngifisa shengatsi ngabe bonkhe bantfu banjengami. Kodvwa-ke nguloyo naloyo muntfu unesipho lasiphiwe nguNkulunkulu, lesinye saloluhlobo lolu, lesinye salolwa.
8 Kubantfu labangakashadi nakubafelokati ngitsi, kuhle kutsi bahlale banjengami.
9 Kodvwa nangabe bangakhoni kutibamba, abashade, ngobe kuncono kushada kunekushiswa yinkhanuko.
10 Bantfu labashadile ngibanika leticondziso, kungasimi kodvwa kuyiNkhosi, kutsi umfati akukafaneli ehlukane nendvodza yakhe;
11 kodvwa nangabe ehlukana nayo, akahlale angakashadi nobe aphindze abuyisane nayo; nendvodza akukafaneli imshiye umkayo.
12 Kulaba labanye, kusho mine hhayi iNkhosi, ngitsi: Nangabe umzalwane anemfati longakholwa, kodvwa lomfati avuma kuhlala naye, akangamshiyi;
13 futsi nangabe umfati anendvodza lengakholwa kodvwa ivuma kuhlala naye, akangayishiyi.
14 Ngobe indvodza lengakholwa ingcwelisiwe ngenca yemfati wayo, nemfati longakholwa ungcwelisiwe ngenca yendvodza yakhe lekholwako; kube akusinjalo, ngabe bantfwana benu bangcolile, kodvwa nyalo bangcwele.
15 Kepha nangabe lona longakholwa akhetsa kuhamba, akahambe; umzalwane nobe dzadze akakabopheki etimeni letinjalo, kodvwa Nkulunkulu unibitele kutsi nibe nekuthula.
16 Ngobe wena mfati, wati ngani kutsi ungete wayisindzisa indvodza yakho? Nawe ndvodza, wati ngani kutsi ungete wamsindzisa umkakho?
17 Kodvwa njengobe Jehova abele umuntfu ngamunye, nguloyo naloyo akaphile njengobe Nkulunkulu ambitile. Ngako lomyalo ngiwunika onkhe emabandla.
18 Ukhona yini lowabitwa asokile? Akangabi ngulongakasoki. Ukhona yini lowabitwa angakasoki? Akangasoki.
19 Kusoka akusho lutfo, kantsi nekungasoki nako akusho lutfo, kepha kulalela imitsetfo yaNkulunkulu ngiko lokubalulekile.
20 Umuntfu akachubeke akunobe ngusiphi simo labitwa akuso.
21 Wabitwa usigcili yini? Loko akungakukhatsati; kodvwa nawungakhona kukhululeka, lisebentise lelo tfuba.
22 Ngobe nobe ngubani loseNkhosini futsi lowabitwa asigcili, ungumuntfu lokhululekile weNkhosi; ngendlela lefanako, loyo lowabitwa akhululekile, usigcili saKhristu.
23 Natsengwa ngelinani lelikhulu, ngako yekelani kuba tigcili tebantfu.
24 Bazalwane, umuntfu akachubeke embikwaNkulunkulu akunobe ngusiphi simo labitwa akuso.
25 Mayelana nalabangazange bashade ngite umyalo lovela eNkhosini, kodvwa ngininika umbono wami njengemuntfu iNkhosi leyambonisa umusa, khona ngitokwetsembeka.
26 Ngako ngicabanga kutsi kuncono ngemuntfu kutsi achubeke anjengobe anjalo ngenca yesimo lasuke akuso.
27 Uboshelwe emfatini yini? Nakunjalo, ungafuni kukhululeka. Ukhululekile yini emfatini? Nakunjalo, ungamfuni umfati.
28 Kodvwa ngisho nobe ushada, usuke ungoni. Nangabe umuntfu longazange ashade, sekashada, usuke angoni. Kepha labo labashadako batawuba nelusizi enyameni. Mine-ke ngiyaniphephisa.
29 Ngetulu kwaloko bazalwane, ngiyasho ngitsi, sikhatsi lesisele sesinciphile. Kusukela nyalo, labo labanebafati ababe njengalabete,
30 nalabo labakhalako babe njengalabangakhali, labo labajabulako babe njengalabangajabuli, labo labatsengako babe njengalabete lutfo,
31 nalabo labasebentisa lelive babe njengalabangalisebentisi kakhulu, ngobe simo salelive siyashintja.
32 Ecinisweni angifuni kutsi nikhatsateke. Indvodza lengakashadi ikhatsateka ngetintfo teNkhosi, kutsi ingemukeleka njani eNkhosini.
33 Kepha indvodza leshadile ikhatsateka ngetintfo talelive, kutsi ingemukeleka njani kumkayo,
34 futsi yehlukene ekhatsi. Ngetulu kwaloko, lomsikati longakashadi nobe intfombi ntfo, ikhatsateka ngetintfo teNkhosi kutsi ibe ngcwele emtimbeni nasemoyeni wayo. Kodvwa umfati loshadile ukhatsateka ngetintfo talelive, kutsi angemukeleka njani kumyeni wakhe.
35 Kepha loku ngikusho kuze kuzuze nine, hhayi kutsi ngiyanivimbela, kodvwa ngifuna kunikhutsata kutsi nente loko lokufanele, naloko lokusho kutinikela njalo eNkhosini ngaphandle kwekuphatamiseka.
36 Nangabe lotsite acabanga kutsi uyehluleka kutibamba ekungashadini kwakhe, futsi asendlulile ekuchumeni kwenkhanuko yebusha, nguloku lokufanele akwente: Akente loko lakufunako, utawube angoni. Akashade.
37 Kodvwa nangabe lotsite atimisele enhlitiyweni yakhe futsi angasiboni sidzingo, kepha akwati kutilawula kuloko lakutsandzako, futsi sekente nesincumo enhlitiyweni yakhe sekuhlala angakashadi, utawube wenta kahle.
38 Ngako-ke, loyo loshadako wenta ncono, kodvwa loyo longashadi utawukwenta kancono kakhulu.
39 Umfati ubophekile nangabe nje indvodza yakhe isaphila. Kepha naseyifile, ukhululekile kutsi angashada nanobe ngubani, kube seNkhosini kuphela.
40 Kodvwa ngekwembono wami, utawujabula kakhulu nangabe ahlala anjalo, futsi ecinisweni ngicabanga kutsi nami nginemoya waNkulunkulu.
