3 Johane 1:1-14
1 Mine ndvodza leseyikhulile, ngibhalela Gayusi umzalwane lotsandzekako, lengimtsandza kakhulu.
2 Mzalwane lotsandzekako, ngithantazela kutsi uchubeke uphumelela kuto tonkhe tintfo futsi ube nemphilo lenhle, njengobe nje nanyalo uphumelela.
3 Ngajabula kakhulu ngesikhatsi bazalwane befika bafakaza ngekutsi ubambelele ecinisweni, njengobe nje uchubeka uhamba kulo.
4 Kute lenye intfo lengijabulisa kakhulu kwendlula loku, kuva kutsi bantfwana bami bayachubeka bahamba ecinisweni.
5 Mzalwane lotsandzekako, kwetsembeka kwakho ukubonisa ngaloko lokwentela bazalwane, ngisho nobe ungabati.
6 Bona bafakazile ngelutsandvo lwakho ebandleni. Ngicela kutsi nasebahamba ubasite ngendlela leyemukelekako kuNkulunkulu.
7 Ngobe baphume ngesizatfu seligama lakhe, futsi abatsatsanga lutfo kubantfu betive.
8 Tsine-ke sibophekile kutsi sibemukele kahle bantfu labanjalo, kuze sibe tisebenti letikanye nabo ecinisweni.
9 Kukhona lengikubhalele libandla, kodvwa Diyotrefesi, lotsandza kuba sembili emkhatsini wabo, akemukeli lutfo loluvela kitsi ngenhlonipho.
10 Kungako nangifika ngitawutikhiphela ebaleni tintfo latentako, kukhuluma kwakhe tintfo letimbi ngatsi. Akumenelisi loku, kodvwa uphindze angabemukeli ngenhlonipho bazalwane, nalabo lababemukelako wetama kubavimba nekubakhiphela ngephandle kwelibandla.
11 Mzalwane lotsandzekako, ungakulingisi lokubi kodvwa lingisa lokuhle. Umuntfu lowenta lokuhle uvela kuNkulunkulu. Loyo lowenta lokubi akakamboni Nkulunkulu.
12 Demetriyusi ufakazelwa kahle ngibo bonkhe kantsi liciniso nalo liyamfakazela. Ecinisweni natsi sifakaza ngaye, futsi nawe uyati kutsi bufakazi betfu buliciniso.
13 Tinyenti tintfo lokufanele ngikubhalele tona, kodvwa angifuni kwenta kanjalo.
14 Kepha ngetsemba kutsi ngitakubona masinyane, sikhulume buso nebuso.
Shengatsi ungaba nekuthula.
Bazalwane bayakuvusela. Nawe ubovusela ngamunye ngamunye kubazalwane.
