Johane 2:1-25
2 Ngelilanga lesitsatfu kwaba nelidzili lemshado eKhana yaseGalile, nenina waJesu abelapho.
2 Jesu nebafundzi bakhe nabo bebamenyiwe kulelidzili.
3 Kwatsi naseliphela liwayini, unina waJesu watsi kuye: “Sebete liwayini.”
4 Jesu watsi: “Loku kusihluphe ngani tsine? Sikhatsi sami sisengakefiki.”
5 Unina watjela tinceku watsi: “Nibokwenta nobe yini lanitjela yona.”
6 Kwakunetimbita letisitfupha letakhiwe ngelitje letatibekwe lapho njengobe kwakusho lisiko lemaJuda lekuhlanjululwa, ngayinye yayingetfwala emalitha langaba ngemashumi lamane nakune kuya kulangemashumi lasitfupha nesitfupha.
7 Jesu watsi kuletinceku: “Gcwalisani letimbita ngemanti.” Tatigcwalisa tatsi nswi.
8 Wase utsi kuto: “Wakheni niwamikise kumcondzisi welidzili.” Ngako tawamikisa.
9 Ngesikhatsi lomcondzisi eva lamanti labesaguculwe aba liwayini, akazange ati kutsi leliwayini livela kuphi, kodvwa letinceku betati. Ngako wabita umkhwenyana,
10 watsi kuye: “Bonkhe labanye bantfu bacale bakhiphe liwayini lelimnandzi, kutsi lapho bantfu sebanatse benela, bese bakhipha lelingasimnandzi. Wena ugcine liwayini lelimnandzi kwaze kwaba ngunyalo.”
11 Jesu wenta loku eKhana yaseGalile, kwaba simangaliso sakhe sekucala, futsi inkhatimulo yakhe yabonakala; nebafundzi bakhe bamkholwa.
12 Ngemuva kwaloko, yena nenina, bomnakabo kanye nebafundzi bakhe behlela eKhaphanawume, kodvwa abazange bahlale sikhatsi lesidze.
13 LiPhasika lemaJuda beselisondzela, ngako Jesu wenyukela eJerusalema.
14 Wefika ethempelini wakhandza bantfu lebebatsengisa tinkhomo, timvu nematuba kanye nebashintji betimali, bahleti etihlalweni tabo.
15 Ngemuva kwekweluka siswebhu ngetintsambo, wacosha letimvu netinkhomo ethempelini, kanye nalabo lebebatitsengisa. Waphindze wacitsa imali yebashintji betimali, waketula nematafula abo.
16 Watsi kulabo lebebatsengisa ematuba: “Susani letintfo lapha! Ningayenti indlu yaBabe ibe yindlu yekutsengiselana!”
17 Bafundzi bakhe bakhumbula kutsi bekubhaliwe kwatsiwa: “Ngitawudliwa kushisekela indlu yakho.”
18 Ngako emaJuda atsi kuye: “Sentele simangaliso kuze ufakazele kutsi uneligunya lekwenta letintfo.”
19 Jesu wawaphendvula watsi: “Dzilitani lelithempeli, mine ngitalivusa ngemalanga lamatsatfu.”
20 LamaJuda atsi: “Lelithempeli lakhiwa iminyaka lengemashumi lamane nesitfupha, manje wena ungalivusa ngemalanga lamatsatfu?”
21 Kodvwa yena abekhuluma ngelithempeli lelingumtimba wakhe.
22 Kwatsi nasavusiwe ekufeni, bafundzi bakhe bakhumbula kutsi abehlale akusho loko; ngako bawukholwa umBhalo kanye naloko lokwakushiwo nguJesu.
23 Ngesikhatsi asemkhosini weliPhasika eJerusalema, bantfu labanyenti bamkholwa, batibona netimangaliso labetenta.
24 Kodvwa Jesu akazange abetsembe ngalokuphelele ngobe abebati bantfu,
25 futsi abengadzingi kutsi lotsite amtjele ngabo, ngobe yena abelati lingekhatsi lemuntfu.
