Johane 7:1-53
7 Ngemuva kwaloko Jesu wahlala eGalile, ngobe abengafuni kuya eJudiya ngenca yekutsi emaJuda abefuna kumbulala.
2 Nanobe kunjalo, umkhosi wemaJuda wemadlangala besewusedvute.
3 Ngako bomnakabo batsi kuye: “Suka kulendzawo uye eJudiya kuze bafundzi bakho batewubona imisebenti loyentako.
4 Ngobe kute umuntfu lotsi afuna kwatiwa ente tintfo ekusitsekeni. Njengobe-ke wenta letintfo, tivete eveni.”
5 Ecinisweni, bomnakabo bebangakholwa kuye.
6 Ngako Jesu watsi kubo: “Sikhatsi sami sisengakefiki, kodvwa senu kuhlale kungiso.
7 Live lite sizatfu sekunitondza, kodvwa mine liyangitondza ngobe ngifakaza ngalo kutsi imisebenti yalo mibi.
8 Nine yanini emkhosini, mine ngeke ngiye kwanyalo ngobe sikhatsi sami asikefiki.”
9 Ngemuva kwekusho letintfo, wachubeka ahleti eGalile.
10 Kwatsi ngesikhatsi bomnakabo sebahambile baya emkhosini, naye wakhuphuka, kodvwa abengafuni kubonwa bantfu.
11 EmaJuda amfuna emkhosini, atsi: “Uphi lomuntfu?”
12 Sicumbi sebantfu besisolo sivungatela sikhuluma ngaye. Labanye kuso bebatsi: “Lomuntfu ulungile.” Labanye bona batsi: “Akakalungi, kodvwa udukisa bantfu.”
13 Kute kubo lobekakhuluma ngaye embikwebantfu ngobe bebesaba emaJuda.
14 Nasewutawuphela lomkhosi, Jesu wenyukela ethempelini wacala kufundzisa.
15 EmaJuda amangala futsi atsi: “Lomuntfu ulutsatsaphi lwati lolungaka lwemiBhalo, abe angakayifundzeli?”
16 Jesu wawaphendvula watsi: “Loko lengikufundzisako akusiko kwami, kodvwa kwaloyo longitfumile.
17 Nangabe umuntfu afuna kwenta intsandvo yaNkulunkulu, utawukwati kutsi loko lengikufundzisako kuvela kuYe yini nobe kuvela kimi.
18 Lotikhulumela lokuvela kuye utifunela yena ludvumo; kodvwa lofuna kukhatimulisa loyo lomtfumile, ukhuluma liciniso, futsi ulungile.
19 Angitsi Mosi waninika uMtsetfo? Kodvwa kute namunye kini lowulalelako. Nifunelani kungibulala?”
20 Lesicumbi samphendvula satsi: “Unelidimoni wena, ngubani lofuna kukubulala?”
21 Jesu watsi kuso: “Ngente intfo yinye, nonkhe namangala.
22 Ngaleso sizatfu, Mosi waninika umtsetfo wekusoka—hhayi kutsi lomtsetfo wacala ngesikhatsi sakhe, kodvwa wacala ngesikhatsi sabokhokho—nani niyamsoka umuntfu ngeliSabatha.
23 Nangabe nisoka umuntfu ngeliSabatha kuze ningetikwephula umtsetfo waMosi, pho-ke kungani ningitfukutselela ngekutsi ngente umuntfu waphila saka ngeliSabatha?
24 Yekelani kwehlulela ngalenikubona ngaphandle, kodvwa yehlulelani ngendlela lelungile.”
25 Ngako labanye bantfu lebebahlala eJerusalema batsi: “Lona akusuye yini lomuntfu labafuna kumbulala?
26 Kodvwa asenimbuke, ushumayela embikwebantfu futsi abasho lutfo. Kungenteka yini kutsi baholi sebacabanga kutsi vele unguKhristu?
27 Khristu nakefika, kute umuntfu lotawukwati kutsi uvelaphi, kodvwa tsine siyati kutsi lomuntfu uvelaphi.”
28 Ngako njengobe afundzisa ethempelini, Jesu waphakamisa livi watsi: “Nine niyangati futsi niyati nekutsi ngivelaphi. Angizange ngititele mine, kodvwa loyo lowangitfuma ukhona mbamba futsi nine animati.
29 Mine ngiyamati ngobe ngiphuma kuye, futsi nguye longitfumile.”
30 Ngako bafuna kumbamba, kodvwa behluleka, ngobe sikhatsi sakhe besingakefiki.
31 Bantfu labanyenti esicunjini bakholwa nguye, batsi: “Nasafikile Khristu utawukwenta timangaliso letinyenti yini kwendlula leto letentiwe ngulomuntfu?”
32 BaFarisi babeva labantfu nabasho letintfo ngaye, ngako baphristi labakhulu nebaFarisi batfuma bogadzi kutsi bayombamba.
33 Jesu watsi: “Ngitawuba nani sikhashana, bese ngibuyela kuloyo lowangitfuma.
34 Nitangifuna kodvwa ngeke ningitfole, futsi ngeke nifike lapho ngitawube ngikhona khona.”
35 Ngako emaJuda akhuluma odvwa atsi: “Lomuntfu ufuna kuyaphi lapho singeke simtfole khona? Kungenteka yini kutsi ufuna kuya kumaJuda lasakateke emkhatsini wemaGriki, bese ufundzisa lawo maGriki?
36 Usho kutsini nakatsi: ‘Nitangifuna kodvwa ngeke ningitfole, futsi ngeke nifike lapho ngitawube ngikhona khona’?”
37 Ngelilanga lekugcina, lokulilanga lelikhulu lalomkhosi, Jesu wasukuma, waphakamisa livi watsi: “Nakukhona lowomile, akete kimi atewunatsa.
38 Lokholwa ngimi, ‘etibilinini takhe kutawugobhota emanti ekuphila,’ njengobe nje kusho imiBhalo.”
39 Jesu abekhuluma ngemoya lobewutawutfolwa ngulabo lebebakholwa kuye, ngobe bebasengakawutfoli, kwatise kutsi abesengakakhatinyuliswa ngaleso sikhatsi.
40 Ngako labanye esicunjini labaweva lamavi batsi: “Nembala lomuntfu ungulomPhrofethi lebesisolo simlindzile.”
41 Labanye bebatsi: “Lona nguKhristu.” Kodvwa labanye bebatsi: “Angitsi Khristu ngeke avele eGalile?
42 ImiBhalo ayizange isho yini kutsi Khristu utawuba yintalelwane yaDavide, futsi aphume eBhetlehema, lidolobha Davide labehlala kulo?”
43 Ngako lesicumbi sehlukana ekhatsi ngalendzaba.
44 Nanobe kunjalo, labanye bebafuna kumbamba, kodvwa bonkhe behluleka.
45 Ngako bogadzi babuyela kubaphristi labakhulu nakubaFarisi, bona batsi kulabogadzi: “Anikabuyi leni naye?”
46 Labogadzi baphendvula batsi: “Kute umuntfu lowase wakhuluma njengalona.”
47 BaFarisi base batsi: “Kantsi nani senidukisiwe yini?
48 Ukhona yini umholi nobe umFarisi loke wakholwa kuye?
49 Kodvwa lesicumbi lesingawati uMtsetfo sibantfu labacalekisiwe.”
50 Nikhodemu lowake waya kuJesu, futsi labengulomunye wabo watsi kubo:
51 “Angitsi ngekwemtsetfo wetfu umuntfu awumehluleli angakatikhulumeli kucala, futsi ungakakwati naloko lakwentako?”
52 Bamphendvula batsi: “Kantsi nawe uwaseGalile yini? Tihlolele wena ubone kutsi kute umphrofethi lotawuvela eGalile.”
Emavesi 53 kuya kusehluko 8, livesi 11, akatfolakali emahumushweni lamanyenti lamadzala futsi letsenjwako, afundzeka ngalendlela (abekwe ngetindlela letingafani emibhalweni yesiGriki nasemahumushweni ayo lehlukahlukene):
53 Ngako nguloyo naloyo wabuyela emtini wakhe.
