KubaseGalathiya 5:1-26
5 Ngobe ngalenkhululeko, Khristu wasikhulula. Ngako-ke cinani, ningavumi kutsi niphindze niboshelwe ebugcilini.
2 Mine Pawula ngiyanitjela ngitsi, nangabe nisoka, Khristu ngeke abe lusito kini.
3 Ngiphindze ngiyafakaza kunobe ngubani losokako, kutsi ubophekile kugcina wonkhe uMtsetfo.
4 Nangabe ngeMtsetfo, wena wetama kuba ngulolungile, wehlukanisiwe naKhristu ngisho nobe ungubani, futsi sewukhweshile emseni wakhe.
5 Kodvwa ngemoya, tsine silindzele kuba ngulabalungile ngenca yekukholwa kwetfu.
6 Ngobe kulabo labamunye naKhristu Jesu, kusoka nobe kungasoki akukabaluleki kubo, kodvwa kukholwa lokusebenta ngelutsandvo ngiko lokubalulekile.
7 Benigijima kahle. Ngubani-ke lonivimbele kutsi nichubeke nilalela liciniso?
8 Loluhlobo lwemfundziso aluveli kuLoyo lonibitako.
9 Imvubelo lencane ibilisa yonkhe inhlama.
10 Ngiyaciniseka kutsi nine lenimunye neNkhosi ngeke nicabange ngendlela leyehlukile; kodvwa loyo lonibangela tinkinga, ngisho nobe kungaba ngubani, utawutfola sehlulelo lesimfanele.
11 Kodvwa bazalwane, nangabe mine ngisashumayela ngekusoka, pho ngisaphatfwelani kabi? Ngaleyo ndlela sikhubekiso lesiletfwa lugodvo Jesu labetselwa kulo sesisusiwe.
12 Ngifisa shengatsi lamadvodza letama kuniphatamisa angatiphakula.
13 Bazalwane, nabitelwa enkhululekweni; kodvwa ningayisebentisi njengelitfuba lekwenta lokufiswa yinyama, kepha ngelutsandvo, banini tigcili talomunye nalomunye.
14 Ngobe wonkhe uMtsetfo upheleliswe emyalweni munye, lotsi: “Kufanele utsandze makhelwane wakho njengobe utitsandza wena.”
15 Nangabe-ke nichubeka nilumana futsi nishwabadzelana, caphelani kutsi ningacedzani.
16 Kodvwa ngitsi: Chubekani nihamba ngemoya futsi ngeke nize nente lokufiswa yinyama.
17 Ngobe ngetifiso tayo, inyama iphambene nemoya, nemoya uphambene nenyama; letintfo tiyaphikisana, kuze ningakwenti loko lenifuna kukwenta.
18 Ngetulu kwaloko, nangabe niholwa ngumoya, anikho ngephansi kweMtsetfo.
19 Imisebenti yenyama ibonakala ngalokucacile, futsi ngulena: Budlundlulu, kungcola, kutiphatsa lokubi kwekweyisa,
20 kukhonta titfombe, kusebentelana nemimoya, inzondo, kucabana, umona, intfukutselo lengalawuleki, imibango, kwehlukana, emahlelo,
21 kuhawukela, kudzakwa, imicimbi lengalawulwa, naletinye tintfo letifana naleti. Ngiyanecwayisa ngaletintfo, njengobe besengivele nginecwayisile, kutsi labo labenta tintfo letinjena ngeke bawutfole uMbuso waNkulunkulu.
22 Ngakulokunye, titselo temoya nguleti: Lutsandvo, injabulo, kuthula, kubeketela, umusa, buhle, kukholwa,
23 umoya lomuhle, nekutibamba. Kute umtsetfo lomelene naletintfo.
24 Labo lababaKhristu Jesu babetsele inyama kanye netifiso netinkhanuko tayo.
25 Nangabe siphila ngemoya, asiphindze sihambe ngendlela lehlelekile ngemoya.
26 Asingatigabatisi, singabhebheteli kuncintisana, futsi singadlelani umona.
