Makho 7:1-37
7 BaFarisi naletinye tati temtsetfo lebebasuka eJerusalema beta babutsana kuJesu.
2 Babona labanye bebafundzi bakhe badla ngetandla letingcolile, nobe letingakagezwa.
3 BaFarisi nawo onkhe emaJuda bebangadli bangakatigezi tandla kuze kufike engcoseni, ngobe bebabambelele emasikweni abokhokho babo,
4 futsi nababuya emakethe bebangadli bangakatihlambululi. Bekunalamanye emasiko lamanyenti lebebabambelele kuwo, njengekugezwa kwetindzebe, tindziwo kanye netitja.
5 Ngako labaFarisi naletati temtsetfo bambuta batsi: “Kwentiwa yini kutsi bafundzi bakho bangalihloniphi lisiko labokhokho, kodvwa badle ngetandla letingcolile?”
6 Jesu watsi kubo: “Isaya waphrofetha kufanele ngani nine batentisi njengobe kubhaliwe kutsi: ‘Labantfu bangidvumisa ngemilomo yabo, kodvwa tinhlitiyo tabo tikhashane nami.
7 Kungikhonta kwabo kulite ngobe bafundzisa timfundziso tebantfu.’
8 Aniyigcini imitsetfo yaNkulunkulu, kodvwa nibambelele emasikweni ebantfu.”
9 Ngetulu kwaloko watsi kubo: “Ninemacebo ekulahla imitsetfo yaNkulunkulu kute nigcine emasiko enu.
10 Ngobe Mosi watsi: ‘Hlonipha uyihlo nenyoko,’ waphindze watsi: ‘Umuntfu lokhuluma kabi ngeyise nobe ngenina kufanele afe.’
11 Kodvwa nine nitsi: ‘Nangabe umuntfu atsi kuyise nobe kunina: “Konkhe lenginako lebengingakunakekela ngako sekuyikhobhani (lokusho sipho lesinikelwe kuNkulunkulu),”’
12 akusadzingeki loyo muntfu abentele lutfo batali bakhe.
13 Ngako nilenta lite livi laNkulunkulu ngenca yemasiko enu leniwafundzisa labanye. Futsi nenta naletinye tintfo letinyenti letifana naleti.”
14 Wase ubita sicumbi sebantfu, watsi kuso: “Ngilaleleni, futsi nikucondze loko lengikushoko.
15 Kute intfo lengena ngekhatsi kumuntfu lengamngcolisa, kodvwa tintfo letiphuma kuye ngito letimngcolisako.”
16 ——*
17 Ngako watsi nasangene endlini asesukile kulesicumbi, bafundzi bakhe bambuta ngalomfanekiso.
18 Watsi kubo: “Kantsi nani anicondzi, nifana nalabantfu? Anati yini kutsi kute intfo lengena kumuntfu lengamngcolisa?
19 Ngobe leyontfo ayiyi enhlitiyweni, kodvwa ingena esiswini bese iyaphuma.” Ngako-ke watsi konkhe kudla kuhlantekile.
20 Waphindze watsi: “Lokuphuma kumuntfu ngiko lokumngcolisako,
21 ngobe enhlitiyweni yemuntfu kuphuma imicabango lemibi, budlundlulu, kweba, kubulala,
22 kuphinga, bukhali, bubi, kukhohlisa, kutiphatsa lokubi kwekweyisa, umona, kuhlambalata, kutiphakamisa kanye nekungacabangeli.
23 Tonkhe letintfo letimbi tivela ngekhatsi kumuntfu futsi tiyamngcolisa.”
24 Jesu wesuka lapho waya esifundzeni saseThire naseSidoni. Wafike wangena endlini futsi abengafuni kutsi bantfu bati ngaloko, kodvwa wehluleka kutifihla.
25 Ngekushesha lomunye umfati labenendvodzakati lencane leyayinelidimoni weva ngaye, wase uyeta wafike waguca embikwakhe.
26 Lomfati abengumGriki, avela eFenikhe leseSiriya, futsi abesolo acela Jesu kutsi akhiphe lelidimoni kulendvodzakati yakhe.
27 Kodvwa Jesu watsi: “Asekucale kwenele bantfwana kucala, ngobe akukalungi kutsatsa sinkhwa sabo usijikele tinjana.”
28 Kodvwa lomfati waphendvula watsi: “Kona kunjalo Nkhosi, kodvwa netinjana letingephansi kwelitafula tidla timvutfu letiwa kulabantfwanyana.”
29 Jesu watsi kuye: “Ukhulume kahle, ngako hamba ngobe lelidimoni seliphumile kulendvodzakati yakho.”
30 Wahamba waya ekhaya, watfola lomntfwana alele embhedzeni, nalelidimoni seliphumile.
31 Nakabuya esifundzeni saseThire, Jesu wendlula eSidoni waya eLwandle LwaseGalile wate wefika esifundzeni saseDekhapholi.
32 Bantfu baletsa kuye indvodza lebeyisihhulu futsi inenkinga yekukhuluma, bamncenga kutsi ayibeke tandla.
33 Ngako wayitsatsa wayisusa kulesicumbi baba bodvwa, wase ufaka iminwe yakhe etindlebeni tayo futsi ngemuva kwekukhafula watsintsa lulwimi lwayo.
34 Wase ubuka ezulwini, wadvonsa umoya watsi kuyo: “Efatha,” lokusho kutsi “Vuleka.”
35 Tindlebe tayo tavuleka, nalenkinga yayo yekukhuluma yaphela, yase icala kukhuluma kahle.
36 Jesu wabadvonsa ngendlebe watsi bangatjeli muntfu, kodvwa abetsi nakasho njalo kube shengatsi ubabangile.
37 Bantfu bamangala kakhulu bate batsi: “Tonkhe letintfo latentako tiyamangalisa. Ngisho netihhulu utenta tive, netimungulu utenta tikhulume.”
Imibhalo lengentansi
^ Lelivesi liyatfolakala kulamanye emahumusho eliBhayibheli, kodvwa alitfolakali kulamanye emahumusho esiGriki lamadzala futsi letsenjwako.
