Matewu 14:1-36
14 Ngaleso sikhatsi, iNkhosi Herodi yeva ngaJesu,
2 yase itsi etincekwini tayo: “Lomuntfu nguJohane uMbhabhatisi. Uvukile ekufeni, kungako enta letimangaliso letingaka.”
3 Herodi abembophile Johane, wamvalela ejele ngenca yaHerodiyasi, umfati waFiliphu umnakabo.
4 Ngobe Johane abesolo amtjela atsi: “Akukavumeleki kutsi umtsatse abe ngumkakho.”
5 Nanobe Herodi abefuna kumbulala, abesaba bantfu ngobe bebatsatsa Johane njengemphrofethi.
6 Kwatsi ngelilanga lemcimbi wekugubha kutalwa kwaHerodi, indvodzakati yaHerodiyasi yadansa, yamjabulisa kakhulu Herodi,
7 wate wafunga watsi utayinika nobe ngayini leyicelako.
8 Yelulekwe ngunina, lentfombatana yatsi: “Nginike ngemgcwembe inhloko yaJohane uMbhabhatisi.”
9 Inkhosi yadzabuka, kodvwa ngenca yesifungo lebeseyisentile embikwalabo lebebakhona edzilini, yatsi ayiniketwe.
10 Herodi wakhipha livi, futsi Johane wajutjwa inhloko ejele.
11 Inhloko yakhe yaletfwa ngemgcwembe yanikwa lentfombatana, yona yayimikisa kunina.
12 Ngemuva kwaloko, bafundzi baJohane beta batsatsa sidvumbu sakhe bayewusingcwaba, baphindze babikela Jesu.
13 Nakeva ngaloko, Jesu wesuka lapho wahamba ngesikebhe waya endzaweni lethulile kute abe yedvwa, kodvwa satsi nasiva ngaloku, sicumbi sebantfu samlandzela ngetinyawo sisuka kulamanye emadolobha.
14 Nakehla esikebheni, wabona sicumbi lesikhulu sebantfu, futsi wasihawukela, welapha labo labebagula.
15 Kwatsi nasekuhwalala bafundzi bakhe beta kuye batsi: “Lendzawo isiganga futsi sekuvele kuhwalele; ngako tjela labantfu bahambe kute baye emadolobheni bayewutitsengela kudla.”
16 Kodvwa Jesu watsi kubo: “Kute sidzingo sekutsi bahambe; bapheni nine kudla.”
17 Batsi kuye: “Site kudla, ngaphandle nje kwetinkhwa letisihlanu netinhlanti letimbili.”
18 Watsi kubo: “Tiletseni lapha.”
19 Wase utjela labantfu kutsi bahlale phansi etjanini. Watsatsa letinkhwa letisihlanu naletinhlanti letimbili, wabuka ezulwini, wabonga, ngemuva kwekuhlephula letinkhwa watinika bafundzi bakhe, bona base batinika labantfu.
20 Bonkhe badla besutsa, futsi babutsa kudla lobekusele, kwagcwala bobhasikidi labalishumi nakubili.
21 Labo labadla kwakungemadvodza langaba tinkhulungwane letisihlanu, ngaphandle kwebafati nebantfwana.
22 Ngekushesha watjela bafundzi bakhe kutsi abagibele esikebheni bahambe embili bewelele ngesheya njengobe yena asakhulula lesicumbi sebantfu.
23 Ngemuva kwekukhulula labantfu, wakhuphuka waya entsabeni wayewuthantaza. Nanobe kwasekusebusuku kakhulu, wahlala lapho yedvwana.
24 Kwatsi lapho sikebhe sesihambe kakhulu, sacala kushaywa ngemagagasi kamatima, ngobe umoya wawuphambana nabo.
25 Ekuseni ngeluvivi, Jesu weta kubo ahamba etikwelwandle.
26 Nabambona ahamba etikwelwandle, bafundzi bakhe besaba, batsi: “Sibona umbono!” Futsi bamemeta ngekwesaba.
27 Kodvwa Jesu watsi kubo: “Manini sibindzi, ningesabi, ngimi lo!”
28 Phetro watsi kuye: “Nkhosi, nangabe kunguwe ngitjele nami ngite lapho kuwe ngihamba etikwemanti.”
29 Jesu watsi: “Kota!” Ngako Phetro wehla esikebheni wahamba etikwemanti wacondza ngakuJesu.
30 Kodvwa watsi nakabona lesiphepho wefikelwa kwesaba, wase ucala kucwila, wamemeta watsi: “Nkhosi, ngisindzise!”
31 Ngekushesha, Jesu welula sandla sakhe wambamba, watsi: “Wena lonekukholwa lokuncane, yini lekwenta ungabate?”
32 Batsi nasebagibele esikebheni, lesiphepho saphela.
33 Ngako labafundzi lebebasesikebheni baguca embikwakhe, batsi: “Wena ungiyo mbamba iNdvodzana yaNkulunkulu.”
34 Bewela base befika eGenesaretha.
35 Atsi nakambona, emadvodza akuleyondzawo atfumela ligama kuto tonkhe tindzawo letisedvute, futsi bantfu baletsa kuye bonkhe labebagula.
36 Bamncenga kutsi bamane nje batsintse umphetfo wengubo yakhe yangetulu, futsi bonkhe labawutsintsa baphila.
