Matewu 20:1-34
20 “Ngobe uMbuso welizulu ufana nemuntfu lowaphuma ekuseni kakhulu ayewucasha bantfu lebebatawusebenta ensimini yakhe yemagilebisi.
2 Nasavumelene nabo kutsi utawubaholela denariyo munye ngelilanga, wabatfumela ensimini yakhe.
3 Waphindze waphuma nasekuyawushaya insimbi yemfica ekuseni, wabona labanye beme ngasemakethe bete umsebenti,
4 watsi kubo: ‘Nani hambani niye ensimini yami, ngitaniholela loko lokunifanele.’
5 Ngako bahamba. Waphindze waphuma futsi nasekuyawushaya insimbi yelishumi nakubili emini nanasekuyawushaya insimbi yesitsatfu ntsambama, wenta lokufanako.
6 Ekugcineni, nasekuyawushaya insimbi yesihlanu ntsambama waphuma, watfola labanye bemile, wase utsi kubo: ‘Nimeleni lapha lilanga lonkhe ningasebenti?’
7 Bamphendvula batsi: ‘Kungobe kute losicashile.’ Wase utsi kubo: ‘Nani-ke yanini ensimini yami.’
8 “Nasekuhwalala, lomnikati wensimu watsi endvuneni yakhe: ‘Bita letisebenti utinike imiholo yato, ucale ngaletifike ekugcineni, ugcine ngaletifike kucala.’
9 Nguleyo naleyo ndvodza leyayicale kusebenta nasekutawushaya insimbi yesihlanu entsambama yatfola denariyo munye.
10 Ngako labo lebebafike kucala bacabanga kutsi batawutfola lokunyenti, kodvwa batsi nabefika, nabo banikwa denariyo munye.
11 Nabanikwa lodenariyo, bacala kukhonona kumnikati wensimu,
12 batsi: ‘Laba labafike ekugcineni basebente li-awa linye nje kuphela, kodvwa ubaholela umholo lolingana newetfu tsine lesisebente lilanga lonkhe, sashiswa nalilanga!’
13 Kodvwa watsi kulomunye wabo: ‘Ndvodza, kute lokubi lengikwentile. Angitsi vele sivumelene ngekutsi ngitaniholela denariyo munye?
14 Tsatsani lokukwenu nihambe. Yintfo lengiyifunako kutsi nginike laba labafike ekugcineni loko lengininika kona nani.
15 Akukafaneli yini ngente lengikufunako ngetintfo tami? Nobe ninemona ngekutsi mine ngilungile?’
16 Ngako-ke bekugcina bayawuba bekucala, nebekucala babe bekugcina.”
17 Kutsite nasebasendleleni leyenyukela eJerusalema, Jesu wabitela bafundzi bakhe labalishumi nakubili ngasese watsi kubo:
18 “Nyalo senyukela eJerusalema, futsi iNdvodzana yemuntfu itawunikelwa kubaphristi labakhulu nasetatini temtsetfo, batayilahla ngelicala batsi ayibulawe,
19 bese bayinikela kubantfu betive kute bahlekise ngayo, bayibhambabule babuye bayibetsele, kutsi ngelilanga lesitsatfu ivuswe.”
20 Unina wemadvodzana aZebedi weta kuye ahamba nemadvodzana akhe lamabili, wefika waguca wacela lokutsite kuye.
21 Jesu watsi: “Ufunani?” Lomake watsi: “Ngicela kutsi emadvodzana ami ahlale nawe eMbusweni wakho, lenye ibe ngesekudla sakho, lenye ibe ngesencele sakho.”
22 Jesu waphendvula watsi: “Aniyati lentfo leniyicelako. Ningayinatsa yini lendzebe lengitayinatsa?” Batsi: “Yebo singayinatsa.”
23 Watsi kubo: “Vele nitayinatsa, kodvwa akusimi loncumako kutsi ngubani lotawuhlala ngesekudla nobe ngesencele sami eMbusweni, ngobe labo labatawuhlala ngulabo labalungiselwe kona nguBabe.”
24 Laba labanye labalishumi batsi nabeva ngaloko, babatfukutselela laba lababili.
25 Kodvwa Jesu wababita watsi kubo: “Niyati kutsi babusi betive bayatiphakamisa futsi tikhulu tibusa ngekucindzetela.
26 Akusinjalo ngani, ngobe nobe ngubani lofuna kuba mkhulu emkhatsini wenu kufanele abe yinceku yenu,
27 nanobe ngubani lofuna kuba wekucala emkhatsini wenu kufanele abe sisebenti senu.
28 Ngobe neNdvodzana yemuntfu ayizange itele kutewusetjentelwa, kodvwa yetela kutewuba yinceku nekunikela ngemphefumulo wayo kutsi ube yinhlawulo yalabanyenti.”
29 Nasebaphuma eJerikho, Jesu walandzelwa sicumbi lesikhulu sebantfu.
30 Emadvodza lamabili latimphumphutse labehleti eceleni kwemgwaco atsi nakeva kutsi nguJesu lona lowendlulako, amemeta atsi: “Nkhosi, Ndvodzana yaDavide, sihawukele!”
31 Sicumbi sebantfu sawekhuta satsi akabindze; kodvwa amemeta kakhulu atsi: “Nkhosi, Ndvodzana yaDavide, sihawukele!”
32 Ngako Jesu wema, watsi kuwo: “Nifuna nginenteleni?”
33 Amphendvula atsi: “Nkhosi, sente sibone.”
34 Jesu wawahawukela lamadvodza, wawatsintsa emehlo, futsi abona ngaleso sikhatsi, ase ayamlandzela.
