Matewu 22:1-46
22 Jesu waphindze wakhuluma nabo asebentisa imifanekiso watsi:
2 “UMbuso welizulu ufana nenkhosi leyentela indvodzana yayo lidzili lemshado.
3 Yatfumela tisebenti tayo kutsi tiyewubita bonkhe lebebamenyiwe, kodvwa bala kuta.
4 Yaphindze yatfumela letinye tisebenti yatsi: ‘Tjelani labo labamenyiwe kutsi abete edzilini ngobe selilungile, futsi tinkhabi netinkhomo tami letikhuluphele sengivele ngitihlabile, konkhe sekume ngemumo.’
5 Kodvwa letimenywa atizange tinake, tesuka tahamba, letinye taya emasimini ato, kantsi letinye taya emabhizinisini ato;
6 letinye tabamba letisebenti tatishaya futsi tatibulala.
7 “Lenkhosi yatfukutsela kakhulu, futsi yakhipha emasotja ayo ayewubulala lalababulele letisebenti tayo, ashisa nelidolobha labo.
8 Yase itsi etisebentini tayo: ‘Lidzili selilungile, kodvwa labo lebebamenyiwe bebangakufaneli kuba khona.
9 Ngako-ke hambani niye emigwacweni nimeme wonkhe umuntfu lenimtfola khona kutsi ete edzilini.’
10 Letisebenti taphuma taya emigwacweni tagcogca bonkhe letatihlangana nabo, lababi nalabalungile; futsi lendlu lokwakunalelidzili kuyo yagcwala.
11 “Inkhosi nayifika itewuhlola letimenywa, yakhandza indvodza leyayingakembatsi timphahla tekuya emshadweni.
12 Ngako yatsi kulendvodza: ‘Wakitsi, ungene njani lapha ungakembatsi timphahla tekuya emshadweni?’ Lendvodza yavele yabindza.
13 Lenkhosi yase itsi etisebentini tayo: ‘Mbopheni tandla netinyawo, nimlahlele ngephandle ebumnyameni. Kulapho atawufikelwa khona kukhala nekugedletela kwematinyo.’
14 “Ngobe banyenti labamenyiwe, kodvwa bambalwa labakhetsiwe.”
15 Ngako baFarisi besuka bayewukwakha lisu lekumgiba ngaloko lakushoko.
16 Batfuma bafundzi babo nemalunga elicembu laHerodi, befike batsi kuye: “Mfundzisi, siyakwati kutsi ukhuluma liciniso futsi ufundzisa indlela yaNkulunkulu ngeliciniso, nekutsi awutsengi emehlo emuntfu, ngobe awubuki loko umuntfu langiko ngephandle.
17 Sitjele-ke: Ucabangani? Kuvumelekile yini kutsi sikhiphe umtselo kuKhesari?”
18 Kodvwa Jesu abekwati lokubi labebakuhlosile, futsi watsi: “Batentisi, ningilingelani?
19 Ngikhombiseni luhlavu lwemali.” Ngako bamnika denariyo.
20 Watsi kubo: “Sabani lesitfombe nalelibito lelilapha?”
21 Batsi kuye: “KwaKhesari.” Ngako Jesu watsi kubo: “Nikani Khesari lokukwakhe, kodvwa ninike Nkulunkulu lokukwakhe.”
22 Nabeva loko, bamangala futsi bamshiya bahamba.
23 Ngalelo langa, baSadusi bona lebebatsi kute kuvuswa kwalabafile, beta kuye bambuta batsi:
24 “Mfundzisi, Mosi watsi: ‘Nangabe indvodza ifa ite bantfwana, umnakabo kufanele angene umfati wayo, kute atewutalela umufi bantfwana.’
25 Kwakukhona telamani letisikhombisa, futsi wekucala watsatsa umfati wase uyafa ete bantfwana, umnakabo wamngena lomfati.
26 Kwenteka lokufanako nakuwesibili newesitsatfu bate baphela bonkhe bosikhombisa.
27 Ekugcineni lomfati naye wafa.
28 Pho-ke nasekuvuswa labafile, lomfati utawuba wabani kuletelamani letisikhombisa ngobe ube ngumfati wabo bonkhe?”
29 Jesu wabaphendvula watsi: “Nidukile ngobe aniyati imiBhalo kanye nemandla aNkulunkulu,
30 nasekuvuswa labafile, labadvuna ngeke batsatse bafati nalabasikati ngeke bendze, kodvwa batawufana netingilosi tasezulwini.
31 Mayelana nekuvuswa kwalabafile, anikufundzanga yini loko Nkulunkulu lanitjela kona nakatsi:
32 ‘NginguNkulunkulu wa-Abrahama, wa-Isaka newaJakobe’? Yena unguNkulunkulu walabaphilako, hhayi walabafile.”
33 Nasiva loku, sicumbi sebantfu samangala ngekufundzisa kwakhe.
34 BaFarisi batsi nabeva kutsi Jesu ubehlulile baSadusi, babutsana ndzawonye.
35 Lomunye wabo labewati kahle uMtsetfo wamlinga ngekumbuta atsi:
36 “Mfundzisi, ngumuphi umtsetfo lomkhulu eMtsetfweni waMosi?”
37 Jesu watsi kuye: “‘Kufanele utsandze Jehova Nkulunkulu wakho ngayo yonkhe inhlitiyo yakho, nangawo wonkhe umphefumulo wakho, nangayo yonkhe ingcondvo yakho.’
38 Lona ngiwo umtsetfo lomkhulu newekucala.
39 Wesibili lofana nawo utsi: ‘Kufanele utsandze makhelwane wakho njengobe utitsandza wena.’
40 Wonkhe uMtsetfo waMosi kanye nalokwashiwo baPhrofethi kusekelwe kulemitsetfo lemibili.”
41 Ngesikhatsi baFarisi basebutsene, Jesu wababuta watsi:
42 “Nicabanga kutsi Khristu uyindvodzana yabani?” Bona batsi: “Uyindvodzana yaDavide.”
43 Yena watsi kubo: “Kungani-ke ngesikhatsi Davide achutjwa ngumoya longcwele, ambita ngekutsi ‘yiNkhosi,’ nakatsi:
44 ‘Jehova watsi eNkhosini yami: “Hlala ngesekudla sami ngidzimate ngibeke titsa takho ngephansi kwetinyawo takho”’?
45 Nangabe Davide ambita ngekutsi yiNkhosi, kuya ngani-ke kutsi abe yindvodzana yakhe?”
46 Kute lowakhona kumphendvula, futsi kusukela ngalelo langa kuchubeke, kute lowaba nesibindzi sekumbuta.
