Roma 14:1-23
14 Memukeleni umuntfu lobutsakatsaka ekukholweni, kodvwa ningehlulelani ngemibono yenu.
2 Kukholwa kuyamvumela lomunye umuntfu kutsi adle konkhe, kodvwa umuntfu lobutsakatsaka udla tibhidvo.
3 Lodlako akangambukeli phansi loyo longadli, nalongadli akangamehluleli loyo lodlako, ngobe naye wemukelwe nguNkulunkulu.
4 Ungubani wena kutsi ungehlulela sisebenti salomunye umuntfu? Kuma nekuwa kwaso kusenkhosini yaso. Ecinisweni sitawukuma ngobe Jehova angasenta sime.
5 Lomunye umuntfu utsatsa lilanga lelitsite njengalelibalulekile kunalelinye; lomunye ulitsatsa njengalelifana nawo onkhe lamanye emalanga; nguloyo naloyo akaciniseke kahle engcondvweni yakhe.
6 Loyo lohlonipha lilanga ulihlonipha ngenca yaJehova. Naloyo lodlako udla ngenca yaJehova, ngobe ubonga Nkulunkulu; nalongadli akadli ngenca yaJehova, futsi naye ubonga Nkulunkulu.
7 Ecinisweni, kute kitsi lotiphilela yena, kute nalotifela yena;
8 ngobe nasiphila siphilela Jehova, nanasifa sifela Jehova. Ngako kutsi siyaphila nobe siyafa, sibaJehova.
9 Khristu wafa waphindze wavuswa, kuze abe yiNkhosi yalabafile nalabaphilako.
10 Umehlulelelani umzalwane wakho? Futsi kungani umbukela phansi? Sonkhe sitawukuma embikwesihlalo saNkulunkulu sekwehlulela.
11 Ngobe kubhaliwe kutsi: “‘Njengobe nje ngiphila,’ kusho Jehova, ‘onkhe emadvolo atawuguca embikwami futsi tonkhe tilwimi titawudvumisa Nkulunkulu.’”
12 Ngako-ke, ngamunye wetfu utawutilandzisela kuNkulunkulu.
13 Asingasehlulelani, kodvwa esikhundleni saloko timiseleni kutsi ningabeki lutfo lolungakhuba umzalwane nobe lube ngumcabo kuye.
14 Ngiyati futsi ngiyaciniseka ngeNkhosi Jesu kutsi kute lutfo lolungcolile ngekwalo; kodvwa nangabe umuntfu atsatsa intfo njengalengcolile, isuke ingcole kuye.
15 Ngobe nangabe umzalwane wakho akhubeka ngaloko lokudlako, wena usuke ungasaphili ngekuvumelana nelutsandvo. Ungamlimati ngalokudlako loyo lowafelwa nguKhristu.
16 Ngako ningakuvumeli lokuhle lenikwentako kutsi kunente nikhulunywe kabi.
17 Ngobe uMbuso waNkulunkulu awusho kudla nekunatsa, kodvwa usho kulunga, kuthula, nenjabulo leletfwa ngumoya longcwele.
18 Ngobe loyo losebentela Khristu ngalendlela uyemukeleka kuNkulunkulu futsi uyemukeleka nakubantfu.
19 Ngako-ke, asiphishanekele tintfo letiletsa kuthula netintfo letisenta sakhane.
20 Yekelani kubhidlita loko Nkulunkulu lakwentako, ngenca nje yekudla. Kuliciniso kutsi tonkhe tintfo tihlantekile, kodvwa kuyingoti nangabe umuntfu adla kantsi ubangela kukhubeka.
21 Kuhle kutsi ungayidli inyama, ungalinatsi neliwayini futsi ungenti nobe yini lekhuba umzalwane wakho.
22 Kukholwa lonako akube kwakho wedvwa naNkulunkulu. Uyajabula umuntfu longatehluleli ngaloko yena lakubona kwemukeleka.
23 Kodvwa nangabe angabata, sewuvele ulahliwe nakadla, ngobe kudla kwakhe akukasekelwa ekukholweni. Ecinisweni, konkhe lokungakasekelwa ekukholweni kusono.
